Impezayag 1 - Manobo Western Bukidnon

¹ Iyan heini kedtudtula te impezayag ni Jesu Kristu. Insarig heini kandin te Megbevayà wey zin daan ikepesavut diyà te menge sulug̵uen te Megbevayà ke hengkey is meg̵aan en he egkengeulaula. Impesavut heini ni Kristu pinaag̵i te kedsug̵ua zin te velinsug̵uen din diyà te kediey te sulug̵uen din he si Juan.

² Ne siak, id-amin ku idsurat is langun he neehè ku. Is migkag̵i te Megbevayà wey is tutuu he tuluuwen he impesavut kediey ni Jesu Kristu, idsurat ku kayi.

³ Edtuvazan te Megbevayà is ebasa kayi te libru wey edtuvazan din daan is ebpemineg te kebesaha kayi ne edtuman te insug̵ù kayi. Su utew en meg̵aan is kegketuman te langun kayi te netagnà.

^4-5 Siak si Juan, ne ebpesuratan ku is pitu he gurupu te menge tumutuu he ziyà te prubinsya he Asya. Ibpengumew-umew ku he ikeg̵ag̵ew kew te Megbevayà, wey te Wag̵as he Mulin-ulin, wey ni Jesu Kristu, ne iveg̵ey zan daan keniyu is melinawen he kebpekesavuk. Is Megbevayà, daan en sikandin te wazè pa limbag̵a is minsan hengkey; kemulu pa sikandin guntaan wey kenà sikandin egkehanew te wazà pidtemanan. Is Wag̵as he Mulin-ulin he ziyà ed-ubpà te etuvangan te pinuuwà te Megbevayà, ne pitu is gehem din. Si Jesu Kristu, iyan egkeserig̵an is lalag din. Iyan sikandin kes nehuna he zuen din beg̵u en he untung pinaag̵i te kegkevenhawa kandin. Iyan sikandin ebayàbayà te menge hadì dini te kelibutan. Dekelà is gehinawa zin kenitew. Midlibri kiw zin te silut te menge salè tew pinaag̵i te kebpaag̵as din te lengesa zin.

⁶ Midhimu zin he iyan kiw edhedian din wey iyan kiw memumuhat he iyan kebpemuhat tew is ked-ezapa tew te Megbevayà he Amey zin. Tehuza sikandin wey medhadì sikandin te wazà pidtemanan!

⁷ Ebpekeuma si Jesu Kristu he ziyà egkeahà te menge g̵apun. Egkeahà sikandin te tivuuk he menusiyà ragkes is menge etew he mibpilak kandin dengan. Ne is langun he kelasi te menusiyà dini te kelibutan, ebpekesineg̵ew zan tenged kandin su egkehandek dan te silut. Metuman heini is langun.

⁸ Is Nengazen tew he Megbevayà he mekeg̵eg̵ehem he zaan en te wazè pa limbag̵a is minsan hengkey, iyan ded sikandin guntaan wey minsan keuzemà te wazà pidtemanan. Ke sikandin te, “Iyan a sikan is alpa wey umiga, he ke và dà egkeg̵iya, kes puunà wey egkepengkusan te minsan hengkey.”

Is Nelewasan ni Juan

⁹ Iyan a si Juan is sevaha he suled niw tenged te kedtuu ku ki Jesus. Iring keniyu nekeantus a zaan te menge kemeresayan su sakup a zaan te g̵inhedian din. Tenged te ingkepauk te gubirnu is kebpenudtul ku te Lalag te Megbevayà wey is kebpenurù ku te impesavut ni Jesus, impesivey a ne ziyà a ibpeubpà te sengepupulu he egngezanan te Patmus.

¹⁰ Ne zutun te sevaha he andew he Duminggu, utew mezesen is ked-uwita kedì te Wag̵as he Mulin-ulin ne zuen impeehè din kedì. Diyà te egkeiniyug̵an ku nezineg ku is egkag̵i he iring te vudyung su utew mezag̵ing,

¹¹ ne ke sikandin te, “Is egkeehè nu, isurat nu ne ibpeuwit nu ziyà te pitu he menge gurupu te menge tumutuu he ziyà te menge inged he Ipisu, Ismirna, Pirgemu, Tiyetira, Sardis, Piledilpya, wey ziyà daan te inged he Leudisiya.”

¹² Ne midlilingey ku wey ku maahà ke hentei is egkag̵i ne neehè ku is pitu he sulù he vulawan.

¹³ Ne ziyà te teliwazà dutun te menge sulù, duen neehè ku he henduen be te etew. Melug̵ayad is kumbalè din ne mibevanda te vulawan.

¹⁴ Is ulu zin wey vulvul zin, ne utew meputì su iring te manggad he meputì. Is mata zin, ne henduen be te egkeregreg.

¹⁵ Ne is menge paa zin, ne henduen be te g̵alang he midlangga he midlimbasan. Ne is lag̵eng din, ne henduen be te zeg̵urus te utew mezakel he menge wahig.

¹⁶ Ne ziyà te kewanan din migewezan din is pitu he vituen. Ne edlepew ziyà te vèbè din is sundang he zezuwa is gerangan din he utew meg̵arang. Ne is buked din, henduen te edsig̵a he andew he utew merayag.

¹⁷ Ne hein neehè ku sikandin, nekelangkeb a ziyà te etuvangan din ne henduen a te minatey. Ne indampè din kediey is kewanan he palad din ne ke sikandin te, “Kenè ka mahandek su iyan a sikan is puunà wey kes egkepengkusan te langun.

¹⁸ Iyan a kes Megbevayà he wazè din kemetayen. Mibpehimatey a ne g̵untaan kenà ad maan ebpatey te minsan keenu. Iyan a ebayàbayà te menge minatey, ne zuen ku zaan keg̵ehem diyà te Iveyaan.

¹⁹ Isurat nu is ibpeehè ku kenikew, is egkeehè nu he egkeulaula g̵untaan wey is egkeulaula pa keuzemà.

²⁰ Ibpesavut ku kenikew is in-eles dengan he kehulug̵an kayi te pitu he vituen he neehè nu he egewezan ku te kewanan he velad ku wey is kehulug̵an kayi te pitu he sulù he vulawan. Is pitu he vituen, iyan alung te pitu he velinsug̵uen te Megbevayà he ebantey te pitu he gurupu te menge tumutuu. Ne heini is pitu he sulù, ne iyan sikan is pitu he gurupu te menge tumutuu.”