Impezayag 11 - Manobo Western Bukidnon

Is Dezuwa he Menwewali

¹ Ne zutun, imbeg̵ey kedì is idsukud he iring te tuked, ne zuen migkag̵i kediey te, “Hendiyè ka ne sukuza nu is simbahan he Valey te Megbevayà wey is bangkù he pemuhatà dutun, ne vilanga nu is menge etew he edsimba zutun.

² Iyan, is lama he ziyà te g̵awas te valey, kenè nu sukuza su imbeg̵ey haazà diyà te menge etew he kenà menge Hudiyu. Ne edtekutakan dan is inged he Hiruselim he zutun edsimbaha is Megbevayà. Ne seled te kepatan wey zezuwa he vulan is kedtekutaki zan dutun.

³ Ne edsug̵uen ku zutun is dezuwa he ibpewali ku. Egkukumbalà sikandan te manggad he saku ne ebpenudtulen dan is ibpekag̵i kandan te Megbevayà seled te nengkelibu wey zezuwa he g̵atus wey keneman he andew.”

⁴ Ne haazà is dezuwa he etew he menwewali, iyan sikan is netagnà dengan he zezuwa he etew he iring te zezuwa he kayu he ulivu wey zezuwa he sulù he ziyà mekesavuk te etuvangan te Nengazen he ebayàbayà te tivuuk he kelibutan.

⁵ Ne heini is dezuwa, ke zuen ebpesipala kandan, diyà te vèbè dan edlepew is hapuy ne egkeamin egketutung is menge kuntada zan. Ne pinaag̵i kayi edhimetayan dan is minsan hentei he egezam kandan ebpesipala.

⁶ Ebeg̵ayan sikandan te g̵ehem su wey zan kenà ikepevayà is menge g̵apun su wey kenà ebpekeuzan dutun te timpu te kebpenudtula zan te Lalag te Megbevayà. Ne zuen daan gehem dan wey zan mehimu he lengesa is wahig diyà te menge kalut. Ne zuen daan gehem dan wey zan mesiluti is menge etew pinaag̵i te minsan hengkey he vangkit te minsan keenu he timpu he egkesuatan dan.

⁷ Ne heini is dezuwa he menwewali, emun egketapus dan is kebpenudtula zan te Lalag te Megbevayà, edtebeken sikandan te langgam he ziyà ebpuun te vitu he wazà pidtemanan is kezalem din. Ne egkezaag sikandan dutun te langgam, ne edhimetayan din sikandan.

⁸ Ne ziyà ibperey-as haazà is lawa zan te kersada ziyà te zekelà he inged he zutun iransang te krus is Nengazen dan. Ne zuen insempità he menge ngazan dutun te inged, ne iyan is Suduma wey Ihiptu.

⁹ Is langun he kelasi te menge etew te minsan hengkey he kineg̵iyan wey kepuun wey g̵inhedian, ne ed-ehaan dan is menge lawa zutun te zezuwa seled te tetelu wey liwazà he andew ne kenè dan idtug̵ut he ikeleveng haazà is dezuwa.

¹⁰ Utew igkelipey te menge etew is kedhimetayi zutun ne edsilibrahan dan ne ebpevegbeg̵ayà is kada sevaha kandan te menge g̵asa. Umba edsilibrahan dan su haazà is dezuwa he ebpeneuven te Megbevayà, mibeelan dan is ingkengerasey te menge etew ziyà te kelibutan.

¹¹ Ne zutun hein neipus haazà is tetelu wey liwazà he andew, haazà is dezuwa he menwewali, mibeg̵ayan sikandan te Megbevayà te g̵ehinawa ne nevanhew ne midhitindeg dan. Ne utew nengehandek is langun he nekeahà dutun.

¹² Ne zutun nezineg dutun te zezuwa he menwewali is mezag̵ing he egkag̵i ziyà te langit he edhenduen te, “Hendini kew en te langit.” Ne zutun mibatun sikandan pehendiyà te langit he nevukusan sikandan te g̵apun. Ne nengeahà haazà te menge kuntada zan dutun.

¹³ Ne segugunà midlinug te utew mezesen. Ne nengerundus is ikesepulù he vahin te menge valey zutun te inged. Ne neg̵erà zutun te linug is pitu he libu he menge etew. Ne utew nengehandek dutun is menge etew he naawas dutun te linug ne midalig dan is mekeg̵eg̵ehem he Megbevayà he ziyà te langit.

¹⁴ Ne zutun neipus haazà is ikezuwa he mekehandekhandek he hitavù, iyan, meg̵aan ebpekesunud dutun is iketelu.

Is Ikepitu he Vudyung

¹⁵ Ne zutun midhiyup te ikepitu he velinsug̵uen is budyung din ne ziyà te langit nezineg is memezag̵ing he lag̵eng he edhenduen te, “Is kedhedii te tivuuk he menusiyà, ne ziyè en guntaan te Nengazen tew wey ziyà te hadì he mibpilì din. Ne heini he hadì, ebpekehadì sikandin te wazà pidtemanan.”

¹⁶ Ne zutun, haazà is keluwaan wey heepat he menge ebmeg̵urangen he ebpimpinuu zutun te etuvangan te Megbevayà, mibpemenlangkeb sikandan ne mid-azap dan is Megbevayà,

¹⁷ ne ke sikandan te, “Sikew is Megbevayè dey wey Nengazen dey, iyan ka ebayàbayà te langun. Megbevayè ka zengan wey g̵untaan. Ebpeselematan dey sikew su migamit nu is dekelà he g̵ehem nu ne g̵untaan mibpuunan nu en is kedhadì nu ziyà te kelibutan.

¹⁸ Utew nengepauk kenikew is menge kuntada nu, iyan, netuman en is andew te kedsiluti nu kandan wey is andew te kedsusiya nu te nengeulaula te nemematey en. Iyan en heini timpu te kedsuhuli nu te menge sulug̵uen nu he menge ebpeneuven wey kedsuhuli nu zaan te langun he menge g̵aked nu he etew, se zekelà is pid-etawan din, se zeisek is pid-etawan din, is langun he edtahud kenikew. Iyan heini zaan timpu te kedèdeeti nu te langun he menge etew he midezaat te kelibutan!”

¹⁹ Ne ziyà te langit mibpuwasan is simbahan he Valey te Megbevayà ne naahà dutun te seled is kavan he midteg̵uan duen te insurat he menge pesarig te Megbevayà. Ne zutun neserasab is kilat, ne zuen utew memezag̵ing, ne mibpemeransì, ne midlinug, ne mibpenggiyew te utew zezekelà.