2 Timoteo 4 - Manobo Western Bukidnon

¹ Duen idtelaan ku kenikew, ne is Megbevayà wey si Jesu Kristu, iyan ebpeketistig̵us kayi te menge lalag ku. Netuenan ta he edlikù si Jesus su iyan sikandin hadì ne iyan sikandin edsusi keuzemà te nengeulaula te minsan hentei, se uuyag pa wey is nemematey en.

² Ne tenged kayi iyan idtelaan ku kenikew is: ipesavut nu is Lalag te Megbevayà. Kinahanglan he layun ka andam te kebpesevuta te lalag din te minsan keenu he timpu ke zuen egkesuat he ebpemineg wey ke wazà. Dewaya nu is menge etew, sembag̵i nu he med-iniyug dan te mezaat he ulaula. Hengyui nu sikandan. Kinahanglan he layun ka mepelevayen is ebpenurù kandan.

³ Umba idtelaan ku heini kenikew su egkeuma keuzemà is timpu he kenà edewaten te menge etew is tutuu he tuluuwen, kekenà, iyan dan edsunuzen is menge mezaat he kebayè dan. Ebpemepenurù dan te mezakel he menge menenudlù. Ne iyan ibpenurù kayi is tuluuwen he utew zan egkesuati te ebpemineg.

⁴ Kenè dan ebpemineg̵en is tutuu, kekenà, iyan dan edtuuwan is menge tarù he g̵ug̵ud.

⁵ Iyan, sikew mulà, tengkai nu is ed-ul-ulahan nu te minsan keenu he timpu. Entusa nu is kemereg̵enan. Peniguduwi nu te edsangyew is Meupiya he Tudtulanen. Purungi nu tumana is langun he ebpeveelan kenikew te Megbevayà.

⁶ Siak mulà, meg̵aan en egkeepus is umur ku; meg̵aan en egkeuma is kebpatey ku.

⁷ Nepasad ku en is kebenggaa kedì te Megbevayà; nekeuma ad te edungguan te edlumbà. Hustu is ked-ikula ku te tutuu he tuluuwen.

⁸ Ne g̵untaan integ̵ana en kedì te Nengazen is suhul he iyan ibeg̵ey zin diyà te langun he memetazeng he etew. Ibeg̵ey zin heini keuzemà te andew te kedsusiya zin te nengeulaula te tivuuk he menusiyà. Iyan sikandin kes metazeng is kedsusi zin. Ne kenà iyan e zà midteg̵enahan din te suhul, kekenà, midteg̵enahan din daan is langun he utew egkeg̵alew ke ebpekelikù sikandin.

Is Insug̵ù ki Timoteo

⁹ Himuwa nu is taman te egkehimu nu wey ka meg̵aan mekehendini

¹⁰ su mid-ewaan a ni Dimas tenged te iyan egkenug̵unan din is untung din dini te kelibutan. Midhendiyà sikandin te Tiselunika. Ne si Krisinti, midhendiyà te Gelasya, ne si Tito zaan, midhendiyà te Delmasya.

¹¹ Iyan dà duma ku kayi, si Lucas. Tuluya nu si Marcos ne zumaha nu zini su zekelà is tavang din kedì te langun he ed-ul-ulahan ku kayi.

¹² Midsug̵ù ku si Tikiku ziyà te inged he Ipisu.

¹³ Sikan is kumbalè ku he intag̵ak ku ziyà te ki Karpu he ziyà te Truwas, meupiya ke ed-uwiten nu zini. Uwita nu zaan sikan is midlulun he menge libru, lavew en sikan is diyà isurat te lundis.

¹⁴ Utew mezaat is mid-ulaula kedì ni Alejandro, sikan is pandey te tumbag̵a. Iyan ebales kandin is Nengazen.

¹⁵ Endami nu sikandin su utew mezesen is kedsumpelita zin te tuluuwen he ibpenurù ta.

¹⁶ Dutun te nehuna he ked-imbistiga kedì wazà minsan hentei he midtavang mebpenistig̵us kediey su mid-ewaan a zuen te langun. Id-ampù ku he mepesaylu sikandan te Megbevayà.

¹⁷ Minsan pa zutun midtevangan a te Nengazen ne midlig-enan e zin ne tenged dutun nepurungan ku te edsangyew is Meupiya he Tudtulanen diyà te langun he menge etew zutun he kenà menge Hudiyu. Ne tenged dutun nelibri a ne wazà a mehimetayi.

¹⁸ Ne kenà dutun dà taman su edlibriyen e pa te Nengazen te minsan hengkey he ebpekekaid kedì ne edlig-enan e zin taman te ed-uwiten e zin dutun te g̵inhedian din diyà te langit. Berakat he zelig̵a sikandin te wazà pidtemanan.

¹⁹ Ipengemusta a ki Priscila, ki Ekilu, wey ki Unisipuru wey is pemilya zin.

²⁰ Mibpetag̵ak si Irastu ziyà te Kurintu ne intag̵ak ku si Trupimu ziyà te Militu su nezeruwan.

²¹ Gaanggaan ka hendini te kenè pa tipenguzan. Ebpengemusta kenikew ensi Yubulu, si Pudinti, si Linu, si Claudia, wey is langun he menge tumutuu zini.

²² Berakat he zumahi kew te Nengazen. Ikeg̵ag̵ew kew zin is langun. Iyan a si Pablo.