2 Tiselunika 1 - Manobo Western Bukidnon

¹ Sikami, si Pablo, si Silas, wey si Timoteo, ebpesuratan dey sikiyu is menge tigTiselunika he g̵aked te Amey tew he Megbevayà wey g̵aked te Nengazen tew he si Jesu Kristu.

² Berakat he ikeg̵ag̵ew kew te Amey tew he Megbevayà wey te Nengazen tew he si Jesu Kristu, ne veg̵ayi kew zan te melinawen he kebpekesavuk.

Is Metazeng he Kedhukum

³ Menge suled, kinahanglan he layun dekelà is kebpeselemati zey te Megbevayà tenged keniyu. Ne hustu heini su layun dekelà is ked-uswag te kedtuu niw wey layun daan ed-iseg is kebmahala niw te uman sevaha he menge zuma niw ziyà te g̵ehinawa niw.

⁴ Ne tenged kayi emun ebpenumbelayan dey is menge tumutuu te Megbevayà diyà te minsan hendei he inged, ebentug̵en dey sikiyu tenged te kedsarig niw te Megbevayà wey tenged te kebmeinentusen niw te menge kemeresayan wey kemereg̵enan he egkeseg̵azan niw.

⁵ Heini is kedsarig niw wey ked-antus niw, ne iyan tuus he metazeng is kukuman te Megbevayà su pinaag̵i te memerasey he egkeantus niw, ibpeehè din he zait kew he idragkes dutun te menge etew he edhedian din.

⁶ Metazeng is menge ulaula te Megbevayà ne edresayen din keuzemà is menge etew he midrasey keniyu g̵untaan.

⁷ Ke ibpeg̵awag̵awa keuzemà is Nengazen tew he si Jesu Kristu he ebpuun te langit, id-awè din diyan te keniyu wey zini zaan te kenami is kemeresayan he egkeantus tew g̵untaan. Egkukumbalà sikandin te iring te regreg wey edumahan te menge mekeg̵eg̵ehem he menge velinsug̵uen din.

⁸ Dutun, edsilutan din sikandan is wazà medtetenged te Megbevayà wey wazà mebpemineg te Meupiya he Tudtulanen te keag̵i te Nengazen tew he si Jesus.

⁹ Iyan silut din kandan is kemetayen he wazà pidtemanan. Egkesuwey zan is Nengazen wey is mekeg̵eg̵ehem he anlag din.

¹⁰ Egkehitavù heini keuzemà dutun te andew te kedlikù din. Iyan idlikù din dini te kelibutan su wey mezalig sikandin te menge etew he mibpesakup kandin. Dutun, ne ebentug̵en sikandin te langun he menge tumutuu kandin wey sikiyu zaan su neketuu kew te impesavut dey keniyu.

¹¹ Tenged kayi layun dey sikiyu id-ampù. Ed-ampù key he himuwa te Megbevayà is menge ulaula niw he zait te kedtuu niw kandin. Ed-ampù key he pinaag̵i te g̵ehem din himuwa zin he tumana niw is minsan hengkey he meupiya he ulaula he iyan en tuyù niw tenged te midtuu kew kandin.

¹² Ne pinaag̵i kayi egkezalig niw is Nengazen tew he si Jesus, ne edelig̵en kew zin daan. Egkehimu heini pinaag̵i zà te g̵ag̵ew te Megbevayè tew wey te Nengazen tew he si Jesu Kristu.