3 Juan 1 - Manobo Western Bukidnon

¹ Siak is meg̵urang, ebpesuratan ku sikew, Gayu, is emig̵u ku he utew ku minahal.

² Minahal ku he suled, id-ampù ku sikew ziyà te Megbevayà he mebmeupiya is kebpekesavuk nu wey iveg̵ey kenikew is meupiya he lawa iring te imbeg̵ey zin daan kenikew is mezesen he kedtuu.

³ Nelipey a utew zutun te kebpekeuma zini te menge suled tew he ebpuun diyan su midtudtulan e zan he utew meheg̵et is kedhemeni nu te tutuu he tuluuwen wey uyun kun daan dutun is menge ulaula nu.

⁴ Iyan utew ku igkelipey is kegkezineg ku te tudtul he edtuman en te tutuu he tuluuwen is menge anak ku te kedtuu.

⁵ Minahal ku he suled, utew ka velig̵eg̵awen su mibpurungan nu is menge suled tew he midtuluy ziyan minsan te sikan nu pa sikandan mekilala.

⁶ Mibpenudtul zan te menge tumutuu zini hein midtig̵um key he utew zekelà is gag̵ew nu kandan. Emun ed-uman dan edtuluy ziyan tevangi nu en maan sikandan te paag̵i he egkesuatan te Megbevayà wey zan mekelaus dutun te kedhipanew zan.

⁷ Su midhipanew zan wey zan mekesangyew te impenurù ni Kristu, iyan, kenè dan ebpetavang te kenà menge tumutuu.

⁸ Ne tenged dutun kinahanglan he iyan ki is tumutuu ebeg̵ey ziyà te kandan su wey ki meketavang dutun te kedsengyawa zan te tutuu he tuluuwen.

⁹ Mibpesuratan ku is menge tumutuu ziyan, iyan, si Diyutripis, kenè din ebpemineg̵en is menge sug̵ù ku. Iyan egkesuatan din is: iyan dà sikandin ebayàbayà.

¹⁰ Emun ebpekehendiyan a, edseyseyen ku keniyu is langun he mezaat he ed-ul-ulahan din, su kenà tutuu is menge memezaat he lalag din he ebpemekesug̵at kenami. Ne kenà duen dà taman su kenè din ed-elimahan is menge zuma ta he tumutuu ke ebpekeuma zan. Ne kenè din daan idtug̵ut he ed-elimahan sikandan te menge zuma zin he tumutuu ziyan. Is ed-elima mulà kandan, kenè din idtug̵ut he edtampu zan te kedsimba niw.

¹¹ Minahal ku he suled, kenè ta iyan ed-iringan is mezaat he ulaula he iring dutun, kekenà, iyan ta ed-iringan is meupiya he ulaula. Is minsan hentei he meupiya is menge ulaula zin, neg̵aked sikandin te Megbevayà. Is minsan hentei mulà he mezaat is ulaula zin, wazà diyà te g̵ehinawa zin is Megbevayà.

¹² Nezelig̵an si Dimitriyu te langun he menge etew. Egkeehè dan pinaag̵i te menge ulaula zin he edtumanen din is tutuu he tuluuwen. Edelig̵en dey zaan sikandin ne netuenan nu he tutuu is egkeg̵iyen dey.

¹³ Mezakel pa pezem is egkeg̵iyen ku keniyu, iyan, kenè ku egkesuatan te edsurat.

¹⁴ Egkesuatan ku he kenè en utew egkeug̵et edhendiyan a ne human ki ebpekedlalag.

¹⁵ Berakat he melinawen is kebpekesavuk niw ziyan. Is menge emig̵u nu zini, ebpengemusta zan kenikew. Ipengemusta a zaan te langun he menge emig̵u ta ziyan.