Impezayag 19 - Manobo Western Bukidnon

¹ Ne nepasad haazà, nezineg ku ziyà te langit is utew meg̵urub he henduen be te utew mezakel he menge etew he egkag̵i te, “Delig̵a is Megbevayà su iyan sikandin mekeg̵eg̵ehem, iyan sikandin dekelà is bentug̵an din, iyan sikandin Menluluwas.

² Metazeng wey hustu is kukuman din su midsilutan din haazà is nevantug he ebpelelevag he vahi he pinaag̵i te meremerik he vaal zin, neeneb is tivuuk he kelibutan te ked-ezapa te menge ledawan. Midsilutan sikandin te Megbevayà su midhimetayan din is menge sulug̵uen te Megbevayà.”

³ Ne mid-uman dan megkag̵i te, “Delig̵a is Megbevayà! Haazà is inged, kenà egkeawà te minsan keenu is ked-evel zutun te inged.”

⁴ Ne zutun nemenlangkeb haazà is keluwaan wey heepat he ebmeg̵urangen wey haazà is heepat he linimbag he kedesenan, ne mid-azap dan is Megbevayà he ebpimpinuu zutun te pinuuwè din te kedhadì. Ne ke sikandan te, “Benar! Delig̵a is Megbevayà!”

Is Keemuran Diyà te Langit

⁵ Ne zutun nezineg ku is egkag̵i he henduen be te ebpuun dutun te pinuuwà te Megbevayà, ne ke sikandin te, “Sikiyu is menge sulug̵uen te Megbevayè tew, wey sikiyu is edtahud kandin, deisek is pid-etawan se zekelà is pid-etawan, delig̵a niw is Megbevayà!”

⁶ Ne nezineg ku is kegkag̵i zutun te utew medmezakel he menge etew he iring te zeg̵urus te utew zekelà he evag̵a wey henduen daan te egkengelilid he rug̵ung. Ke sikandan te, “Delig̵a is Megbevayà su is Megbevayè tew he mekeg̵eg̵ehem he Nengazen, ne iyan sikandin edhadì!

⁷ Edlilipey kiw utew ne edelig̵en tew sikandin tenged te zekelà he g̵ehem din! Su iyan en heini timpu he kegketuman te eseweey te nati he kerehidu. Is ed-esewaan te nati, ne mibistiyan en.

⁸ Ne is esawa te nati, mibeg̵ayan te ketenged te kebisti te manggad he meputì he merayag utew.” (Ne haazà is meputì he manggad, ne iyan kehulug̵an din is menge metazeng he ulaula te menge etew he g̵aked te Megbevayà.)

⁹ Ne migkeg̵iyan a zutun te velinsug̵uen, ke sikandin te, “Isurat nu heini: Utew zeyzey is langun he ibpemetelavuk dutun te eseweey te nati he kerehidu.” Ne impelaus din haazà is lalag din te, “Iyan heini tutuu he menge Lalag te Megbevayà!”

¹⁰ Ne zutun midlangkeb a ziyà te etuvangan din su ed-ezapen ku pezem, iyan, mibensag̵an e zin te, “Kenà a kenikew ezapa su siak wey sikew wey is langun he menge zuma nu he edtuu te tuluuwen he impenurù ni Jesus, neked-iiring kiw zà he menge sulug̵uen te Megbevayà. Iyan nu zà ezapa is Megbevayà!” Umba migkag̵i zin haazà su sikan is ibpekag̵i te Megbevayà dutun te menge ebpeneuven te Megbevayà, ne iyan sikan is tuluuwen he impenurù ni Jesus.

Is Kinehuziyanan he Gira

¹¹ Ne zutun neehè ku is langit he nepuwasan ne zuen dutun kudà he meputì ne egkeserig̵an wey metinumanen is ed-untud dutun. Metazeng is kedhukum din ne metazeng daan is kebpekidtebek din te menge kuntada zin.

¹² Is menge mata zin, ne henduen be te egkeregreg. Ne mezakel is menge kuruna he insuup diyà te ulu zin. Ne zuen ngazan he insurat diyà te kandin he iyan dà sikandin nesayud ke hengkey is kehulug̵an dutun.

¹³ Ne is kumbalè din ne henduen be te intereb diyà te lengesa. Ne migeraran sikandin he “Lalag te Megbevayà.”

¹⁴ Ne ebpemeninundug kandin is utew medmezakel he menge sundaru he ebpuun diyà te langit. Ebpemen-untud dan daan te meputì he menge kudà ne nengesun-uzan dan te meputì he manggad he utew lumpiyu.

¹⁵ Ne midlepew ziyà te vèbè din is sundang he utew meg̵arang ne egemiten din haazà te kedsulituwa zin te langun he menge g̵inhedian dini te lumpad te kelibutan. Utew mezesen is kebayàbayè din kandan ne ibpeehè din is rerangit kandan te mekeg̵eg̵ehem he Megbevayà. Henduen sikandin te egkeres te menge kuntada zin, su ke và dà beg̵as te paras is menge etew ne henduen sikandin te egkeres te veg̵as te paras.

¹⁶ Diyà te kumbalè din wey ziyà te vuvun din ne zuen insurat he g̵erar he iyan is: “Hadì te langun he menge hadì wey Egalen te langun he menge egalen.”

¹⁷ Ne zutun neehè ku is belinsug̵uen he ziyà edhithitindeg te teliwazà te andew ne mibpekezag̵ing sikandin is ed-umew te langun he menge tagbis he ziyà edlayang te zivavew, ne ke sikandin te, “Tig̵um kew en is menge tagbis wey kew mekekaan te idlavung he ibpekaan keniyu te Megbevayà!

¹⁸ Amur-amur kew wey kew mekekaan te sapù te menge hadì, menge kepitan, wey menge sundaru! Kaan kew te menge lawa te kudà wey is menge egkukudà kayi! Kaan kew te lawa te langun he menge etew, uripen se kenà uripen, dekelà is pid-etawan din se minus is pid-etawan din!” ke sikandin.

¹⁹ Ne zutun neehè ku sikan is mekehandekhandek he langgam wey is menge hadì dini te lumpad he edumahan te langun he medmezakel he menge sundaru zan. Mid-amur-amur zan su edtebeken dan haazà is ed-untud te meputì he kudà wey is menge sundaru zin he ebpuun te langit.

²⁰ Ne midakep haazà is langgam ne midakep daan kes ebpeneuven ni Setanas, sikan is mibpaahà te menge egkein-inuwan diyà te etuvangan te langgam. (Pinaag̵i zutun te menge egkein-inuwan mid-ekalan din wey meketuu te langgam haazà is langun he menge etew he midtiyapan te tiyap duen te langgam wey mid-azap te ledawan te langgam.) Ne sikan is langgam wey kes ebpeneuven ni Setanas, intimbag sikandan he uuyag pa ziyà te ranew he egkeregreg te esupri.

²¹ Ne midhimetayan is menge sundaru zan pinaag̵i te sundang he eguwà te vèbà dutun te ed-untud te meputì he kudà. Ne haazà is menge tagbis, utew zan nengehantey zutun te menge lawa zutun te menge sundaru.