2 Kurintu 7 - Manobo Western Bukidnon

¹ Ne g̵eina te iyan heini impenaad kenita te Megbevayà, ne edlumpiyuwen ta is menge ulaula ta su wey wazà minsan hengkey he meremerik he ulaula te lawa ta wey meremerik he isip ta. Ne ebpurungan ta is ulaula ta su wey meheg̵eti is kebmetazeng ta pinaag̵i te layun ta kedtehuza kandin.

Is Ked-engkezi te Menge Tumutuu te Mezaat he Ulaula

² Mahala key keniyu ziyan te g̵ehinawa niw su wazè dey salà te minsan hentei ziyan; wazà minsan hentei ziyan he nezeetan dey is kedtuu zin. Wazà minsan hentei ziyan he midlimbungan dey.

³ Kenà iyan igkeg̵iya ku kayi su zuen igkesewayi ku keniyu. Nekag̵i ku he zaan he utew kew mahal zini te g̵ehinawa zey. Te uuyag key pa wey minsan ke ebpatey key en ne kenè kew g̵ihapun egkeawà dini te g̵ehinawa zey.

⁴ Utew zekelà is kedsarig ku keniyu; dekelà layun is kebpekezalig ku keniyu. Ne tenged kayi minsan pa te mezakel is menge seeng dey, meupiya g̵ihapun is g̵ehinawa ku; utew zekelà is kelipey ku tenged keniyu.

⁵ Ne hein nekeuma key en dini te prubinsya he Mesidunya, wazè key g̵ihapun meewai te menge seeng dey. Su nereg̵enan key te mezakel he samuk. Mibpekidtebek kenami is menge kuntada zey ne ingkeipeng dey is menge tumutuu.

⁶ Iyan, is Megbevayà he metau he edlipey te egkengeseeng, midhimu zin he meupiya is gehinawa zey pinaag̵i te kebpekeuma ni Tito.

⁷ Ne kenà iyan dà ingkelipey zey is keg̵alew zey ki Tito, kekenà, elin daan is tudtul zin he utew sikandin nelipey mehitenged keniyu. Netudtul zin he egkesuatan niw utew he mekepenumbaley a ziyan. Netudtul zin daan he ebuyù kew te pesaylu zini te kediey. Ne elin daan tudtul zin is: dekelà te g̵ehinawa niw is kedtumana niw te egkesuatan ku. Ne tenged kayi utew zekelà is kelipey ku.

⁸ Su minsan ke pinaag̵i zutun te surat ku ne neseeng kew, neisip ku he meupiya utew te neveelan ku haazà. Hein aney, nekedsendit a su maan is neveelan ku is nehimu he ingkeseeng niw, iyan, petuluy zà naawà haazà is kegkeseeng niw.

⁹ Ne g̵untaan nelipey ad, kenà tenged te neseeng kew, kekenà, tenged te mibpurungan niw is menge ulaula niw pinaag̵i zutun te kegkeseeng niw. Ne haazà is kegkeseeng niw, himan te Megbevayà umba inmeupiya niw haazà is surat dey.

¹⁰ Su is kegkeseeng he egemiten te Megbevayà, egkehimu he igkehalin te g̵ehinawa te etew su wey melibri sikandin te silut. Ne kenà heini engayan he ibpekedsendit ta, iyan, is kegkeseeng te menge etew he kenà edsundan te Megbevayà, kenà igkehalin te g̵ehinawa zan ne tenged kayi kenà sikandan egkeveg̵ayan te untung he wazè din pidtemanan.

¹¹ Iyan, sikiyu, susiya niw is meupiya he nehimu te Megbevayà pinaag̵i te kegkeseeng niw. Su pinaag̵i kayi mid-iseg en is kebpurungi niw te ulaula niw. Dekelà diyà te g̵ehinawa niw he metueni te menge etew he wazè dey igkesawey te menge ulaula niw. Utew niw ingkeepes haazà is mid-ulaula zuen te nekesalà. Utew niw ingkehandek haazà su kela ke mekeragkes kew ke edsilutan sikandin te Megbevayà. Ne utew kew zaan mibulung kediey, ne mid-iseg is kedtumana niw te menge sug̵ù ku keniyu. Ne kenà dutun dà taman su segugunè niw midsiluti sikan is etew he mid-ulaula te mezaat. Ne ingkepeehè niw he wazà keniyu he salà dutun te neulaula zin.

¹² Kenà iyan dà impesurati ku keniyu is mehitenged duen te etew he nekesalà wey kes neselaan din, kekenà, ebpeketistig̵us is Megbevayà he umba mibpesuratan ku sikiyu su wey niw meisipisip ke sengemenu key kemahal diyan te g̵ehinawa niw.

¹³ Ne tenged kayi utew key nelipey. Ne kenà duen dà taman su nelipey key zaan tenged te nelipey si Tito. Ne iyan ingkelipey ni Tito is: pinaag̵i te menge ulaula niw he meupiya ne naawà is menge samuk diyà te isip din.

¹⁴ Indantal ku sikiyu ziyà te ki Tito ne wazà mebperis is kedentala ku keniyu. Layun tutuu is egkeg̵iyen dey keniyu ne iring din ded daan, benar is migkag̵i ku ziyà te ki Tito mehitenged keniyu.

¹⁵ Umba ed-iseg kew ebmahal ziyà te g̵ehinawa zin su egketenuzan din is kedtumana niw te menge sug̵ù ku wey is kegkeg̵alew niw kandin asal utew niw zutun ingkelenew kes kebpekeuma zin su nahandek kew ke zuen wazè niw metuman.

¹⁶ Ne tenged kayi, utew ad egkelipey su netuenan ku he ebpekepurung ad ebpekesarig keniyu.