2 Kurintu 8 - Manobo Western Bukidnon

Is Kebeg̵ey te Tumutuu

¹ Egkesuatan dey, menge suled, he metueni niw ke hengkey is nehimu tenged te g̵ag̵ew te Megbevayà diyà te menge tumutuu ziyà te Mesidunya.

² Minsan dutun te nekeantus dan te utew mepait he kemeresayan, ingkelipey zan utew g̵ihapun ne tenged kayi minsan pa te utew zan egkengeayuayu, utew zekelà is ingkeveg̵ey zan he tavang te menge zuma zan he tumutuu.

³ Ebpeketistig̵us a he midhimu zan is taman te egkehimu zan, ne subra pa te egkehimu zan is imbeg̵ey zan he ebpuun te keputian te atey zan.

⁴ Su midhengyuan key zan he tug̵uti zey sikandan he mekeug̵up kenami te kebeg̵ey te tavang diyà te menge tumutuu ziyà te prubinsya he Hudiya.

⁵ Wazè dey peebuta he egkehimu zan is iring dutun. Inhuna zan iveg̵ey is tivuuk he lawa zan wey g̵ehinawa zan diyà te Megbevayà, ne zutun, tenged te edtumanen dan is egkesuatan te Megbevayà, mibpevayàbayè dan daan kenami.

⁶ Ne g̵eina te iyan si Tito nemuunà te vaal ziyan te keniyu te kebpenguwaa te idtavang niw ziyà te menge tumutuu he tigHudiya, midsembag̵an dey sikandin he ipelaus din en su wey kew zin metevangi te kedhimesaza kayi te ulaula mehitenged te g̵ag̵ew niw.

⁷ Netuenan ku he wazà kurang niw te langun he menge ketau wey ulaula he meupiya. Dekelà is kedtuu niw; metau kew he ebpenurù; nesavut niw is tutuu he tuluuwen; ebpetebtevangè kew layun; ne zekelà is gag̵ew niw kenami. Tenged kayi egkesuatan dey he wazè niw zaan kurang kayi te kebpaahaa niw te g̵ag̵ew niw ziyà te menge tumutuu he tigHudiya.

⁸ Kenà heini kesug̵uan ku keniyu, kekenà, ibpesayud ku keniyu is dekelà he g̵ustu te zuma he menge tumutuu te kedtavang te menge zuma zan. Umba ibpesayud ku heini su wey niw meiringi. Ne pinaag̵i kayi egketuenan ku ke tutuu ve is keniyu he g̵ag̵ew.

⁹ Netuenan ta ke hengkey is kezekelà te g̵ag̵ew kenita te Nengazen tew he si Jesu Kristu. Su tenged te hizu zin kenita, minsan te utew sikandin sepian diyà te langit, midhimu zin he utew sikandin ayuayu pinaag̵i te kebpeetew zin wey kebpehimatey zin. Ne tenged kayi te kegkeayuayu zin egkehimu ki he utew sepian.

¹⁰ Iyan sambag ku keniyu is: himesaza niw haazà is kedtig̵uma niw te selapì he mibpuunan niw zutun te nehuna he tuig. Iyan kew nehuna te kedtig̵um te selapì wey metevangi is menge tigHudiya, ne kenà duen dà taman su heini he isip te kedtavang kandan, ne ziyan ebpuun te keniyu.

¹¹ Ne tenged kayi peniguduwi niw wey niw mepasad sumalà is egkehimu niw. Kinahanglan he zekelà is gustu niw te kedhimesaza kayi te vaal iring te zekelà is gustu niw hein aney te kebpuuni kayi.

¹² Su emun dekelà is gustu niw te kebeg̵aya te tavang sumalà is egkehimu niw, iyan heini igkesuat te Megbevayà su kenè din ebuyuen kenita is kenè ta igkeveg̵ey, kekenà, iyan ebuyuen din haazà is egkehimu ta he ibeg̵ey kandin.

^13-14 Kenà iyan dini te isip ku is merasey kew su wey metevangi is duma he edlised, kekenà, egkesuatan ku he metevangi niw is menge tumutuu he edlised guntaan geina te sepian kew g̵untaan. Ne keuzemà, emun iyan kew edlised ne iyan sikandan sepian, egkehimu he edtevangan kew zan daan. Pinaag̵i kayi ebpeked-iiring kew ne wazà edlised he tumutuu.

¹⁵ Iring heini te insurat dengan he Lalag te Megbevayà su edhenduen heini te, “Haazà is etew he nekekuwa te zekelà, wazà gihapun mesubrahi is nekuwa zin. Ne haazà is etew he zeisek is nekuwa zin, wazè din daan kurang.”

Si Tito wey Is Menge Zuma Zin

¹⁶ Dekelà is kebpeselemati zey te Megbevayà su imbeg̵ey zin ki Tito is dekelà he g̵ustu te kedtavang keniyu iring te kenami zaan he g̵ustu.

¹⁷ Ne hein mid-insaan dey sikandin ke egkesuatan din he edtavang keniyu utew sikandin nesuat. Ne kenà duen dà taman su zaan sikandin egkesuat he edtavang keniyu. Ne tenged kayi te suat din ed-isip edlikù diyan te keniyu.

¹⁸ Ibpezuma zey kandin is sevaha kayi te menge suled tew he tenged te kedhag̵ù din te kedsengyawa te Meupiya he Tudtulanen, utew sikandin telehuzen te menge tumutuu te langun he menge inged.

¹⁹ Ne kenà duen dà taman su nepilì sikandin te menge gurupu te menge tumutuu zini he iyan eduma kenami zutun te kedhated dey kayi te idtavang diyà te egkengeayuayu. Umba iyan key edhated su wey mevantug is Nengazen ne wey zaan metueni he utew key egkesuat he edtavang.

²⁰ Umba egkesuatan dey he eduma heini is suled tew su wey key kenà medudahi su kela ke zuen egkag̵i he ebpenggemiten dey heini is dekelà he selapì he idhated dey.

²¹ Su egkesuatan dey he hustu is ebeelan dey sumalà is ked-isipa kenami te Megbevayà ne kenà duen dà taman, kekenà, maahà daan te menge etew he metazeng is menge vaal zey.

²² Ne zuen pa suled tew he ibpezuma zey engki Tito. Mibpurungan ku sikandin susiya ne utew zekelà is gustu zin te edtavang te menge tumutuu, iyan, tuwas pa zekelà is gustu zin te edtavang keniyu g̵eina te zekelà is kedsarig din keniyu.

²³ Si Tito, iyan timbang ku te kedhimuwa ku te kedtavang keniyu. Ne heini is menge suled tew he zezuwa he eduma kandin pehendiyan, menge sug̵ù sikandan te menge g̵urupu te tumutuu zini. Pinaag̵i kandan egkevantug layun si Kristu ziyà te menge etew.

²⁴ Ipeehè niw kandan is gag̵ew niw su wey metueni te menge tumutuu ziyà te minsan hendei he inged he tutuu iyan is gag̵ew niw te menge zuma niw, ne zutun egketuenan dan he tutuu is migkag̵i zey he metinevangen kew.