2 Kurintu 9 - Manobo Western Bukidnon

¹ Wazà kinahanglan he idsurat ku keniyu ke hengkey is hustu he ed-ul-ulahan niw te kedtavang te menge tumutuu he egkengeayuayu

² su netuenan ku he zekelà is gustu niw te kedtavang. Migkeg̵iyan ku is menge tumutuu he tigMesidunya he layun dekelà is gustu niw te kedtavang. Migkag̵i ku kandan he puun pa zutun te nehuna he tuig daan naandam is gehinawa niw te menge tigGerisya te kebeg̵ey. Ne is kezekelan kandan, hein nezineg dan heini, mid-iseg is gustu zan te kedtavang daan.

³ Ne g̵untaan edsug̵uen ku ziyan heini is menge suled tew su wey kew zan metevangi te kedtumana te migkag̵i ku mehitenged keniyu su kela ke mehimu he lalag dà duen ne zutun dà taman. Iyan, netuenan ku he edtumanen niw g̵ihapun ne edteg̵enahan niw is idtavang niw sumalà is migkag̵i ku.

⁴ Su emun kenè niw edtumanen ne emun eduma kediey pehendiyan is menge tigMesidunya ne egkeehè dan he wazè niw teg̵enaha is idtavang niw, ne egkeeled key ne egkeeled kew zaan tenged te migkag̵i ku he naandam kew en.

⁵ Ne tenged kayi neisip ku he kinahanglan he ed-insaan ku heini is tetelu he menge suled tew ke egkehimu he edhuna zan kediey pehendiyan su wey kew zan metevangi te kedteg̵enaha he zaan te idtavang he impenaad niw. Ne zutun egkehimu he egketeg̵ane en haazà dutun te kebpekeuma ku ne egketuenan te langun he umba ebeg̵ey kew, kenà tenged te ebpeg̵esen kew, kekenà, tenged te ebpuun diyà te keputian te atey niw is kebeg̵ey niw.

Is Kegkekelelag̵an

⁶ Kenè niw lipati heini is sempità he emun deisek is ibpemula ta, deisek daan is egkerag̵un ta, ne emun dekelà is ibpemula ta, dekelà daan is egkerag̵un ta.

⁷ Kinahanglan he ed-isipen te kada sevaha ke hengkey is egkesuatan din he ibeg̵ey ne iyan ibeg̵ey zin. Kenè ta ibeg̵ey is kenè ta egkesuatan he ibeg̵ey, ne kenè ta zaan ibeg̵ey emun egkeisip ta he integ̵el kenita is kebeg̵aya ta, su emun ebeg̵ey ki, kinahanglan he ebpuun te keputian te atey ta is kebeg̵aya ta zutun ne iyan haazà utew egkesuatan te Megbevayà.

⁸ Ne egkehimu te Megbevayà he ibeg̵ey zin kenita is subra pa zutun te egkinehenglanen ta, su wey ta layun maazen is langun he menge kinahanglan ta wey zuen ta zaan subra he igketavang ta te zuma.

⁹ Ne zuen insurat he Lalag te Megbevayà he edhenduen te, “Layun dekelà is ibeg̵ey te Megbevayà diyà te egkengeayuayu ne kenà egkelipatan te wazà pidtemanan is ketulanged din.”

¹⁰ Ne is Megbevayà, iyan ebeg̵ey te venì diyà te ebpemula su wey zuen egkeenen. Is idtavang ta te zuma ne iring te ibpemula. Ibeg̵ey zin daan kenita is ibpemula, he ke và dà egkeg̵iya, is igketavang ta te zuma, su wey zuen dekelà he uzar ta he ebpuun te metazeng he ulaula ta ziyà te zuma.

¹¹ Su edhimuwen din layun he kenè ki maalang-alang te selapì su wey ta meveg̵ayi is edlised. Ne umba, menge suled, mezakel is ebpeselamat te Megbevayà tenged te tavang he ibpeuwit niw kenami.

¹² Ne heini is ibeg̵ey niw, kenà iyan dà pulus din is kegketavangi te menge tumutuu te Megbevayà, kekenà, pinaag̵i kayi utew mezakel he etew is ebpeselamat te Megbevayà.

¹³ Ne emun egketuenan te menge etew he utew kew metulanged, ebentug̵en dan is Megbevayà tenged te kedtumana niw te menge sug̵ù din wey tenged te mezesen he kedtuu niw te Meupiya he Tudtulanen su midtevangan niw sikandan ne midtevangan niw zaan is duma.

¹⁴ Ne zutun id-ampù kew zan, ne egkehimu he utew kew mahal ziyà te g̵ehinawa zan tenged te zekelà he g̵agew niw kandan he imbeg̵ey keniyu te Megbevayà.

¹⁵ Ne tenged kayi ebpeselematan ta is Megbevayà tenged te kebeg̵aya zin kenita te Anak din he wazà minsan hengkey he ebpekerepeng te kemahal zin.