Impezayag 16 - Manobo Western Bukidnon

Is Menge Lediyà he Midteg̵uan te Pauk

¹ Ne zutun nezineg ku is ebensag diyà te simbahan diyà te langit ne ke sikandin dutun te pitu he menge velinsug̵uen te, “Kuwaa niw en ne iitis niw ziyà te lumpad te kelibutan is tag̵ù keniyan te pitu he lediyà he iyan is pauk te Megbevayà!”

² Ne haazà is egkehuna he velinsug̵uen, mid-ulaan din dini te kelibutan is lediyà he ziyà te kandin. Ne zutun, is menge etew he mibpemarka te tuus duen te langgam wey mid-azap dan haazà is ledawan dutun te langgam, midtuvuan sikandan te menge memahù wey utew memesakit he menge vekukang.

³ Ne haazà is ikezuwa he velinsug̵uen, mid-ulaan din diyà te zag̵at is lediyè he ziyà te kandin ne mibaluy is dag̵at he lengesa he iring te lengesa te etew he minatey. Ne zutun mibpematey is minsan hengkey ziyà te zag̵at he zuen din gehinawa.

⁴ Ne haazà is iketelu he velinsug̵uen, is lediyà he ziyà te kandin, mid-ulaan din diyà te menge wahig wey ebpuunan te menge wahig ne mibaluy he lengesa haazà is menge wahig.

⁵ Ne nezineg ku zutun is belinsug̵uen he impevantey te menge wahig, ke sikandin te, “Sikew is wag̵as he Megbevayà he zengan wey g̵untaan, metazeng heini is kedsiluti nu te menusiyà

⁶ su mibpenhimetayan dan is menge tumutuu kenikew wey menge ebpeneuven dengan ne g̵untaan ibpeinum nu kandan is lengesa su iyan hustu he ibales nu kandan!”

⁷ Ne zutun nezineg ku is egkag̵i ziyà te pemuhatà he edhenduen te, “Sikew is mekeg̵eg̵ehem he Megbevayà he Nengazen te langun, benar iyan he metazeng wey hustu is kedsiluti nu te menusiyà!”

⁸ Ne zutun haazà is ikeepat he velinsug̵uen, mid-ulaan din diyà te andew is lediyà he ziyà te kandin. Ne haazà, nehimu is andew he ebpeketutung te menusiyà.

⁹ Ne g̵eina te nengetutung is menge etew zutun te utew meinit, midsumpalit dan is Megbevayà su iyan sikandin ebayàbayà dutun te kedresaya kandan, iyan, wazè dan iniyug̵i is memezaat he ulaula zan ne wazè dan daan bentug̵a is Megbevayà.

¹⁰ Ne haazà is ikelima he velinsug̵uen, is lediyà he ziyà te kandin, mid-ulaan din diyà te pinuuwà te kedhadì te mekehandekhandek he langgam. Ne mibmerusirem utew is ginhedian dutun te langgam. Ne tuus te utew merasey is silut te menge etew, egkesepè dan en is dilè dan tenged te utew mesakit.

¹¹ Ne minsan pa zutun wazè dan iniyug̵i is memezaat he menge ulaula zan, kekenà, midsumpalit dan nasì is Megbevayà he ziyà te langit tenged dutun te utew mesakit he menge vekukang.

¹² Ne haazà is ikeenem he velinsug̵uen, mid-ulaan din is lediyà he ziyà te kandin diyà te zekelà he wahig he egngezanan te Yupratis ne nemezahan dutun haazà is wahig su wey maandam is ibayà te menge hadì he ziyà ebpuun te zapit te edsilaan.

¹³ Ne neehè ku zutun is tetelu he menge utew memekehandekhandek he mezaat he mulin-ulin he henduen be te vakbak. Midlepew is sevaha he ebpuun duen te vèbà te zekelà he deragun he iyan si Setanas, ne is sevaha, diyà medlepew puun te vèbà duen te langgam, wey is sevaha zuen medlepew te vèbà te ebpeneuven ni Setanas.

¹⁴ Menge mezaat he mulin-ulin haazà he zuen dan gehem te kebaal te egkengein-inuwan. Midsug̵ù sikandan su ibpetig̵um kandan is menge sundaru te langun he menge hadì dini te kelibutan su zutun te egkevantug he andew te kedsilut, egkengezaag sikandan te Megbevayà he Nengazen te langun.

^15-16 Ne zutun nengetig̵um te menge mezaat he mulin-ulin is menge hadì wey is menge sundaru zan diyà te tanà he migngezanan te Ermegidun te kineg̵iyan he Hibriyuhanen. “Purungi niw pemineg̵a heini,” ke si Jesu Kristu, “su iring te kebpekeuma te tekawen is kedlikù ku. Is etew he kenà edlipezeng ne ed-endamen din is bisti zin, he ke và dà egkeg̵iya, ebpeebuten e zin, egkelipey sikandin dutun su kenà sikandin egkelevasan, he ke và dà egkeg̵iya, kenà sikandin dutun egkepeel-elezan.”

¹⁷ Ne zutun, is ikepitu he velinsug̵uen, mid-ulaan din diyà te keramag is lediyà he ziyà te kandin ne nezineg ku is egkag̵i he ziyà ebpuun te pinuuwà te edhadì he ziyà te simbahan, ke sikandin te, “Netapus en!”

¹⁸ Ne zutun nezineg ku is utew memezag̵ing ne neserasab is kilat ne mibpemeransì ne midlinug te utew mezesen. Sikan pa meseg̵azi te etew haazà is linug he utew mezesen he iring dutun!

¹⁹ Ne kes dekelà he inged he Bebilunya, neg̵evà te tetelu he vahin ne nengerundus is langun he menge inged diyà te minsan hendei he g̵inhedian. Ne wazà dutun melipati te Megbevayà is inged he Bebilunya he impeinum din te menge meg̵inged dutun is binu he ziyà te tasa zin, he ke và dà egkeg̵iya, impeg̵ezaman din kandan is utew mekelimlimezang he pauk din.

²⁰ Ne nengehanew is langun he menge pulu ziyà te zag̵at. Ne nengehanew zaan is langun he menge vuntud.

²¹ Ne mid-uzanan te utew zekelà he g̵iyew is menge etew. Is keveg̵at te kada sevaha zutun te g̵iyew, ne menge kelimahan he kilu. Ne is menge etew, midsumpalit dan is Megbevayà tenged dutun te g̵iyew he insilut din kandan su utew nerasey sikandan dutun.