2 Pedro 2 - Manobo Western Bukidnon

Is Teruen he Menunudlù

¹ Duen dengan menge teruen he etew he uvag kun ebpeneuven te Megbevayà ne iring din ded daan, duen menge etew he edlepew g̵untaan he ebpenurù te tarù diyan te keniyu. Sayep is ibpenurù dan te meeles ne ebpekezezaat heini te upakat niw te menge tumutuu. Ibpenurù dan he kenà Nengazen tew si Jesus he iyan pezem mibelukas kandan ne tenged dutun egketik-awan sikandan ke edsilutan dan.

² Ne minsan pa zutun mezakel is edsunud te meremerik he menge ulaula zan, ne pinaag̵i zutun egkesawey kiw is edsunud te tutuu he tuluuwen su kunaan te menge etew ke zuma tew sikandan.

³ Tenged te suat dan te selapì, ebpenepian kew zan pinaag̵i te penurù dan he tarù. Daan en he midteg̵ana is silut kandan; andam en is Megbevayà te kedsilut kandan.

⁴ Su wazà pesegdana te Megbevayà minsan is menge velinsug̵uen din dengan he nekesalà, kekenà, intimbag din diyà te Iveyaan. Ne ziyè dan pa te utew merusirem he mibakus te kedina su idtag̵ad sikandan taman te andew te kedsilut.

⁵ Wazà daan pesegdana te Megbevayà is tivuuk he menusiyà dengan su impelapey zin is dag̵at ne nengelened is langun he wazè dan kedtahud kandin. Iyan dà midlibri zin si Noe he nekepenurù te metazeng he ulaula wey zuen pa pitu he etew he midlibri zin daan.

^6-8 Elin daan midsilutan dengan te Megbevayà is menge etew ziyà te menge inged he Suduma wey Gumura. Iyan dà meg̵inged dutun he midlibri zin ensi Lut su metazeng mulà si Lut. Nerasey si Lut he ed-isip-isip te meremerik he ulaula te menge mesinupaken he zuma zin. Andew-andew utew mezaat he ulaula is egkengezineg din wey egkengeehè din ne zutun utew mibmesakit is gehinawa zin. Ne tenged dutun te utew menge lalung mibinsulan te Megbevayà is inged dan su wey mesavut te minsan hentei ke hengkey is kedsiluti zin keuzemà dutun te menge etew he kenà ebpemineg te menge sug̵ù din.

⁹ Iyan, is menge etew mulà he ed-azap te Nengazen, metau sikandin he edtavang kandan wey kenè dan mekesalà ke ebpenulayen sikandan. Metau zaan sikandin he ebakus te menge nemematey he lalung su wey itag̵ad sikandan taman te andew te kedsiluti zin kandan.

¹⁰ Utew meveg̵at keuzemà is kedsiluti zin dutun te menge etew he ebpeniguduwan dan te edtuman is menge meremerik he kebayà te lawa zan wey edsumpeliten dan is minsan hentei he zuen din keg̵ehem. Ne heini is migkag̵i ku he menge etew he ebpenurù te tarù, utew zan memevurut wey memepelevawen. Kenè dan edtehuzen is menge kedesenan diyà te langit, kekenà, edsumpeliten dan.

¹¹ Ne minsan is menge velinsug̵uen te Megbevayà he lavew pa is gehem dan kenà dutun te menge teruen he menunudlù, kenè dan mulà ebpekeaku he edsudì te menge kedesenan emun idsumbung dan is menge kedesenan diyà te etuvangan te Megbevayà.

¹² Iyan, heini is menge teruen he menunudlù, kenè dan egkeisip he igkehandek heini su zaan he ulaula zan is kedsudì. Iring sikandan te menge langgam he wazà keeled he iyan intuvad kandan is kedekepa wey kedhimetayi kandan. Edsumpeliten dan is kenè dan egkesavut. Ne iyan egkezungguan dan is kemetayen he wazà pidtemanan.

¹³ Utew merasey is silut he egkeantus dan keuzemà iring te merasey zaan is ibpeantus dan te menge etew. Iyan kelenganan he egkesuatan dan is kedtumana zan te minsan maandew pa te minsan hengkey he meremerik he kebayà te lawa zan. Igkeeled niw wey igkesudii sikandan keniyu su minsan ke ebpekidtug̵en dan keniyu ziyà te menge keemuran niw utew zan egkesuati is kedtarùtarù keniyu.

¹⁴ Egkeerig̵an dan te minsan hentei he vahi; kenà egkepenù is suat dan te mezaat he ulaula. Ebpeeyatan dan is menge etew he kenè pa ebpekesavut te hustu. Utew zan leg̵ezen, iyan, kenà egkehimu he kenà sikandan egkesilutan te Megbevayà.

¹⁵ Nengetazin en is isip dan su midsuwey zan en te tutuu he ibayà. Iyan ibayà he ed-ikulen dan is mezaat he paag̵i zengan ni Belaam he anak ni Busur. Iyan dekelà diyà te g̵ehinawa ni Belaam is selapì he idsuhul kandin ke mezaat is ed-ul-ulahan din.

¹⁶ Duen kudè din he asnu he kenà pezem ebpekekag̵i, iyan, impekag̵i te Megbevayà ne indawey zin ki Belaam haazà is mezaat he ed-ul-ulahan ne tenged dutun wazà melaus ni Belaam is ketuturebungi zin.

¹⁷ Ne haazà is menge etew he ebpenurù te tarù, iring sikandan te kalut he nemezahan. Iring sikandan te g̵apun he ebpegwisen te keramag su wazè dan menge pulus. Integ̵ana te Megbevayà is egkeubpaan dan diyà te Impirnu he utew merusirem.

¹⁸ Uvag mezalem is menge lalag dan, iyan, wazà pulus te egkeg̵iyen dan. Duen menge etew he ed-engkezan dan pezem is menge zaan he zuma zan he ed-ulaula te sayep, iyan, ebpenulayen sikandan dutun te menge menunudlù pinaag̵i te meremerik he kebayà te lawa zan.

¹⁹ Egkeg̵iyen dutun te menge menunudlù he egkelibri ki pinaag̵i te kedsunuza kandan su idtug̵ut kun kenita is minsan hengkey he ulaula, iyan, nasì nengeuripen pa sikandan te menge ulaula he ebpekezezaat su netuenan ta he uripen is etew te minsan hengkey he ebpekevayàbayà kandin.

²⁰ Ke zuen menge etew he nekesavut en mehitenged te Nengazen tew he si Jesu Kristu, egkelibri zan en pezem te mezaat he ulaula zini te kelibutan he ebpekezezaat kandan. Iyan, ke egkepenulayan sikandan ne edlikuan dan en maan haazà is daan he kegkeuripena kandan te mezaat he ulaula, tuwas pa he merasey is egketemanan dan.

²¹ Meupiya pa ke wazè dan meturedu is paag̵i te kegkehimu kandan he metazeng, kenà te neturedu zan ne mid-iniyug̵an dan ne wazè dan medtuman te sug̵ù kandan te Megbevayà he impesavut kandan.

²² Netuman en pinaag̵i kandan sikan is erubasa he edhenduen te, “Migkaan te asu is in-utè din ne sikan is nezig̵ù he vavuy, midtunè en maan.”