Impezayag 22 - Manobo Western Bukidnon

¹ Ne, impaahà kediey zutun te velinsug̵uen is wahig he egngezanan te Wahig he Ebpekeveg̵ey te Untung. Ne haazà is wahig ne utew metingew iring te ispihu. Ne ziyà ebpuun haazà te pinuuwà te Megbevayà he iyan sikan is pinuuwà te nati he kerehidu.

² Ne haazà is wahig, diyà edtudà te teliwazà te kersada zutun te inged. Ne te pesiziveluyà he veyvey zutun te wahig egkeahà is menge kayu he ebpekeveg̵ey te untung. Ne haazà is kayu, sepulù wey zezuwa he kelasi is beg̵as din ne kada vulan ebpemeg̵as te sengekelasi. Ne is dahun dutun, ne vawì he ebpekeulì te menge etew he sakup te menge g̵inhedian dini te lumpad.

³ Ne haazà is inged, wazà dutun minsan hengkey he midrewakan te Megbevayà. Ne zutun is pinuuwà te Megbevayà he iyan pinuuwà te nati he kerehidu. Ne ed-ezapen is Megbevayà te menge sulug̵uen din.

⁴ Egkeehè dan is paras din ne haazà is menge sulug̵uen, edsuratan is menge vuked dan te ngazan din.

⁵ Wazè en dutun mezukilem ne wazè en kinahanglan he zuen pa sulù wey silà te andew su iyan sulù dan is Megbevayà he Nengazen te langun, ne edhadì sikandan te wazà pidtemanan.

Tutuu he Edlikù si Jesus

⁶ Ne migkeg̵iyan a zutun te velinsug̵uen, ke sikandin te, “Heini is menge lalag he nezineg nu, utew venar ne tutuu he egkengetuman. Is Megbevayè tew he Nengazen te langun, imbeg̵ey zin is Wag̵as he Mulin-ulin diyà te ebpemeneuven din ne midsug̵ù din is belinsug̵uen din wey zan ikepaahà diyà te menge sulug̵uen din ke hengkey is meg̵aan en he egkeulaula.”

⁷ Ne egkag̵i si Jesus te, “Meg̵aan e en ebpekeuma! Utew egkengelipey is langun he edtuman te menge lalag ku he impezayag keniyu kayi te libru.”

⁸ Ne siak si Juan is nekezineg wey nekeahà te langun he insurat ku kayi. Ne hein neipus ku te ed-ahà wey ebpemineg is langun kayi, midlangkeb a zutun te etuvangan te velinsug̵uen he mibpaahà kedì kayi te langun su ed-ezapen ku pezem.

⁹ Iyan, mibensag̵an e zin, ke sikandin te, “Kenà a kenikew ezapa su siak wey sikew, wey is menge zuma nu he ebpeneuven te Megbevayà wey is langun he edtuman te menge lalag kayi te libru, neked-iiring kiw zà he menge sulug̵uen te Megbevayà. Iyan nu zà ezapa is Megbevayà,” ke sikandin.

¹⁰ Ne impelaus din haazà is lalag din te, “Kenè nu ieles heini is impezayag kenikew he menge lalag kayi te libru su meg̵aan en egkengetuman heini is langun.

¹¹ Ne zutun he timpu,” ke sikandin, “sikan is mezaat pa is ulaula zin, ipepenigudu en sikandin ibpevaal te mezaat. Ne sikan is meremerik pa is ulaula zin dutun, ipepenigudu en sikandin ibpevaal te meremerik. Ne sikan is metazeng is ulaula zin dutun, ipepenigudu en ibpevaal te metazeng, ne haazà is etew he midhimu te Megbevayà he sakup din, ipepenigudu zutun sikandin te kebpesakup din te Megbevayà.

¹² Pemineg kew,” ke si Jesus, “meg̵aan e en ebpekeuma ne zutun edsuhulan ku is kada sevaha sumalà is mid-ulaula zin.

¹³ Iyan a sikan is alpa wey umiga, he ke và dà egkeg̵iya, kes ebpuunan wey kes egkepengkusan te minsan hengkey,” ke si Jesus.

¹⁴ Utew egkengelipey haazà is langun he ebpìpian dan is ugelingen dan, he ke và dà egkeg̵iya, ibpepalis dan is menge salè dan su wey utew meputì su emun ebeelan dan haazà, ebeg̵ayan sikandan te ketenged te kegkaan te veg̵as dutun te kayu he ebpekeveg̵ey te untung wey te kedseled dutun te menge pultahan te inged.

¹⁵ Iyan, diyè dà te meziyù is mekeeled-eled is baal zin, wey is menge keteuwan, is memeremerik is ulaula, is menge memumunù, is ebpemenimba te menge ledawan wey is langun he menge etew he ebpenurù te tarù wey is etew he limbung is ulaula zin.

¹⁶ “Siak si Jesus, midsug̵ù ku ziyan te keniyu te menge tumutuu is belinsug̵uen ku wey zin metudtul heini is langun. Iyan a sikan is kevuwazan te hadì dengan he si David. Iyan a sikan is iring te mekevugwas, kes bituen he ed-anlag ke egkepkepawè en,” ke si Jesus.

¹⁷ Ne kes Wag̵as he Mulin-ulin wey kes egkeesawa te nati he kerehidu, ed-umew zan is egkag̵i te, “Tuu kew en.” Ne sikan is nekezineg kayi, ne kinahanglan he med-umew zaan he egkag̵i te, “Tuu kew en.” Is minsan hentei keniyu he egkemezahan, wey is minsan hentei he egkesuat, dewata zin en he wazà bayad is wahig he ebpekeveg̵ey te untung he wazà pidtemanan.

¹⁸ Siak si Juan. Ebpetizeenan ku is minsan hentei he nekezineg kayi te impezayag kediey he ibpesavut kayi te libru. Ke zuen minsan hentei he ed-umanan din te minsan hengkey heini is ibpesavut, id-uman te Megbevayà te silut kandin is menge idrasey he nekag̵i kayi te libru.

¹⁹ Ne ke zuen minsan hentei he id-awè din kayi te ibpesavut he impezayag kediey is minsan hengkey, id-awà daan te Megbevayà is kandin he vahin dutun te veg̵as duen te kayu he ebpekeveg̵ey te untung he nekag̵i kayi. Ne id-awà daan diyà te kandin is ketenged din te ked-ubpà dutun te inged te Megbevayà he nekag̵i kayi te libru.

²⁰ Si Jesus he iyan ebpirma kayi te langun, ke sikandin te, “Benar iyan he meg̵aan e en ebpekeuma!” Ne ke siak te, “Uya, Jesus he Nengazen dey, hendini ke en!”

²¹ Sikiyu is langun he menge g̵aked te Megbevayà, ikeg̵ag̵ew kew te Nengazen tew he si Jesus.