2 Timoteo 2 - Manobo Western Bukidnon

Is Buutan he Sundaru ni Jesu Kristu

¹ Sikew, Timoteo, is iring te tutuu he anak ku, heg̵eta nu is kedtuu nu su zekelà is tavang te Megbevayà kenita tenged te nekidsevaha ki ki Jesu Kristu.

² Nezineg nu is kebpenurua ku te tutuu he tuluuwen diyà te mezakel he menge tumutuu; ne kinahanglan he ipenurù nu zaan heini diyà te menge etew he egkeserig̵an nu su wey mekepenurù dan daan te zuma.

³ Ambit ka zaan kayi te ked-entusa ku te kemeresayan tenged te kedtuu su wey ka mehimu he sulug̵uen ni Jesu Kristu he iring te metinumanen he sundaru.

⁴ Sikan is mibpesundaru, ne kenà egkehimu he ed-ul-ulahan din is ed-ul-ulahan te kenà sundaru, su kinahanglan he layun sikandin andam te kebpenunuat te egalen din.

⁵ Is sulug̵uen te Megbevayà, ne iring te ibanggà. Ne is ibanggà, kenà ebpekezaag ne kenà ebeg̵ayan te suhul emun kenè din edsunuzen is belaud te kebpekibanggà.

⁶ Ne iring daan is sulug̵uen te Megbevayà te ebasuk. Is etew he midhag̵ù mebasuk, ne iyan sikandin egkehuna he ebpekezawat te vahin te sebpet din.

⁷ Isipa nu heini is impesavut ku kenikew ne edtevangan ka te Nengazen wey nu mepurung heini mesavut.

⁸ Kenè nu lipati he si Jesu Kristu, mibpeetew he kevuwazan ni Hadì David ne mibpehimatey ne nevanhew. Iyan heini ibpesavut ku emun ebpenudtul a te Meupiya he Tudtulanen.

⁹ Ne tenged kayi te kebpenudtul ku te Meupiya he Tudtulanen midrasey a te menge kuntada te Megbevayà ne neeg̵en a te kedina he iring te mesinupaken, iyan, kenà mulà egkeeg̵en is Lalag te Megbevayà.

¹⁰ Ne tenged kayi ed-entusen ku is minsan hengkey he merasey wey ku metevangi is menge etew he pinilì te Megbevayà. Egkesuatan ku he melibri sikandan te silut pinaag̵i te kebpekidsevaha zan ki Jesu Kristu ne mekezawat dan te ketulusan he wazà pidtemanan.

¹¹ Utew tutuu is penurù he edhenduen te, “Ke pinaag̵i te kedhimuwa kandin he elili kenita minatey ki en duma kandin, duen te en daan untung duma kandin.

¹² Ke ed-antus ki te kemeresayan ebpekehadì ki keuzemà duma kandin. Iyan, ke egkag̵i ki he kenè ki g̵aked din egkag̵i zaan sikandin keuzemà he kenè ki iyan gaked din.

¹³ Minsan ke kenè ki metinumanen te lalag din kenita, metinumanen mulà sikandin te lalag din su kenà egkehimu he kenè din edtumanen is lalag din.”

Is Meupiya he Sulug̵uen

¹⁴ Keg̵iyi nu is menge tumutuu he kenè dan melipati heini is langun. Iyan nu itelaan kandan he ibpetistig̵us is Megbevayà he likayi zan is kebpekidlawan he winalì mehitenged te kehulug̵an te menge lalag su wazè din pulus ne ebpekezezaat te kedtuu te ebpekezineg duen.

¹⁵ Himuwa nu is taman te egkehimu nu su wey mesuati te Megbevayà ne wey kenè nu ikeeled is baal nu. Kinahanglan he utew hustu is kebpenurua nu te tutuu he tuluuwen.

¹⁶ Likayi nu is winalì he kebpenurù he kenà egkesuatan te Megbevayà, su pinaag̵i zutun ed-iseg is kenà kedtahud kandin te menge etew.

¹⁷ Is menge etew he iring kayi is kebpenurù dan, ne iring te it-it is penurù dan su ebpekeeneb ne ebpekezezaat. Is kebpenurù ni Himinyu wey ni Pilitu, ne iring kayi.

¹⁸ Midsuwayan dan en is kebpenurù te tutuu he tuluuwen ne pinaag̵i zutun nehugkà is kedtuu te zuma he menge tumutuu. Egkeg̵iyen dan he nepasad en is kebenhawa kenita.

¹⁹ Ne minsan pa zutun kenà egkehalin kes tuluuwen he midtukud te Megbevayà su zuen insurat he Lalag te Megbevayà he edhenduen te, “Egketuenan te Nengazen ke hentei is menge etew he g̵aked din,” wey zuen pa zaan lalag he edhenduen te, “Is minsan hentei he egkag̵i he g̵aked sikandin te Nengazen, ne kinahanglan he ed-iniyug̵an din is mezaat he ulaula.”

²⁰ Diyà te minsan hendei he zekelà he valey zuen menge g̵elemiten he vulawan wey pelata ne zuen daan dutun menge g̵elemiten he kayu wey diniyun. Wey zà egemita is menge g̵elemiten he vulawan wey pelata ke zuen keemuran, iyan, is duma, andew-andew mulà is kegemita zuen.

²¹ Ne sikan is etew he egkesuat he mahala wey meteg̵eley te Megbevayà he iring te utew mahal he g̵elemiten, kinahanglan he ed-iniyug̵an din is langun he mezaat he ulaula. Ne human sikandin dait he egemiten te Megbevayà te minsan hengkey he meupiya he ulaula.

²² Iniyug̵i nu is menge mezaat he kebayà te menge menguhed. Hemeni nu is metazeng he ulaula; layun ka sarig te Megbevayà; mahala nu ziyà te g̵ehinawa nu is minsan hentei he tumutuu; peniguduwi nu he melinew is kedepitè niw te menge zuma nu su iyan heini menge ulaula te langun he menge etew he ebpetavang te Megbevayà tenged te iyan dà egkesuatan dan is kedtumana zan te menge sug̵ù din.

²³ Iyan, kenè ka penlavetlavet dutun te menge winalì wey pinaglung he ed-istudyuwan. Netuenan nu en he iyan haazà puunà te kebpekid-eg̵et.

²⁴ Ne netuenan nu zaan he kinahanglan he kenà mebpekid-eg̵et is sulug̵uen te Nengazen, kekenà, purungi zin layun is minsan hentei he etew. Kinahanglan he metau he ebpenurù ne mepelevayen daan sikandin.

²⁵ Emun menayù is kebpenurua zin te menge kuntada zin, kela ke mahalin te Megbevayà is gehinawa zan wey zan mesavut is tutuu he tuluuwen.

²⁶ Ne pinaag̵i zutun human ebmetandang is ked-isipa zan te langun, ne human dan egkepeleg̵uyi is gehem ni Setanas su iyan si Setanas nekezakep kandan wey zan metuman is egkesuatan din.