Impezayag 12 - Manobo Western Bukidnon

Is Bahi wey Sikan is Deragun

¹ Ne zutun neehè ku ziyà te langit is kebpeelunga te egkeulaula. Neehè ku is bahi he midsun-uzan te andew ne ziyà te zizalem te paa zin is bulan, ne insuup diyà te ulu zin is kuruna he sepulù wey zezuwa he vituen.

² Meg̵ingey sikandin ne ed-anak en ne ebpekeerang su ebeliliten.

³ Ne zutun duen pa impaahà kedì diyà te langit he kebpeelunga te egkeulaula. Duen utew zekelà he merig̵à he uled he egngezanan te deragun he iyan si Setanas. Pitu is ulu zin ne sepulù is sungey zin. Ne zuen kuruna ziyà te kada sevaha zutun te pitu he ulu zin.

⁴ Ne pinaag̵i te ikug din neg̵uyud din is iketelu he vahin te menge vituen diyà te langit ne nemeketimbag haazà diyà te tanà. Ne zutun edhithitindeg haazà is uled te etuvangan dutun te vahi he ed-anak su emun idlusad en haazà is id-anak din, ne egkeenen dutun te uled.

⁵ Ne zutun inlusad is batà he maama. Ne haazà is batà, edhedian din keuzemà is langun he menge g̵inhedian dini te kelibutan ne wazà ebpekesukul kandin dutun te kedhadì din. Ne haazà is batà, midsekelew te Megbevayà ne mibatun din diyà te langit, diyà te pinuuwà te kedhadì din.

⁶ Ne haazà is bahi, nekepelag̵uy pehendiyà te tanà he kenà ed-ubpaan te etew, diyà te ed-eputan he mid-andam he zaan te Megbevayà. Ne zutun ed-elimahan te Megbevayà haazà is bahi seled te nengkelibu wey zezuwa he g̵atus wey keneman he andew he repeng te tetelu wey liwazà he tuig.

⁷ Ne zutun he timpu zuen gira ziyà te ed-ubpaan te Megbevayà diyà te langit. Si Miguel, is sevaha he velinsug̵uen te Megbevayà wey is menge sakup din he velinsug̵uen, edtebeken dan sikan is dekelà he uled he egngezanan te deragun. Ne haazà is uled wey is menge velinsug̵uen din, mibpekidtebek dan daan,

⁸ iyan, nezaag haazà is uled ne sikandin wey is menge velinsug̵uen din, wazè en tug̵uti te Megbevayà he mekeseled dan pa maan diyà te langit, umba,

⁹ midsegseg haazà is dekelà he uled puun te langit. Ne haazà he deragun, iyan si Setanas, sikan is mezaat he mulin-ulin he mid-ekalan din is tivuuk he menusiyà. Ne sikandin wey is langun he menge velinsug̵uen din, intimbag sikandan pehendini te tanà.

¹⁰ Ne zutun, nezineg ku is utew mezag̵ing he egkag̵i ziyà te langit he edhenduen te, “Guntaan egketuman en is kedlibriya te Megbevayà te menusiyà. Impeehè en te Megbevayà is keg̵ehem din te kedhadì. Is hadì he mibpilì te Megbevayà, impeehè din en is ketenged din te kedhadì. Su midsegseg en pehendiyà te tanà si Setanas, is edsumbung te menge suled tew. Iyan sikandin midsumbung kandan diyà te Megbevayà tew te maandew wey te mezukilem.

¹¹ Heini is menge suled tew, nezaag dan en si Setanas tenged te kedtig̵is te lengesa te migeraran he impemuhat he nati he kerehidu, wey tenged te insangyew zan is tutuu he tuluuwen, wey tenged daan te wazè dan iyan menug̵uni is untung dan, kekenà, mibpehimatey zan tenged te kedtuu zan.

¹² Sikiyu is menge meg̵inged diyà te langit, medlipey kew. Iyan, sikiyu is diyan te tanà wey ziyan te zag̵at, kehizu niw! Su kes mezaat he mulin-ulin he si Setanas, mibpenaug en diyan te keniyu. Ne utew sikandin nererengiti su netuenan din he mevavè dà utew is nesamè din he timpu te kedlalunglalung.”

¹³ Ne hein netuenan dutun te deragun he zini sikandin itimbag te tanà, midtelukunan din sikan is bahi he iney zuen te vatà he maama.

¹⁴ Ne haazà is bahi, mibeg̵ayan te Megbevayà te zezuwa he pakpak te zekelà he vanug su wey mekelayang wey mekeaput diyà te tanà he kenà ed-ubpaan te etew, ne zutun ed-elimahan sikandin seled te tetelu wey liwazà he tuig ne zutun kenè en egkekeizan dutun te uled.

¹⁵ Ne zutun, haazà is uled, impelepew zin diyà te vèbè din is dekelà he wahig su wey maanud haazà is bahi,

¹⁶ iyan, midtevangan te tanà haazà is bahi ne mibeka is tanà ne nehimu is dekelà he vitu ne zutun mekeahuk haazà is wahig he ebpuun dutun te vèbè te uled he deragun.

¹⁷ Ne zutun utew nepeuki te deragun haazà is bahi, ne mibeyaan din is menge zuma he anak dutun te vahi su edtebeken din sikandan. Iyan sikandan is langun he metinumanen te menge sug̵ù te Megbevayà wey metinumanen daan te tutuu he tuluuwen he impenurù ni Jesus.

¹⁸ Ne zutun diyà mekehitindeg haazà is deragun te veyvey te zag̵at.