Impezayag 2 - Manobo Western Bukidnon

Is Surat Pehendiyà te Ipisu

¹ Ne impelaus din is lalag din te, “Pesurati nu is belinsug̵uen te Megbevayà he ebantey te menge tumutuu he ziyà te inged he Ipisu, ne isurat nu is menge lalag ku ziyà, ke sikew te, ‘Siak si Jesus is egawed te pitu he vituen diyà te kewanan ku he velad ne iyan a zaan edhipanew kayi te teliwazà te pitu he sulù.

² Netuenan ku is langun he menge ulaula niw; netuenan ku he edhag̵ù kew ne meinentusen kew te kemereg̵enan tenged te kedtuu niw. Netuenan ku zaan he kenè niw idtug̵ut he zuen menge lalung he etew he menge zuma niw, su sikan is menge etew he migkag̵i he menge epustul sikandan ni Jesus, migezaman niw ne zutun netuenan niw he kenà tutuu he menge epustul sikandan.

³ Netuenan ku he ed-antus kew te mereg̵en tenged te kedtuu niw kediey ne minsan pa zutun kenè niw ed-isipen he ed-engkezan niw is kedtumana niw te menge sug̵ù ku.

⁴ Iyan, duen netuenan ku he ulaula niw he kenà meupiya su hein aney kew meketuu, dekelà is gehinawa niw kediey, ne g̵untaan malù en edeisek is gehinawa niw kediey.

⁵ Tentenuzi niw sikan is kedekelaa niw zengan kediey ziyà te g̵ehinawa niw; iniyug̵i niw is mezaat he ulaula ne ul-ulaha niw is meupiya he mid-ulaula niw zengan su emun kenà, ebeyaan ku sikiyu. Ne id-awè ku is sulù niw ziyà te selevukè din emun kenè niw edlikuan is daan he ulaula niw.

⁶ Duen daan egkesuatan ku he ulaula niw su igkepauk niw is menge mezaat he ulaula te menge Nikuleyta he igkepauk ku zaan.

⁷ Is minsan hentei keniyu, mebpemineg kayi te egkeg̵iyen te Wag̵as he Mulin-ulin diyan te keniyu te menge tumutuu! Is etew he ebpekezaag ki Setanas, edtug̵utan ku he mekekaan sikandin te veg̵as te kayu he iyan puunà te untung he wazà pidtemanan he ziyà te ed-ubpaan te Megbevayà.’ ”

Is Surat Pehendiyà te Ismirna

⁸ Ne ke sikandin maan te, “Pesurati nu is belinsug̵uen te Megbevayà he ebantey te menge tumutuu ziyà te inged he Ismirna, ke sikew te, ‘Iyan heini menge lalag ku te puunà te langun ne egkepengkusan daan te langun. Minatey a ne nevanhew.

⁹ Netuenan ku is kegkeantus niw te kemeresayan; netuenan ku he egkengeayuayu kew. Ne minsan pa zutun sepian kew utew pinaag̵i te kedtuu niw. Netuenan ku he kenà benar is id-ituk keniyu te menge etew he egkag̵i he menge Hudiyu zan, iyan, kenà sikandan tutuu he Hudiyu su mibpekid-upakat dan ki Setanas.

¹⁰ Kenè kew mahandek te meg̵aan niw en igkerasey. Si Setanas, meg̵aan din en ibpepirisu is duma keniyu su ebpenulayen kew zin. Ne seled te sepulù he andew ebpekeantus kew te kemereg̵enan. Mebmetinumanen kew te menge sug̵ù ku taman te kemetayen su ebeg̵ayan ku sikiyu te kuruna he iyan is untung he wazà pidtemanan.

¹¹ Is minsan hentei keniyu, mebpemineg kayi te egkeg̵iyen te Wag̵as he Mulin-ulin diyan te keniyu te menge tumutuu. Is etew he ebpekezaag ki Setanas, kenè en egkeragkes te silut he iyan is ikezuwa he kemetayen.’ ”

Is Surat Pehendiyà te Pirgemu

¹² Ne ke sikandin maan te, “Pesurati nu is belinsug̵uen he impevantey te Megbevayà diyà te menge tumutuu he ziyà te inged he Pirgemu, ke sikew te, ‘Siak si Jesus is egkag̵i; iyan a sikan is duen din sundang he zezuwa is gerangan din he meg̵arang utew.

¹³ Netuenan ku he sakup ni Setanas is inged niw. Ne minsan pa zutun midhemenan niw is kedtuu niw kedì ne wazè niw engkezi is menge penurù ku minsan dutun te kedhimetayi ki Entipas dengan. Metinumanen sikandin he ebpenudtul te menge lalag ku, ne midhimetayan sikandin diyan te inged niw he nesakup ni Setanas.

¹⁴ Duen nepipira he menge ulaula niw he kenè ku egkesuatan, su zuen duma keniyu he edsunuzen dan is impenurù dengan ni Belaam. Su si Belaam, impenurù din dengan ki Balak is paag̵i wey mepenulayi is menge kevuwazan ni Israyil. Iyan is kegkaan te impemuhat diyà te kenà tutuu he megbevayà wey is kedhilavet te kenè dan esawa.

¹⁵ Ne zuen daan duma keniyu he edtuuwan dan is menge penurù te menge etew he Nikuleyta.

¹⁶ Iniyug̵i niw heini is mezaat he ulaula su emun kenà, meg̵aan ku en sikiyu ebeyai ne edtebeken ku heini is menge etew. Iyan gumaan ku heini is sundang dini te vèbè ku he iyan is lalag ku.

¹⁷ Is minsan hentei keniyu, mebpemineg te egkeg̵iyen te Wag̵as he Mulin-ulin diyan te keniyu te menge tumutuu. Is etew he ebpekezaag ki Setanas, ebeg̵ayan ku sikandin te in-eles ku pa he egkeenen he mana he ziyà ebpuun te langit. Ne ibeg̵ey ku zaan kandin is meputì he vatu he insurat dutun is beg̵u en he ngazan. Iyan dà egkesayud te ngazan dutun is ebeg̵ayan.’ ”

Is Surat Pehendiyà te Tiyetira

¹⁸ Ne ke sikandin maan te, “Pesurati nu is belinsug̵uen he impevantey te Megbevayà diyà te menge tumutuu he ziyà te inged he Tiyetira. Ke sikew te, ‘Siak is egkag̵i, ne Anak a te Megbevayà; is menge mata ku, ne henduen be te egkeregreg, ne is menge paa ku, ne henduen be te g̵alang he midlimbasan.

¹⁹ Netuenan ku is menge ulaula niw, dekelà is gehinawa niw kediey. Mezesen is kedtuu niw. Metinumanen kew te menge sug̵ù ku wey meinentusen kew te mereg̵en. Netuenan ku zaan he edhuna he mezakel is menge ulaula niw he meupiya g̵untaan kenà te mid-ulaula niw he meupiya zengan te aney kew en meketuu.

²⁰ Ne minsan pa zutun, duen ulaula niw he kenè ku egkesuatan su sikan is bahi he si Hisibil he egkeg̵iyen din he ebpeneuven sikandin te Megbevayà, idtug̵ut niw he ibpenurù din is mezaat he ulaula ziyà te menge sulug̵uen ku. Egkag̵i sikandin he kenà supak te Megbevayà is kedhilavet te kenè niw esawa wey is kegkaan te impemuhat diyà te menge kenà tutuu he megbevayà.

²¹ Neug̵et en is ked-entusa ku kandin wey zin meiniyug̵i is ulaula zin he mezaat, iyan, kenè din ed-iniyug̵an.

²² Ne g̵untaan, ibpehizeg̵è ku su ebpigedahan ku sikandin te zaru. Ne sikiyu is edtampu kandin te memahawag he vaal, ebpigedahan ku zaan sikiyu te kemeresayan he utew mepait emun kenè niw ed-iniyug̵an haazà is menge ulaula zutun te vahi.

²³ Ne is menge sumusundan din, edhimetayan ku. Is menge tumutuu ziyan te langun he menge inged, egketuenan dan he iyan a nesayud ke hengkey is diyà te isip wey g̵ehinawa te etew. Ibeg̵ey ku ziyà te kada sevaha is engayan he igkeveg̵ey kandin sumalà te menge ulaula zin.

²⁴ Ne sikiyu is duma ziyan te Tiyetira he wazà mekezawat te penurù dutun te vahi, he ke và dà egkeg̵iya, wazè niw zewata is egngezanan te menge mezalem he penurù ni Setanas, wazè en duma pa he ebpeveelan ku keniyu.

²⁵ Iyan dà is: hemeni niw is netuenan niw en taman te ebpekeuma a.

^26-27 Sikiyu is ebpekezaag ki Setanas wey edtuman te egkesuatan ku taman te kemetayen, is keg̵ehem he insarig kediey te Amey ku he Megbevayà, idsarig ku zaan keniyu. Ebpeveyveyaan ku keniyu is langun he menge inged diyan te kelibutan. Utew mezesen is ked-uwita niw kandan; egkengezaag niw is menge inged ne wazà ebpekesukul keniyu.

²⁸ Ibeg̵ey ku zaan keniyu is mekevugwas.

²⁹ Is minsan hentei keniyu, mebpemineg kayi te egkeg̵iyen te Wag̵as he Mulin-ulin diyan te keniyu te menge tumutuu.’ ”