Impezayag 13 - Manobo Western Bukidnon

Sikan is Mekahandekhandek he Langgam he Ebpuun Diyà te Zag̵at

¹ Ne zutun neehè ku is mekehandekhandek he langgam he egaun puun diyà te zag̵at. Sepulù is sungey zin wey pitu is ulu zin. Ne zuen kuruna he insuup diyà te kada sevaha he menge sungey zin, ne ziyà te kada ulu zin ne zuen insurat he ngazan he idsupak din te Megbevayà.

² Ne haazà is langgam he neehè ku, ne iring te liyupardu; ne is menge paa zin ne iring te paa te biyir, ne is bèbè din ne iring te vèbè te erimaung. Ne is gehem te deragun wey is kebpekehadì din, wey is keg̵ehem din te kebayàbayà, ne imbeg̵ey zin dutun te langgam.

³ Nepelian is sevaha he ulu zutun te langgam ne henduen be te midhimetayan dengan haazà is ulu, iyan, neulian en haazà is gerabi he palì dutun ne uuyag en maan haazà is ulu. Ne tenged dutun is tivuuk he menusiyà, midsundanan dan haazà is langgam su utew zan ingkeinuinu.

⁴ Ne is tivuuk he menusiyà, ed-ezapen dan haazà is deragun tenged te kebeg̵aya zin te keg̵ehem din dutun te langgam he utew mekehandekhandek. Ne mid-azap dan daan haazà is langgam, ne ke sikandan te, “Wazà ebpekelavew te langgam; ne wazà daan ebpekesukul kandin.”

⁵ Ne mibpesagdan te Megbevayà haazà is langgam he mekekag̵i sikandin te utew memezaat he ibpegalbu he menge lalag he ebpekesumpalit te Megbevayà. Ne midtug̵utan daan sikandin he mekevayàbayà seled te kepatan wey zezuwa he vulan.

⁶ Ne ebpengeg̵iyen din is menge lalag he utew memezaat he idsumpalit din te Megbevayà wey ebpekesupak te ed-ubpaan te Megbevayà diyà te langit wey ebpekesupak daan te menge meg̵inged diyà te langit.

⁷ Ne midtug̵utan daan haazà is langgam he tebeka zin is menge etew he g̵aked te Megbevayà ne nezaag din dè pa sikandan. Ne imbeg̵ey kandin is kebayàbayà diyà te minsan hengkey he tribu wey minsan hengkey he kepuun, wey menge etew he minsan hengkey is kineg̵iyan dan, wey is minsan hengkey he g̵inhedian.

⁸ Ed-ezapen haazà is langgam te langun he menge etew zini te kelibutan he wazà ikesurat is ngazan dan diyà te libru he zutun ilista is menge etew he ebeg̵ayan te untung. Iyan haazà kes libru zuen te nati he kerehidu he zengan dà imbanglis is kebpehimatey zin te wazè pa tukuza is kelibutan.

⁹ Is minsan hentei keniyu, mebpemineg kayi!

¹⁰ Is menge etew he imbanglis kandan is kebpirisuwa kandan ne siguradu egkepirisu sikandan. Ne is menge etew he imbanglis kandan he g̵umaan is idhimatey kandan, gumaan iyan is idhimatey kandan. Kinahanglan he sikitew is menge tumutuu te Nengazen, edsarig kiw kandin wey ed-antus kiw te kemereg̵enan.

Sikan is Mekahandekhandek he Langgam he Ebpuun Diyà te Tanà

¹¹ Ne zutun selakew en maan he langgam is neehè ku. Midlepew haazà he ebpuun diyà te zizalem te tanà. Dezuwa is sungey zin su iring te nati he kerehidu, iyan, emun egkag̵i, ne is kegkag̵i zin ne iring te kegkag̵i zuen te utew zekelà he uled he egngezanan te deragun.

¹² Ne haazà he langgam, iyan kes ebpeneuven ni Setanas ne migamit din is gehem duen te nehuna he langgam he iyan midsug̵ù kandin. Ne mibpeg̵es din is tivuuk he menusiyà he ezapa zan sikan is nehuna he langgam he neulian duen te palì din he hapit din ibpatey.

¹³ Utew zekelà is menge egkein-inuwan he mibeelan dutun te langgam he ikezuwa su minsan hapuy he ebpuun te langit, impepenaug din wey maahà te menge etew.

¹⁴ Ne pinaag̵i te menge egkein-inuwan he intug̵ut kandin he ibpeulaula ziyà te etuvangan dutun te nehuna he langgam, ed-ekalan din is tivuuk he menusiyà dini te kelibutan. Ne zutun edsug̵uen din is menge etew he veeli zan is ledawan dutun te nehuna he langgam ne ezapa zan. Haazà is nehuna he langgam, midtibas duen te sundang, iyan, wazà mebpatey.

¹⁵ Ne intug̵ut daan he mehimu zutun te ikezuwa he langgam he mekeg̵eg̵ehinawa haazà is ledawan dutun te nehuna he langgam ne tenged dutun ebpekekag̵i haazà is ledawan ne egkepatey zin daan is minsan hentei he kenà ed-azap kandin.

¹⁶ Ne is langun he menge etew, lavew se kenà lavew, sepian se kenà sepian, uripen se kenà uripen, mibpeg̵es din sikandan merkahi ziyà te kewanan he velad dan ne emun kenà ne ziyà te vuked dan.

¹⁷ Ne is minsan hentei he kenà ebpemarka zutun te marka he iyan ngazan dutun te nehuna he langgam wey lumiru te ngazan din, kenè dan ebpekepemasa ne kenè dan daan ebpekepemelegyà.

¹⁸ Iyan dà ebpekesavut dutun is etew he mibeg̵ayan te Megbevayà te ketau. Sikan is uluwanen, egkesavut din is kehulug̵an dutun te lumiru te langgam su lumiru haazà te menusiyà. Ne haazà is lumiru, ne heenem he g̵atus wey keneman wey heenem.