Gelasya 2 - Manobo Western Bukidnon

Is Ked-uyun ni Pablo wey te Zuma he Menge Epustul

¹ Ne sepulù wey heepat pa he tuig dutun ne human a medlikù diyà te Hiruselim. Mibpezumehè key ki Bernabe ne miduma ku zaan si Tito.

² Umba midhendiyà a su impinted kedì te Megbevayà haazà is kedhendiyè ku. Ne kebpekeuma zey zutun ne midtig̵um is menge egalen te menge tumutuu he iyan dan dà ne impesavut ku kandan ke hengkey is Meupiya he Tudtulanen he ibpenurù ku ziyà te menge etew he kenà menge Hudiyu. Egkesuatan ku zutun he kenà maawà is pulus te nengeveelan ku en wey is kemulu ku pa ebeeli.

³ Iyan, nesuatan dan ded is baal ku su si Tito, is duma ku, minsan te kenà sikandin Hudiyu, wazè dan iteg̵el is kedsirkunsidar kandin sumalà is insug̵ù ni Moises.

⁴ Iyan, duen menge etew he kenà tutuu he menge tumutuu te tutuu he tuluuwen he midtampu kenami. Egkesuatan dan dutun he sirkunsidara si Tito. Umba midtampu zan he id-eles dan he kenè dan tutuu he tumutuu su wey zan maahà ke edtumanen tew is menge sug̵ù he imbilinbilin ni Moises. Su egkesuatan dan he meiring kiw te uripen pinaag̵i te kedtuman te kesug̵uan minsan te nelibri kiw en ni Jesu Kristu ne wazè en kinahanglan he ebenteyanan tew pa is kesug̵uan.

⁵ Ne wazè dey itug̵ut he meveyveyai key zan te minsan hengkey he paag̵i su wey kenà meumani te tarù is tutuu he Meupiya he Tudtulanen, ne kenà egkezeetan is kedtuu niw.

^6-7 Ne zutun, minsan sikan is menge etew ziyà te Hiruselim he henduen be te menge egalen te tumutuu, wazè dan ingkepenurù kediey he idheg̵et te ibpenurù ku. Umba egkeg̵iyen ku he henduen dan te menge egalen su wazà bali ziyà te Megbevayà te igerar kenita te menge etew. Wazà id-uman dan te kediey he ibpenurù, kekenà, nesavut dan dutun he insarig kediey te Megbevayà is kedsengyawa te Meupiya he Tudtulanen diyà te menge etew he kenà Hudiyu iring te insarig din daan ki Pedro is kedsengyawa kayi ziyà te menge Hudiyu.

⁸ Su is Megbevayà, mid-ulinan din si Pedro wey mehimu sikandin he epustul he iyan ebpenudtul ziyà te menge Hudiyu, ne iring din ded, mid-ulinan e zin daan wey a mehimu he epustul he iyan sug̵ù din diyà te menge etew he kenà menge Hudiyu.

⁹ Ne si Santiago, si Pedro, wey si Juan, haazà is menge egalen dutun, hein nesavut dan he insarig kediey te Megbevayà heini is baal ku, mibpekigkumusta zan kenami ki Bernabe he tuus te teltelezuma key pudu is edtuman te ebpeveelan te Megbevayà. Neuyunan dey he iyan key ebpenudtul ziyà te menge etew he kenà Hudiyu ne iyan dan ebpenudtul ziyà te menge Hudiyu.

¹⁰ Iyan dan dà intelaan kenami is kedtevangi zey te menge tumutuu he egkengeayuayu ziyà te Hiruselim, iyan, daan ku en heini midheg̵et dini te g̵ehinawa ku.

Is Kedewaya ni Pablo ki Pedro

^11-12 Ne malù pa neug̵et dutun nekeuma si Pedro ziyà te kenami, te ziyè key te inged he Entiyukya. Ne hein aney sikandin mekeuma, hustu is mid-ulaula zin su mid-amur he egkaan te menge tumutuu he kenà menge Hudiyu. Iyan, hein nekeuma is menge tumutuu he Hudiyu he midsug̵ù ni Santiago, midlikayan din he mekekaan duma te kenà menge Hudiyu. Ne midsawey ku sikandin su utew keladu he kenà hustu is ed-ul-ulahan din. Umba midlikayan din su nahandek sikandin su kela ke ikesewayi kandin haazà is ulaula zin dutun te menge tumutuu he Hudiyu he egkag̵i he kinahanglan he ebpesirkunsidar is menge tumutuu he kenà menge Hudiyu.

¹³ Ne iring din ded daan dutun is mid-ulaula te zuma he menge tumutuu he Hudiyu su midlikey zan daan, ne minsan si Bernabe, ne neuwit daan dutun.

¹⁴ Ne hein nesavut ku he ed-ul-ulahan dan is supak te tutuu he impenurù te Meupiya he Tudtulanen, migkeg̵iyan ku si Pedro ziyà te etuvangan te langun kandan, ke siak te, “Sikew, Pedro, sikan is menge tumutuu he kenè tew zuma he Hudiyu, maan is ibpetuman nu kandan is kesug̵uan tew te menge Hudiyu? Su minsan Hudiyu ka, mid-engkezan nu en is kedtumana nu kayi he kesug̵uan,” ke siak.

¹⁵ Ne impelaus ku haazà is lalag ku te, “Sikita is etew he in-anak he Hudiyu, ne kenè ki iring te menge etew he kenà Hudiyu he egngezanan ta he ‘menge mesinupaken’.

¹⁶ Ne minsan pa zutun, netuenan ta he kenè ki egkeisip he metazeng te Megbevayà pinaag̵i te kedtumana ta te kesug̵uan he imbilinbilin ni Moises, kekenà, pinaag̵i zà te kedsarig ta ki Jesu Kristu. Sikita is Hudiyu, nekesarig ki zaan ki Jesu Kristu su wey pinaag̵i te kedtuu ki Jesu Kristu meisip ki zaan te Megbevayà he metazeng. Netuenan ta he kenà heini egkehimu pinaag̵i te kedtumana te kesug̵uan. Su wazà minsan hentei he ed-isipen he metazeng te Megbevayà tenged te kedtumana zin te kesug̵uan.

¹⁷ Guntaan, egkesuatan ta he isipa ki te Megbevayà he metazeng pinaag̵i ki Kristu. Ne pinaag̵i te kedtuu ta kandin ibpesavut kenita he mesinupaken ki ves daan he iring te kenà menge Hudiyu. Ne emun iyan heini, ne sikita is Hudiyu, egkehimu ve he ebpekekag̵i ki he pinaag̵i ki Kristu nehimu ki en he mesinupaken? Kenà daan egkehimu!

¹⁸ Su emun edlikuan ku ne egkeg̵iyen ku he hustu he paag̵i haazà is kesug̵uan he mid-engkezan ku, igkepeehè ku pinaag̵i kayi he venar iyan he mekesesalà a su nesupak ku is kesug̵uan.

¹⁹ Siak, nesavut ku en he kenà a egkeveg̵ayan te untung he wazè din pidtemanan pinaag̵i te kedtumana ku te kesug̵uan, ne tenged dutun mid-engkezan ku is kedsarig ku te kedtumana ku te kesug̵uan su wey ku iyan metuman is menge sug̵ù te Megbevayà.

²⁰ Tenged te kedsarig ku ki Kristu, inransang a te krus duma kandin su elili ku sikandin. Minatey a, iyan, uuyag a g̵ihapun su zini ed-ubpà te kediey si Kristu ne heini is kebpengungubpaan ku zini te kelibutan, pinaag̵i zà te kedsarig ku kandin te Anak te Megbevayà. Mahal a ziyà te g̵ehinawa zin ne mibpehimatey sikandin he elili kediey su wey a melibri.

²¹ Kenà egkehimu he kenè ku edewaten is gag̵ew te Megbevayà kedì su ke egkehimu he ed-isipen ki zin he metazeng pinaag̵i te kedtumana ta te kesug̵uan, wazè bes pulus te kebpehimatey ni Kristu!”