2 Kurintu 6 - Manobo Western Bukidnon

¹ Ne g̵eina te nehimu key en he menge timbang te Megbevayà, edhengyuan dey sikiyu he himuwa niw he mebpulus is gag̵ew zin keniyu.

² Su zuen insurat he Lalag te Megbevayà he edhenduen te, “Dutun te timpu he egkesuatan ku, mibpemineg a te ked-ampù nu; ne zutun te hustu he timpu te kedlibriya ku te menusiyà, midtevangan ku sikew.” Ne iyan lalag ku keniyu is: iyan en heini timpu he egkesuatan te Megbevayà te kedtavang keniyu; iyan en heini timpu te kedlibriya zin keniyu te silut.

Is Kebpekesavuk ni Pablo

³ Egkesuatan dey he wazà igkesawey te minsan hentei te ulaula zey su wey wazà igkesudì dan te kedsengyawa zey te Lalag te Megbevayà.

⁴ Ne umba ebpurungan dey is ulaula zey su wey zey ikepaahà he menge sulug̵uen key te Megbevayà te minsan hengkey he paag̵i. Ne tenged kayi ed-antus key te minsan hengkey he kemereg̵enan, kemeresayan, wey menge samuk.

⁵ Mibug̵el key, mibpirisu key, mibpesipelahan key te edsinamuk. Duen timpu he utew subra is terebahu zey ne nepurang key ne nevitil key zaan.

⁶ Ne midlikayan dey is meremerik he ulaula. Hustu is kedsevuta zey te Lalag te Megbevayà; mepeseyluwen key ne metinevangen key te minsan hentei. Ed-ulinan key te Wag̵as he Mulin-ulin; ibpeehè dey is gag̵ew zey ziyà te langun;

⁷ ibpenurù dey is tutuu he Lalag te Megbevayà ne edtevangan key te g̵ehem te Megbevayà. Pinaag̵i kayi te langun egketuusan he menge sulug̵uen key te Megbevayà. Iyan kelasag dey wey lembitan dey is metazeng he ulaula.

⁸ Duen edtahud kenami ne zuen daan menge etew he kenè key zan edtehuzen. Duen edalig kenami ne zuen daan ed-ituk kenami. Duen egkag̵i he teruen key, iyan, kenà tarù is egkeg̵iyen dey.

⁹ Duen egkag̵i he utew minus is pid-etawan dey, iyan, nasì dekelà is bentug̵an dey. Layun key ed-ed-edisi te kemetayen, iyan, idtug̵ut pa te Megbevayà he kenè key pa mebpatey. Edsilutan key te Megbevayà wey key mepenurù, iyan, kenè key zin edhimetayan.

¹⁰ Mezakel is menge seeng dey, iyan, layun key egkelipey. Henduen be te utew key egkeayuayu, iyan, pinaag̵i kenami, edsepian te wazà pidtemanan is mezakel he menge etew. Henduen be te wazè dey azen, iyan, naangken dey is langun he ibeg̵ey te Megbevayà.

¹¹ Sikiyu is menge suled ku ziyan te Kurintu, wazè dey ieles keniyu is isip dey. Layun kew mahal zini te g̵ehinawa zey.

¹² Kenè iyan minus is gehinawa zey keniyu, kekenà, iyan kew minus is gehinawa niw kenami.

¹³ Edlelag̵an ku en sikiyu he iring te menge anak ku. Kinahanglan he mahala key zaan diyan te g̵ehinawa niw.

Is Kenà Kebpeked-amur te Meupiya wey Mezaat

¹⁴ Kenè kew, menge suled, mebpekidsevaha te menge etew he kenà tumutuu su kenà egkehimu he egkesevaha is meupiya wey mezaat. Ne kenà daan egkehimu he ebpeked-amur is kerayag wey is merusirem.

¹⁵ Kenà daan egkeuyun si Kristu wey si Setanas ne kenà egkehimu he egkesevaha is tumutuu wey is kenà edtuu.

¹⁶ Ne is simbahan he Valey te Megbevayà he zutun ed-ezapa sikandin, kenà egkehimu he zutun daan ed-ezapa is menge tarù he ed-ezapen. Ne iring din ded daan sikitew is tumutuu su iyan kiw iring te valey he ed-ubpaan te wazè din kemetayen he Megbevayà. Su migkag̵i is Megbevayà te, “Edlumunan ku sikandan ne ebpekiduma a kandan ne egkehimu he iyan a edsimbahan dan he Megbevayà ne iyan sikandan menge g̵aked ku he etew.”

¹⁷ Ne tenged kayi migkag̵i zaan is Megbevayà te, “Suwayi niw is ebpemen-azap te kenà tutuu he ed-ezapen ne sivey kew kandan. Engkezi niw is minsan hengkey he meremerik he ulaula ne edewaten ku sikiyu.

¹⁸ Ne egkehimu a he Amey niw ne sikiyu, menge vahi wey maama, egkehimu kew he menge anak ku. Lalag heini te mekeg̵eg̵ehem he Nengazen te langun.”