Impezayag 14 - Manobo Western Bukidnon

Is 144,000 he Menge Etew

¹ Ne zutun neehè ku is buntud he Siyun ne zutun edhithitindeg sikan is nati he kerehidu ne zuma zin daan dutun is nenggatus wey kepatan wey heepat he libu he menge etew. Ne haazà is menge etew, insurat diyà te menge vuked dan is ngazan dutun te nati wey is ngazan daan te Amey zin he Megbevayà.

² Ne zutun nezineg ku is egkag̵i ziyà te langit ne is kegkag̵i zin, henduen be te zeg̵urus te utew mezakel he menge wahig wey iring te utew mezag̵ing he veransì. Haazà is egkag̵i he nezineg ku, ne henduen be zaan te menge zag̵ing te utew mezakel he ebpemen-arpa.

³ Ne haazà is menge etew, diyè dan te etuvangan te pinuuwà te Megbevayà wey te etuvangan duen te heepat he menge linimbag he kedesenan wey te menge ebmeg̵urangen. Ne migkanta zan dutun is beg̵u he kentahan. Iyan dà netau zutun he egkanta te kentahan, haazà is nenggatus wey kepatan wey heepat he libu he etew he mibelukasan dini te lumpad te kelibutan duen te nati he kerehidu.

⁴ Iyan haazà he menge maama he wazè dan mekesalà pinaag̵i te kedhilavet te kenè dan esawa su utew lumpiyu is menge ulaula zan ne wazè dan suwayi sikan is nati he kerehidu te minsan hendei sikandin ebpevayà. Mibelukasan sikandan puun duen te perayan he iyan is tivuuk he menusiyà wey zan mehimu he iyan nepengilizan dutun wey ikeveg̵ey sikandan diyà te Megbevayà wey ziyà te nati he kerehidu.

⁵ Ne wazà minsan keenu sikandan mezineg he edtarùtarù ne wazà neveelan dan he minsan hengkey he mezaat.

Is Tetelu he Velinsug̵uen te Megbevayà

⁶ Ne zutun neehè ku en maan is selakew en maan he velinsug̵uen he edlayang he utew mibpeketikang diyà te udtuwan. Ibpesavut din dutun is Meupiya he Tudtulanen he kenà egkehanew te minsan keenu. Impesavut din haazà te tivuuk he menusiyà, diyà te menge etew te minsan hengkey he kineg̵iyan wey minsan hendei he g̵inhedian, wey tribu, wey kepuun.

⁷ Ne mibpekezag̵ing is egkag̵i te, “Tehuza niw is Megbevayà wey ventug̵a sikandin su neuma en is timpu te kedsusi zin te menge ulaula te tivuuk he menusiyà! Ezapa niw is Megbevayà he iyan nenlimbag te langit wey tanà wey zag̵at wey menge puunà te wahig!”

⁸ Ne zuen daan ikezuwa he velinsug̵uen he nekesunud dutun te nehuna ne migkag̵i sikandin te, “Na, nezeetan en! Utew nezeeti is dekelà he inged he Bebilunya! Midlangut din te vinu zin is tivuuk he menusiyà, he ke và dà egkeg̵iya, impenurù din te tivuuk he menusiyà is ked-ezapa te menge ledawan!”

⁹ Ne midlepew is iketelu he velinsug̵uen he midsunud dutun te nehuna he zezuwa ne mibpekezag̵ing is egkag̵i te, “Is minsan hentei he etew he ed-ezapen din haazà is langgam wey ledawan duen te langgam, ne ebpemarka sikandin diyà te vuked din, ne emun kenà, ne ziyà te velad din,

¹⁰ ne ibpeinum kandin is binu te pauk te Megbevayà, he ke và dà egkeg̵iya, silut kandin te Megbevayà, ne heini is mepait he vinu, midtag̵ey en te Megbevayà diyà te tasa he iyan sikan is meinit he pauk din. Ne haazà is menge etew, edresayen sikandan diyà te meregreg he esupri ziyà te Impirnu. Ne egkeahà haazà dutun te nati he kerehidu wey te menge velinsug̵uen te Megbevayà.

¹¹ Ne haazà is hapuy he idrasey kandan, ed-evel te wazà pidtemanan ne te maandew wey mezukilem kenà egkeengked is kedresaya kandan su ed-ezapen dan kes langgam wey kes ledawan duen te langgam ne ebpemarka sikandan te tuus duen te ngazan te langgam.”

¹² Ne tenged dutun, sikan is menge etew he neg̵aked te Megbevayà, sikan is ebpememineg te menge sug̵ù te Megbevayà wey edtuman te menge lalag ni Jesus, kinahanglan he med-antus sikandan.

¹³ Ne zutun nezineg ku is egkag̵i ziyà te langit te, “Isurat nu heini: Utew mulà meupiya is egkengeulaula te menge etew he ebpatey ke menge tumutuu sikandan te Nengazen.” “Benar iyan,” egkag̵i is Wag̵as he Mulin-ulin. “Utew zan en egkengelipey su wazè en igkehag̵ù dan ne ebpekehimeley sikandan. Ne zutun edsuhulan sikandan tenged te menge meupiya he menge vaal zan.”

Is Kedreg̵una te Menusiyà

¹⁴ Ne zutun neehè ku is gapun he utew meputì, ne zutun te g̵apun duen ebpimpinuu he henduen be te iyan sikan is Kakey te Menusiyà. Duen bulawan he kuruna he insuup diyà te ulu zin ne egawed te g̵arab he utew meg̵arang.

¹⁵ Ne zutun duen selakew he velinsug̵uen he migawas dutun te simbahan diyà te langit. Mibpekezag̵ing sikandin is egkag̵i ziyà te ebpimpinuu ziyà te g̵apun, ke sikandin te, “Gemita nu en is garab nu su iyan en heini timpu te kegarab su is kelibutan, iring te kamet he nelutuan en is pinemula zuen!”

¹⁶ Ne zutun, haazà is ebpimpinuu zutun te g̵apun, migamit din haazà is garab din, ne midrag̵un ziyà te kelibutan.

¹⁷ Ne zutun neehè ku is selakew en maan he velinsug̵uen he migawas dutun te simbahan he ziyà te langit ne zuen daan kandin he egewezan he meg̵arang he g̵arab.

¹⁸ Ne ziyà te pemuhatà he ziyà te simbahan, migawas is selakew pa he velinsug̵uen. Iyan sikandin belinsug̵uen he impevantey te hapuy zutun. Ne mibpekezag̵ing sikandin is egkag̵i ziyà te nesunuzan din he velinsug̵uen he zuen din meg̵arang he g̵arab. Ke sikandin te, “Gemita nu en heeyan is garab nu ne reg̵una nu is menge paras diyà te pemuleey he iyan is kelibutan su nengelutuan en is menge paras dutun.”

¹⁹ Ne zutun migamit haazà is belinsug̵uen te g̵arab din dini te lumpad te kelibutan ne midrag̵un din is menge paras, he ke và dà egkeg̵iya, iyan is langun he menge etew he kuntada te Megbevayà. Ne is nerag̵un din, in-ahuk din diyà te zekelà he vudsi he zutun egkeresa is beg̵as te paras. Ne is kehulug̵an dutun te vudsi ne iyan is pauk te Megbevayà diyà te menge kuntada zin.

²⁰ Ne migunas haazà is beg̵as te paras dutun te vudsi he g̵awas te inged ne ebpuun dutun te vudsi midtudà is lengesa taman te tetelu he g̵atus wey keluwaan he kilumitru is netudaan ne sengemitrus wey tengà is kezalem din.