Impezayag 21 - Manobo Western Bukidnon

Is Beg̵u he Hiruselim

¹ Ne zutun neehè ku is beg̵u en he langit wey tanà su nahanew en is nehuna he langit wey nehuna he tanà ne wazè en maan dag̵at.

² Ne zutun neehè ku is inged te Megbevayà he Veg̵u he Hiruselim he idlugtanà he ebpuun te Megbevayà diyà te langit. Utew mekempet haazà is inged su is kekempet din ne iring te kekempet te vahi he ed-esewaan he nepurungan mebistiyi.

³ Ne nezineg ku is egkag̵i he utew mezag̵ing diyà te pinuuwà te edhadì, ne ke sikandin te, “Mid-amur en human is Megbevayà diyà te menusiyà. Ed-amur sikandin kandan ne egkehimu sikandan he menge gin-etawan din. Iyan sikandin duma zan wey ed-ezapen dan he Megbevayà.

⁴ Ebpemunasen din en is menge luhà diyà te menge mata zan ne zutun wazè en maan ebpatey, ne wazè en maan ebpekesineg̵ew wey ebpekelelendag. Ne wazè en maan minsan hengkey he ibpekeantus su nahanew en man is nehuna he kelibutan.”

⁵ Ne migkag̵i haazà is ebpimpinuu zutun te pinuuwà te edhadì, ke sikandin te, “Guntaan edhimuwen ku he veg̵u is minsan hengkey!” Ne ke sikandin diyà te kedì te, “Isurat nu heini is egkezineg nu; egkeserig̵an wey tutuu heini he lalag.”

⁶ Ne ke sikandin en maan te, “Netuman en heini is langun. Siak, iyan a kes alpa wey umiga, he ke và dà egkeg̵iya, kes puunà wey egkepengkusan te minsan hengkey. Ke zuen egkemezahan, ibpeinum ku sikandin diyà te serebseb he zutun ebpuun is wahig he ebpekeveg̵ey te untung he wazà pidtemanan ne kenè ku sikandin ibpevayad.

⁷ Ke zuen minsan hentei he ebpekezaag ki Setanas, ne edhimuwen ku sikandin he anak ku ne egkehimu a zaan he Megbevayè din.

⁸ Iyan, sikan is egkehandek he edsundan kedì wey is menge kenà metinumanen, is menge etew he memahawag is ulaula, is menge memumunù, wey is menge meremerik is betasan, is menge keteuwan he etew, wey menge ed-azap te kenà tutuu he Megbevayà wey is langun he teruen he menge etew, iyan egketemanan dan is id-agbur sikandan diyà te ranew he nepenù te egkeregreg he esupri he iyan ikezuwa he kemetayen,” ke sikandin.

⁹ Ne zutun mid-uvayan a te sevaha zutun te pitu he velinsug̵uen he sikan is nen-ulà te pitu he lediyà he nepenù te pitu he huziyan en he idrasey te menusiyà, ne ke sikandin te, “Duma ka kedì su ibpeehè ku kenikew is ed-esawaan te nati he kerehidu.”

¹⁰ Ne zutun, pinaag̵i te g̵ehem te Wag̵as he Mulin-ulin mid-ag̵ak a te velinsug̵uen pehendiyà te utew metikang he vuntud. Ne impeehè din kediey is inged te Megbevayà he iyan sikan is inged he Hiruselim he idlugtanà he ebpuun te Megbevayà diyà te langit.

¹¹ Ne haazà he inged, ne utew merayag su zutun ed-anlag is gehem te Megbevayà. Edsinlang haazà is inged iring te mahal he vatu he haspi he edlahus dutun is mata ta.

¹² Utew metikang is elavat dutun te inged ne sepulù wey zezuwa is pultahan din ne zuen belinsug̵uen te Megbevayà he ebantey zutun te kada pultahan. Ne midsuratan is menge pultahan te menge ngazan te sepulù wey zezuwa he kepuun he menge kevuwazan ni Israyil.

¹³ Heepat he pesag̵ì is elavat dutun te inged ne ziyà te kada elavat ne zuen tetelu he pultahan. Diyà te zapit te edsilaan ne tetelu he pultahan ne ziyà te zapit te edsenlepan ne tetelu zaan. Diyà te zapit te zivavà ne tetelu zaan ne ziyà te zapit te zizayà ne tetelu zaan he pultahan.

¹⁴ Ne is elavat dutun te inged, ne sepulù wey zezuwa is impepinuuwan dutun he zekelà he vatu. Ne midsuratan haazà is menge vatu te menge ngazan te sepulù wey zezuwa he menge epustul zuen te nati he kerehidu.

¹⁵ Ne haazà is belinsug̵uen he ebpekidlalag kedì, egkulang sikandin te vulawan he mitrusan su edsukuzan din haazà is inged wey is elavet dutun wey haazà is menge pultahan.

¹⁶ Ne haazà is inged, is sukud dutun te velevag̵an din ne iring te sukud te petindeg din su nepesag̵ì is kegkeveeli zin. Ne midsukud dutun te velinsug̵uen haazà is inged ne zezuwa he libu wey heepat he g̵atus he kilumitru is petindeg din. Ne iring din ded daan is belevag̵an din wey is ketikang din.

¹⁷ Ne midsukud din daan is ketikang dutun te elavat ne menge keneman he mitrus is ketikang din sumalà is paag̵i tew te kedsukud su iyan migamit din.

¹⁸ Ne haazà is elavat ne hinimu te mahal he vatu he haspi. Ne haazà is inged ne hinimu te vulawan he utew wag̵as su edlahus is mata ta zutun.

¹⁹ Is menge vatu he mibpepinuuwan dutun te elavat, ne mideyzeyanan te mezakel he menge memekempet he menge mahal he vatu. Haazà is nehuna he vatu ne haspi, is ikezuwa ne sepiru, is iketelu ne kelsidunya, is ikeepat ne ismiralda,

²⁰ is ikelima ne serdunika, is ikeenem ne kurnelina, is ikepitu ne krisulita, is ikewalu ne birilu, is ikesiyam ne tupasyu, is ikesepulù ne krisuprasu, is ikesepulù wey sevaha ne hesintu, ne is ikesepulù wey zezuwa ne emetista.

²¹ Ne haazà is sepulù wey zezuwa he pultahan, ne sepulù wey zezuwa he pirlas su is kada pultahan, ne hinimu te sevaha he pirlas, ne is kersada zutun te inged, ne vulawan he utew wag̵as su iring te ispihu he edlahus is mata ta.

²² Ne wazè ku naahà he valey he simbahan dutun te inged. Wazà kinahanglan is baley he simbahan dutun su is Megbevayà he mekeg̵eg̵ehem he Nengazan te langun wey is nati he kerehidu, dutun en te kandan edsimba is langun.

²³ Ne kenè en daan kinahanglan is anlag te andew wey vulan he idtayew zutun su haazà is inged, ed-enlag̵an en te mekeg̵eg̵ehem he anlag te Megbevayà; sikan is nati he kerehidu ne iyan sulù dutun.

²⁴ Ne haazà is inged, ne egketeyawan te anlag din is langun he menge etew zutun he kelibutan. Ne is menge hadì te menge g̵inhedian dutun, ed-uwiten dan dutun te inged is ketig̵eyunan dan.

²⁵ Is menge pultahan dutun te inged, ne kenè en edlekevan te minsan keenu he timpu su emun maandew ne ebpuwasan, ne wazà dutun mezukilem.

²⁶ Ne ed-uwiten dutun seled te inged is menge mahal he azen wey is menge ketig̵eyunan te langun he menge g̵inhedian.

²⁷ Iyan, wazà minsan hengkey he mezaat wey is minsan hentei he ebpenurù te tarù wey is etew he ed-azap te ledawan he ebpekeseled dutun. Iyan dà ebpekeseled dutun is menge etew he inlista is menge ngazan dan dutun te libru te nati he kerehidu he zutun idlista is ebpemeg̵ayan te untung he wazà pidtemanan.