Gelasya 1 - Manobo Western Bukidnon

^1-2 Siak si Pablo is midsurat kayi. Ibpeuwit ku heini ziyan te keniyu te langun he menge tumutuu ziyan te menge inged te tivuuk he prubinsya he Gelasya. Siak wey is langun he menge tumutuu he menge zuma ku zini, ebpengemusta keniyu. Epustul a, iyan, wazà a g̵erari he epustul te etew zà duen, ne kenà daan pinaag̵i te etew zà duen is kedsug̵ua kedì, kekenà, migeraran a he epustul ni Jesu Kristu wey te Amey tew he Megbevayà he mibanhew ki Jesus, ne iyan sikandan midsug̵ù kedì.

³ Berakat he ikeg̵ag̵ew kew te Amey tew he Megbevayà wey te Nengazen tew he si Jesus wey veg̵ayi kew zan te melinawen he kebpekesavuk.

⁴ Si Kristu, imbelavag din is untung din su wey mepalis is menge salè tew su wey kiw melibri, ne kenè tew meiringi is menge etew he ed-ulaula te mezaat te g̵untaan he timpu kayi te kelibutan. Umba mibeelan heini ni Kristu su edtumanen din is egkesuatan te Amey tew he Megbevayà.

⁵ Berakat he zelig̵a is Megbevayà te wazà pidtemanan.

Sebsevaha Zà is Meupiya he Tudtulanen

⁶ Utew ku sikiyu igkeinuinu su wazè en utew meug̵et ne henduen be te nahalin en is kedtuu niw, ne is Megbevayà he iyan mibpetuu keniyu pinaag̵i te g̵ag̵ew ni Kristu, ed-iniyug̵an niw ne edtuuwan niw is selakew he tuluuwen he egngezanan daan te menge etew he Meupiya he Tudtulanen.

⁷ Iyan, kenà egkehimu he zuen selakew pa he tuluuwen he egngezanan te Meupiya he Tudtulanen. Egkeg̵iyen ku heini su zuen menge etew ziyan he ebpenurù te tarù, ne pinaag̵i kayi egkesemukan is isip niw su edhelinen dan te tarù is Meupiya he Tudtulanen mehitenged ki Kristu.

⁸ Iyan, egkeg̵iyen ku keniyu he ke zuen minsan hentei, minsan ke sikami, wey minsan ke velinsug̵uen he ebpuun te langit, ne zuen ibpesavut din keniyu he egkeg̵iyen din he Meupiya he Tudtulanen, iyan, selakew, ne kenà iyan heini is tutuu he tuluuwen he impesavut dey keniyu, ne verakat he meimpirnu sikandin.

⁹ Daan dey en keniyu heini migkag̵i, iyan, ed-umanan ku egkeg̵iya g̵untaan he ke zuen ibpesavut te minsan hentei he egkeg̵iyen din he Meupiya he Tudtulanen, iyan, kenà iyan is tutuu he tuluuwen he impesavut dey keniyu, ne verakat he meimpirnu sikandin.

¹⁰ Kunaan niw vuwa ke iyan netag̵ù te g̵ehinawa ku is: egkesuat a he zelig̵a a te menge etew. Iyan, kenà iyan heini netag̵ù te g̵ehinawa ku, kekenà, iyan is kebpenunuata ku te Megbevayà. Kunaan niw vuwa zaan ke egkesuatan ku he ibmeupiya te g̵ehinawa te menge etew is menge ulaula ku, iyan, kenà daan iyan egkesuatan ku su emun iyan egkesuatan ku, kenà egkehimu he sulug̵uen a ni Kristu.

Is Kegkeepustul ni Pablo

¹¹ Egkesuatan ku, menge suled, he mesavut niw he heini is migngezanan he Meupiya he Tudtulanen he impesavut ku keniyu ne kenà ebpuun te etew zà duen

¹² su wazà keg̵iya kediey te minsan hentei he etew ne wazà daan ipenurù kediey te etew, kekenà, impinted kediey ni Jesu Kristu.

¹³ Nezineg niw is daan he menge ulaula ku zengan te kemulu ku pa kebenteyani te tuluuwen te menge zuma ku he Hudiyu. Is langun he menge tumutuu ki Jesus, mibpesipelahan ku su ebpeg̵esen ku pezem sikandan he meengkezi zan is kedtuu zan.

¹⁴ Is menge zuma ku he menge Hudiyu he serenganè ku te penuig̵en, wazà nekerepeng kedì te kebenteyani ku te menge tuluuwen dey te menge Hudiyu. Ne wazà kandan kedì nekerepeng te kebenteyani te imbilinbilin he menge vetasan te g̵inepuan dey.

¹⁵ Ne minsan pa zutun, ingkeg̵ag̵ew a te Megbevayà ne mibpilì e zin he sulug̵uen din te wazè e pa ianak ne nehimu zin he meketuu a kandin.

¹⁶ Ne hein neisip din he ibpekilala zin en kediey is Anak din he si Jesus su wey ku ikepenudtul is keag̵i ni Jesus diyà te menge etew he kenà menge Hudiyu, wazà a mebpepenurù te minsan hentei he etew;

¹⁷ ne wazà a zaan medhendiyà te inged he Hiruselim su wey ku mesampit kes nengehuna he epustul ni Jesu Kristu, kekenà, midhendiyà a te prubinsya he Erabya ne zutun, midlikù a ziyà te inged he Demasku.

¹⁸ Ne tetelu pa zutun he tuig ne human a medhendiyà te inged he Hiruselim wey a mekepenumbaley ziyà te ki Pedro ne ziyà a te kandin taman dà te zezuwa he simana.

¹⁹ Ne neehè ku zaan dutun si Santiago, sikan is hazi te Nengazen tew he si Jesus, ne wazà duma he epustul he neehè ku zutun, iyan dà sikandan is dezuwa.

²⁰ Tutuu heini is edtudtulen ku keniyu. Netuenan te Megbevayà he kenà tarù.

²¹ Ne zutun mibeyaan ku is prubinsya he Sirya wey Silisya.

²² Ne wazè e pa zutun mekilala te menge gurupu te menge tumutuu ki Jesus he ziyà te prubinsya he Hudiya.

²³ Netudtulan dà sikandan te menge etew he siak is ebpendakep te menge tumutuu ki Jesus dutun te nengehuna he andew, ne g̵untaan idsangyew ku en is tinuuwan he iyan ibpendekepa ku kandan su wey zan meewai.

²⁴ Ne tenged dutun midalig dan is Megbevayà tenged te neketuu a ki Jesus.