Gelasya 3 - Manobo Western Bukidnon

Is Kedtuu wey Sikan is Kesug̵uan

¹ Sikiyu is menge tigGelasya, henduen be te kenè kew metau he ed-isip-isip! Utew a egkeinuinu keniyu! Maan is ebpemineg̵en niw is menge etew he ebpetuman keniyu te kesug̵uan he imbilinbilin ni Moises? Utew keladu is kebpenurua ku keniyu te nehimu ni Jesu Kristu kenitew pinaag̵i te kebpatey zin diyà te krus.

² Duen id-insè ku keniyu. Hengkey is paag̵i te kegkezewata niw te Wag̵as he Mulin-ulin? Nezawat niw ve is Wag̵as he Mulin-ulin tenged te kedtumana niw te kesug̵uan he imbilinbilin ni Moises? Wazà, su netuenan niw he imbeg̵ey keniyu te Megbevayà is Wag̵as he Mulin-ulin tenged dà te nezineg niw ne midtuuwan niw is tudtul mehitenged te nehimu ni Jesus.

³ Menge tulebung kew ves! Dutun te aney niw en kedsundan ki Jesus, midserig̵an niw is kedtavang te Wag̵as he Mulin-ulin, iyan, guntaan, kunaan niw vuwa ke egkepurungan is kedsundan niw pinaag̵i te keniyu za he ketau!

⁴ Wazè bes pulus te menge meupiya he tuvad keniyu tenged te kebpeketuu niw! Kenà egkehimu he wazà pulus.

⁵ Is Megbevayà, hein imbeg̵ey zin keniyu is Wag̵as he Mulin-ulin ne impeehè din diyan te keniyu is menge egkein-inuwan, wazè din iyan iveeli zutun is tenged te edtumanen niw is kesug̵uan, kekenà, tenged dà te nezineg niw ne midtuuwan niw is Meupiya he Tudtulanen.

⁶ Iring din ded daan is nehitavù ki Abraham he kepuun tew zengan su zuen insurat he Lalag te Megbevayà he edhenduen te, “Midtuu sikandin te migkag̵i te Megbevayà ne tenged kayi, is Megbevayà, midawat din si Abraham ne mid-isip din sikandin he metazeng.”

⁷ Ne sikiyu zaan, kinahanglan he sevuta niw he iyan ded heini g̵untaan kayi te kenitew su ke zuen etew he edtuu te Lalag te Megbevayà ne nehimu en sikandin he kevuwazan ni Abraham, he ke và dà egkeg̵iya, egkezawat din is impenaad te Megbevayà diyà te ki Abraham.

⁸ Daan he migkag̵i is Megbevayà diyà te insurat he lalag din he minsan is menge etew he kenà menge Hudiyu, ne ed-isipen din sikandan he metazeng emun edtuuwan dan sikandin. Impesavut din he zaan ki Abraham is Meupiya he Tudtulanen, ke sikandin te, “Tenged te midtuu ka te migkag̵i ku, midtuvazan ku sikew. Ne pinaag̵i zaan kayi te kedtuu nu edtuvazan ku is tivuuk he menusiyà dini te kelibutan.”

⁹ Ne midtuu si Abraham dutun te Lalag te Megbevayà, ne tenged dutun midtuvazan sikandin te Megbevayà; ne iring din ded daan ke edtuu is minsan hentei te Lalag te Megbevayà, edtuvazan daan sikandin te Megbevayà.

¹⁰ Iyan, is minsan hentei mulà he edsarig te kedtumana te kesug̵uan he imbilinbilin ni Moises, nesug̵at en te rawak te Megbevayà su zuen insurat he Lalag te Megvevayà he edhenduen te, “Is minsan hentei he kenà din egkepurung egketuman is minsan hengkey he sug̵ù he insurat dutun te kesug̵uan, ne nesug̵at en sikandin te rawak te Megbevayà.”

¹¹ Ne emun iyan haazà, ne egkesavut ta he wazà minsan hentei he metazeng is ked-isipa kandin te Megbevayà pinaag̵i te kedtumana te kesug̵uan su zuen insurat he Lalag te Megbevayà he edhenduen te, “Is minsan hentei he metazeng is ked-isipa kandin te Megbevayà pinaag̵i te kedtuu zin te Lalag te Megbevayà, iyan sikandin ebeg̵ayan te untung he wazè din pidtemanan,” ke sikandin.

¹² Iyan, ke zuen etew he egkepurung din egketuman is langun he sug̵ù dutun te kesug̵uan, kenè en kinahanglan he edtuu pa sikandin wey meveg̵ayi te untung he wazè din pidtemanan, su zuen insurat he Lalag te Megbevayà he edhenduen te, “Is etew he egkepurung din egketuman is langun he sug̵ù dutun te kesug̵uan, ebeg̵ayan sikandin te untung he wazè din pidtemanan.”

¹³ Minsan pa te nesupak te en is kesug̵uan, nelibri ki ni Jesus te silut su midrewakan en si Jesus he elili kenitew zutun te kedrensanga kandin te krus, su zuen insurat he Lalag te Megbevayà he edhenduen te, “Ke zuen etew he edhimetayan ne idtaud te impasek he kayu ne tuus heini te rawak kandin te Megbevayà.”

¹⁴ Ne umba mibpehimatey si Jesu Kristu te iring dutun su wey pinaag̵i kandin ikeveg̵ey zaan diyà te menge etew he kenà menge Hudiyu is ketazeng he intuvad te Megbevayà ki Abraham. Ne pinaag̵i zutun sikitew is langun he edtuu ki Jesus, ebeg̵ayan kiw zin te Wag̵as he Mulin-ulin he impenaad dengan te Megbevayà.

Is Saad te Megbevayà wey is Kesug̵uan

¹⁵ Menge suled, duen penenglitan he ibpesavut ku keniyu. Su ke zuen ibpenaad te sevaha he etew he insurat diyà te dukumintu he mibpirmahan din ne mibpirmahan daan te menge tistig̵us, ne kenà egkehimu he edhelinan wey ed-umanan haazà te minsan hentei su nelig-enan.

¹⁶ Ne iring din ded daan su zuen impenaad te Megbevayà diyà te ki Abraham wey ziyà te kevuwazan ni Abraham he egkeug̵et pa zutun id-anak. Wazè din iyan keg̵iya he zuen penaad din diyà te menge kevuwazan ni Abraham su kenà mezakel is egkeg̵iyen din, kekenà, ke sikandin diyà te ki Abraham te, “diyà te kevuwazan nu.” Umba migkag̵i zin heini su sebsevaha zà he etew zutun te kevuwazan ni Abraham is ibpesavut din he iyan si Kristu.

¹⁷ Iyan ibpesavut ku kayi is: duen untung he wazè pidtemanan he impenaad te Megbevayà ki Abraham he kenà duwazuwa he edtumanen din su midlig-enan din. Daan en heini is penaad te wazè pa is kesug̵uan he imbilinbilin ni Moises su neug̵et pa zutun si Moises su menge heepat pa he g̵atus wey ketluan he tuig. Ne kenà egkehimu he egkeawà is penaad te Megbevayà pinaag̵i te kesug̵uan he imbilinbilin ni Moises. Kenà egkehimu he kenè edtumanen te Megbevayà is penaad din.

¹⁸ Si Abraham, imbeg̵ey kandin te Megbevayà is untung he wazà pidtemanan tenged dà te impenaad heini kandin te Megbevayà. Iyan, emun egkehimu he ibeg̵ey kenita is untung pinaag̵i te kedtumana ta te kesug̵uan, kenà daan egkehimu he ibeg̵ey heini kenita tenged dà te impenaad heini te Megbevayà.

¹⁹ Ne emun iyan heini, ne hengkey is pulus te kesug̵uan? Ibpesavut ku keniyu is pulus din. In-uman te Megbevayà is kesug̵uan su wey zin ipesavut kenita ke hengkey is mezaat he ulaula ta; ne egkesuatan din he zutun dà taman is kedserig̵i te kesug̵uan te kebpekeuma te kevuwazan ni Abraham he iyan si Kristu he iyan mibpenaazan te Megbevayà. Midsug̵ù te Megbevayà is menge velinsug̵uen din he ebpuun diyà te langit wey zan ikeveg̵ey is kesug̵uan diyà te ki Moises. Ne si Moises, nehimu sikandin he zatù te pid-elangan su imbeg̵ey zin daan is kesug̵uan diyà te menge etew.

²⁰ Iyan, dutun te kebpenaazi te Megbevayà ki Abraham wazà kinahanglan he zuen datù te pid-elangan su sebsevaha zà dutun is nekepenaad he iyan is Megbevayà.

²¹ Ne kunaan niw vuwa ke kenà egkeuyun is kesug̵uan wey is menge penaad dengan te Megbevayà, iyan, kenà egkehimu he kenà heini egkeuyun. Su ke zuen kesug̵uan he pinaag̵i kayi egkeveg̵ayan kiw te untung he wazè din pidtemanan ne siguradu egkehimu kiw he metazeng pinaag̵i zaan kayi te kesug̵uan.

²² Iyan, impesavut kenitew te insurat he Lalag te Megbevayà he sikitew is tivuuk he menusiyà, sakup kiw en pudu te mezaat he kebayè tew. Ne tenged kayi, wey zà edtumana te Megbevayà is menge penaad din kenita ke edsarig kiw kandin. Wey kiw zà egkeveg̵ayi te untung he wazà pidtemanan ke zuen tew kedtuu.

²³ Ne te wazè pa ipezayag kenitew he egkekuwa tew is untung pinaag̵i te kedtuu ki Jesus, iring te nepirisu kiw te kesug̵uan. Nehimu is kesug̵uan he iring te guwardya he ebantey kenitew wey kiw kenà mekeawà taman te kenè pa ibpezayag kenitew is paag̵i he iyan is kedtuuwi ki Jesu Kristu.

²⁴ Nehimu zaan is kesug̵uan he iring te ed-uyamu he iyan ebayàbayà kenitew te iring te menge vatà taman dà te kebpekeuma ni Kristu su wey, ke ebpekeuma si Kristu, meisip kiw te Megbevayà he metazeng pinaag̵i te kedtuu tew kandin.

²⁵ Ne g̵untaan, te impezayag en kenitew is paag̵i he iyan is kedtuu, kenè kiw en egkeveyveyaan te kesug̵uan.

Is Menge Anak te Megbevayà

²⁶ Ne g̵eina te iyan haazà, nehimu kew en pudu he menge anak te Megbevayà tenged dà te kedtuu niw ki Jesu Kristu.

²⁷ Su midtuuwan niw si Jesu Kristu, ne nebewtismuwan kew he tuus te sumusundan kew zin, ne tenged dutun insun-ud niw si Kristu, he ke và dà egkeg̵iya, neiringan niw is menge ulaula ni Kristu.

²⁸ Ne tenged dutun kinahanglan he kenè niw isipa he ibpelavi te Megbevayà is menge Hudiyu, ne emun kenà, ne iyan is kenà menge Hudiyu, su ziyà te kandin neked-iiring is langun he menge etew, uripen se kenà uripen, maama se vahi, ne sikiyu zaan, neked-iiring kew ziyà te Megbevayà su neked-iiring kew he edtuu ki Jesu Kristu.

²⁹ Ne g̵eina te sakup kew ni Kristu, nehimu kew en he iring te menge kevuwazan ni Abraham ne egkezawat niw zaan is impenaad te Megbevayà ki Abraham.