Impezayag 18 - Manobo Western Bukidnon

Is Kebinsuli te Bebilunya

¹ Ne hein nepasad dutun te velinsug̵uen is egkeg̵iyen din, neehè ku is selakew pa he velinsug̵uen he ebpenaug pehendiyà te tanà he ebpuun te langit ne utew zekelà is keg̵ehem din. Ne utew merayag is ked-anlag din ne neenlag̵an din is minsan hendei zini te lumpad te kelibutan.

² Ne mibpekezag̵ing is egkag̵i te, “Neg̵erè en. Nepurung mezeeti is dekelà he inged he Bebilunya! Ne nehimu en guntaan he ubpeey te menge mezaat he mulin-ulin wey menge mezaat he kedesenan. Egkeubpaan haazà is inged te minsan hengkey he mezaat wey meremerik he tagbis.

³ Umba neulaula heini su is bahi he iyan is inged he Bebilunya, impeinum din te langun he menge etew ziyà te langun he menge g̵inhedian is binu he iyan is ked-ezapa zin te menge ledawan. Is menge hadì diyà te tivuuk he kelibutan, ne midtampu zan dutun te memahawag he menge vaal zin. Ne is menge ebpemetig̵ayun diyà te kelibutan, midsepian dan pinaag̵i te suat dutun te vahi te menge utew mahal!”

⁴ Ne zutun nezineg ku is selakew pa he egkag̵i ziyà te langit, ke sikandin te, “Sikiyu is menge g̵aked ku he etew, awè kew en keniyan te inged! Kenè kew medtampu te menge ulaula he mezaat keniyan te vahi su kela ke mekeragkes kew te menge silut ku kandin.

⁵ Su emun idtambù is menge salè din ne ebpekesungkul ziyà te langit tenged te utew medmezakel, ne wazà melipati te Megbevayà is menge vetasan din he utew mezaat.

⁶ Is mid-ulaula zin keniyu he pesipala, iyan daan ul-ulaha niw kandin asal kezezuwa niw tekepa is menge vales niw kandin. Teg̵ayi niw is tasa zin te pauk te Megbevayà he ibpeinum kandin he kezezuwa edtekepa is kebpekelangut din kenà te impeinum din keniyu.

⁷ Utew subra is kebpurungi zin te kebpekesavuk din ne g̵untaan iyan bales kandin is kegkeseeng wey is merasey he kebpekesavuk. Su kenà sikandin ed-engked he ebpegalbu, ke sikandin diyà te isip din te, ‘Bai a ne kenà a valu. Kenà egkehimu he egkeumahan a te kemereg̵enan.’

⁸ Ne tenged te iyan haazà neisip din, ne zutun te sengeandew, egkeumahan sikandin te kemeresayan. Su edsilutan sikandin te zaru, vitil, wey kemetayen; ne egkepurung sikandin egketutung su is Megbevayà he mekeg̵eg̵ehem he Nengazen te langun, iyan edsilut kandin.”

⁹ Ne is menge hadì dini te kelibutan he midtampu zutun te mezaat he ulaula zin he iyan is ked-ezapa zin te menge ledawan, ebpekesineg̵ew ne ebpekelelendag sikandan dutun emun egkeehè dan en is evel zutun te kebinsuli kandin.

¹⁰ Ne ebpekeziyù dan is ebpantew su egkehandek dan su kela ke meragkes sikandan dutun te kedèdeeti zutun te inged. Ne ke sikandan te, “Kehizu nu, sikew is utew zekelà he inged he Bebilunya su seled te sengeuras neumahan ka te silut!”

¹¹ Ne is menge ebpemetig̵ayun dini te kelibutan, ebpemekesineg̵ew zan daan ne edlelendag dan tenged dutun te inged su wazè en ebpememasa te menge ibelegyè dan.

¹² Wazè en ebpekepemasa te ibpemelegyè dan he vulawan, pelata, menge mahal he vatu wey pirlas, meupiya he manggad he meputì wey merig̵à wey manggad he sida, menge mehemut he kayu, menge vutang he mibeelan te mahal he kayu, wey vatu wey g̵alang wey putew, wey marpil, wey vatu he marmul,

¹³ menge perehemut he egkekaan wey edtutungen, menge mehemut he sulù, menge vinu, lana, erina, wey parey he trigu, menge vaka, menge kerehidu, menge kudà, wey menge kelisa, wey minsan menge etew he uripen.

¹⁴ Ne is menge ebpemetig̵ayun, egkag̵i zan dutun te vahi he iyan is inged he Bebilunya, ke sikandan te, “Nepurung mezeeti is langun he menge meupiya he ed-engkenen nu pezem. Ne nezeetan en daan is ketig̵eyunan nu wey igkelipey nu, ne haazà, kenè nu en maan egkeahà,” ke sikandan.

¹⁵ Ne haazà is menge ebpemetig̵ayun he insepian dan is kebpemetig̵ayun dan dutun te inged, ebpekeziyù dan daan is ebpantew su egkehandek dan su kela ke meragkes dan dutun te kedèdeeti zutun he inged. Ebpekesineg̵ew zan ne edlelendag dan.

¹⁶ Ne ke sikandan te, “Kenug̵un utew te zekelà he inged! Is menge meg̵inged dutun, ne nebistiyan te mahal he manggad he meputì wey merig̵à wey merudtem. Ne mideyzeyanan dan is lawa zan te vulawan wey menge mahal he vatu wey pirlas.

¹⁷ Iyan, seled te sengeuras dà, naamin mezeeti is langun he ketig̵eyunan dan!” ke sikandan. Ne is menge kepitan te barku wey is menge pesehiru wey menge edterebahu zutun te menge barku wey is langun he ebpemetig̵ayun pinaag̵i te zag̵at, ne ebpekeziyù dan is ebpantew ne emun egkeehè dan is evel zutun te kebinsuli zutun te inged,

¹⁸ ebpekezag̵ing dan is egkag̵i te, “Wazè pa inged he ebpekelavew keniyan te zekelà he inged!”

¹⁹ Ne tuus te utew ebmesakit is gehinawa zan, ebukbukan dan te eliyavuk is ulu zan. Ne edsineg̵ew zan ne edlelendag dan ne ke sikandan te, “Kenug̵un utew te zekelà he inged! Su insepian is ketig̵eyunan din te langun he teg̵ig̵aked te menge barku ziyà te zag̵at. Ne g̵untaan, seled dà te sengeuras, nepurung mezeeti is langun he menge valey zutun!” ke sikandan.

²⁰ Ne sikiyu is menge meg̵inged diyà te langit, lipey kew tenged te limas kayi te zekelà he inged. Lipey kew zaan is menge tumutuu wey menge epustul wey ebpeneuven te Megbevayà su midsilutan te Megbevayà haazà is inged tenged te menge pesipala zin keniyu!

²¹ Ne zutun duen belinsug̵uen he mekeg̵eg̵ehem ne mibitbit din is batu he iring kezekelà te g̵elingan ne intimbag din diyà te zag̵at. Ne ke sikandin te, “Iring kayi is kegkepurung kegkezeeti te zekelà he inged he Bebilunya ne kenè en maan egkeahà te minsan hentei.

²² Kenè en maan egkezineg kayi te inged is ebpememulalà wey ebpememudyung wey ebpemeng-arpa. Ne kenè en maan egkeahà kayi is minsan hengkey he pandey. Ne is dag̵ing te ebpenggaling ne kenè en maan egkezineg kayi.

²³ Ne kenè en maan egketeyawan heini is inged te minsan hengkey he sulù. Ne is kegkag̵ikag̵i te vahi wey maama he sikan pa meked-esawa, ne kenè en maan egkezineg kayi te inged. Utew nengevantug diyà te tivuuk he kelibutan is menge ebpemetig̵ayun kayi ne mid-ekalan is menge etew ziyà te langun he menge g̵inhedian pinaag̵i te kinaagman te menge veyilan dutun.”

²⁴ Midsilutan is dekelà he inged he Bebilunya su zutun mid-ag̵as is lengesa te menge etew he g̵aked wey ebpeneuven te Megbevayà. Ne is langun he nevunù dini te tivuuk he kelibutan, ne pinaag̵i zaan kayi te inged.