Impezayag 17 - Manobo Western Bukidnon

Is Nevantug he Mezaat he Vahi

¹ Ne migkeg̵iyan a te sevaha zutun te pitu he menge velinsug̵uen he egkulang dutun te pitu he menge lediyà, ke sikandin te, “Hendini ka su ibpeehè ku kenikew is kedsiluti zuen te nevantug he vahi he ebpelelevag he ebpinuu ziyà te mezakel he menge wahig.

² Nekehilavet kandin is menge hadì diyà te kelibutan. Ne is binu zin, he ke và dà egkeg̵iya, is ked-ezapa zin te menge ledawan, ingkelangut te menge meg̵inged diyà te kelibutan.”

³ Ne zutun pinaag̵i te g̵ehem te Wag̵as he Mulin-ulin mid-uwit a zuen te velinsug̵uen diyà te tanà he kenà ed-ubpaan te etew ne neehè ku zutun kes bahi. Ed-untud sikandin diyà te langgam he merig̵à. Ne haazà is langgam, insurat diyà te lawa zin is mezakel he menge gerar he utew supak te Megbevayà. Ne pitu is ulu zutun te langgam wey sepulù is sungey zin.

⁴ Ne haazà is bahi, ne midsun-uzan te utew mahal su merig̵à wey merudtem he manggad. Ne mideyzeyanan is lawa zin te vulawan wey menge mahal he vatu wey menge pirlas. Ne zutun te velad din is bulawan he tasa he nepenù te vinu he iyan is menge memahawag wey memeremerik he ulaula zin dutun te kebpelelevag din.

⁵ Ne zuen insurat dutun te vuked din he ngazan he in-eles is kehulug̵an din he edhenduen te, “Kes nevantug he inged he Bebilunya he iyan iney, he ke và dà egkeg̵iya, puunà te minsan hentei he vahi he ebpelelevag wey minsan hengkey he mahawag he meremerik he ulaula zini te lumpad te kelibutan.”

⁶ Ne neehè ku he nelangut haazà is bahi te lengesa te menge tumutuu he midhimetayan din tenged te kedtuu zan ki Jesus. Ne utew a neinuinu te kegkeahaa ku zutun te vahi.

⁷ Iyan, migkeg̵iyan a zutun te velinsug̵uen, ke sikandin te, “Maan is egkeinuinu ka? Ibpesavut ku kenikew is in-eles he kehulug̵an mehitenged keniyan te vahi wey keniyan te langgam he pitu is ulu zin ne sepulù is sungey zin he ed-untuzan keniyan te vahi.

⁸ Heeyan is langgam he egkeehè nu, ne zini sikandin te kelibutan dengan, iyan, wazè en guntaan. Ne meg̵aan en maan edlepew he ebpuun te vitu he wazà pidtemanan is kezalem din, ne zutun te kedlepew zin, id-agbur sikandin diyà te Impirnu su edsilutan. Ne is langun he menge etew he zengan te wazè pa limbag̵a is kelibutan, wazà isurat is menge ngazan dan diyà te libru he zutun ilista is langun he ebeg̵ayan te untung, utew zan egkengeinuinu zutun te ked-ehè dan te langgam. Iyan igkengeinuinu zan su haazà is langgam, dengan uuyag ne minatey en guntaan, iyan, egkevanhew zed.

⁹ Egkesavut heini te etew he uluwanen. Is kehulug̵an duen te pitu he ulu zutun te langgam, ne pitu he menge vuvungan he zutun ebpinuu haazà is bahi, he ke và dà egkeg̵iya, sikan is nevantug he inged. Ne kenà duen dà taman su haazà is pitu he ulu ne pitu zaan he hadì.

¹⁰ Minatey en is lelima zutun te menge hadì, ne edhadì pa g̵untaan is sevaha, ne wazè pa medhadì is sevaha, iyan, emun edhadì en haazà ne meg̵aan dà utew is kedhadì din ne egkeawè en.

¹¹ Ne is kehulug̵an dutun te langgam he zengan uuyag ne g̵untaan minatey, ne ikewalu sikandin he hadì he edsunud dutun te pitu he hadì. Ne edsilutan sikandin daan keuzemà diyà te Impirnu.

¹² Ne haazà is sepulù he sungey, ne iyan kehulug̵an dutun is sepulù pa he hadì he wazè pa medhadì. Haazà is sepulù he hadì wey haazà is langgam, ebeg̵ayan sikandan te keg̵ehem te kedhadì te meg̵aan dà.

¹³ Sevaha zà is tuyù dutun te sepulù he hadì ne edtevangan dan is langgam pinaag̵i te zesen dan wey keg̵ehem dan te kedhadì.

¹⁴ Edtebeken dan sikan is nati he kerehidu ne egkezaag sikandan dutun te nati su egalen sikandin te minsan hentei he egalen wey hadì te minsan hentei he hadì. Ne is menge etew he edumahan dutun te nati, ne migeraran sikandan te menge impetuu wey menge pinilì, wey menge metinumanen he menge sumusundan te Megbevayà.”

¹⁵ Ne zutun mid-uman megkag̵i haazà is belinsug̵uen diyà te kedì, ke sikandin te, “Haazà is menge wahig he neehè nu he zutun ebpinuu sikan is bahi, ne iyan kehulug̵an dutun is menge g̵inhedian wey kepuun wey utew medmezakel he menge etew he kenà ed-iring-iring is kineg̵iyan dan.

¹⁶ Ne haazà is neehè nu he sepulù he sungey wey haazà is langgam, ne egkuntedehan dan haazà is bahi he ebpelelevag ne ed-eg̵awen dan is menge azen din ne edlevasan dan sikandin ne egkeenen dan is sapù din ne ebinsulan dan sikandin.

¹⁷ Umba ed-ul-ulahan dan haazà su is Megbevayà, midhimu zin he egkesuatan dan te edtuman is tuyù te Megbevayà. Ne tenged dutun sevaha zà is egkeisip dan ne idtavang dan te langgam is keg̵ehem dan te kedhadì taman te egkengetuman is nengetagnà he menge Lalag te Megbevayà.

¹⁸ Ne haazà is bahi he egkeehè nu, ne iyan kehulug̵an din sikan is nevantug he inged he edlingahaan te menge hadì diyà te lumpad te kelibutan.”