2 Kurintu 3 - Manobo Western Bukidnon

Is Beg̵u he Paag̵i

¹ Kunaan niw vuwa ke idantal zey en maan heini. Kenè key iring te zuma he ebpenurù su kenè niw sikandan egkezawat emun wazà surat he igkepeehè dan he ibpesavut dutun he wazà mezaat he ulaula zan. Ne iring din ded daan kenà sikandan egkezawat te zuma he etew emun wazè dan surat he iring dutun he ziyan ebpuun te keniyu.

² Sikami mulà, kenè key egkinahanglan te iring dutun. Netuenan dey he iyan kew surat dey su pinaag̵i te ulaula niw he meupiya egketuenan te minsan hentei he meupiya zaan is kenami he ulaula.

³ Su iring is kedtuu niw te surat he ibpesavut dutun he hustu is ulaula zey. Ne iyan mibaal kayi te surat si Kristu su midsug̵ù key zin diyan wey kew meketuu. Ne zeyzey heini is surat su wazà isurat pinaag̵i te kintà ne wazà daan isurat diyà te menge edsuratan he vatu iring te kesug̵uan he imbilinbilin ni Moises, kekenà, pinaag̵i te Wag̵as he Mulin-ulin insurat te Megbevayà diyà te g̵ehinawa niw te menge etew.

⁴ Umba egkekag̵i zey he iyan kew surat dey su pinaag̵i te kebpekidsevaha zey ki Kristu dekelà is kedsarig dey te Megbevayà.

⁵ Kenè dey egkekag̵i he pinaag̵i te kenami he ketau egkehimu zey is minsan hengkey, kekenà, netuenan dey he ziyà ebpuun te Megbevayà is kegkehimuwa zey te langun.

⁶ Su iyan sikandin ebeg̵ey kenami te ketau wey zey ikepenurù is beg̵u he paag̵i he midtukud din te kebpekidsevaha zin te menusiyà. Ne wazà heini is beg̵u he paag̵i iveg̵ey pinaag̵i te insurat he kesug̵uan, kekenà, imbeg̵ey zin heini kenitew pinaag̵i te Wag̵as he Mulin-ulin. Su emun iyan ta edserig̵an is kedtumana ta te kesug̵uan, ne kemetayen he wazà pidtemanan is ebperetengen ta. Iyan, ke ibeg̵ey kenitew is Wag̵as he Mulin-ulin ne untung he wazà pidtemanan is ebperetengen ta.

⁷ Dutun te kedsurata zengan te Megbevayà te kesug̵uan, duen te menge edsuratan he vatu, neselikuvungan si Moises te ed-anlag he g̵ehem te Megbevayà. Ne zutun nenganlag is paras ni Moises tenged te g̵ehem te Megbevayà ne nekesirang te menge etew he kevuwazan ni Israyil. Ne minsan pa zutun te utew merayag haazà, naawà gihapun haazà is gehem. Iyan ibpesavut kenita pinaag̵i te kesug̵uan is: ebpatey is gimukud te menusiyà. Ne minsan pa zutun utew zekelà is gehem he impaahà te Megbevayà dutun te kedsurata zin kayi.

⁸ Emun dekelà is gehem he impaahà dutun te kebeg̵aya zin te kesug̵uan, iyan pe be kenà tuwas pa he mekeg̵eg̵ehem is kebeg̵aya zin te Wag̵as he Mulin-ulin.

⁹ Emun dekelà is gehem te kesug̵uan he iyan idsiluti te menusiyà, iyan pe be kenà dekelà pa utew is gehem te paag̵i he iyan ebpekehimu he mebmetazeng is menusiyà.

¹⁰ Ne haazà is kesug̵uan he zekelà dengan is gehem din, nehimu en guntaan he wazè din gehem su mid-ilisan en te veg̵u he paag̵i he utew pa zekelà is gehem.

¹¹ Su ke zuen gehem te zaan wey naawè en haazà is daan he zuen din gehem, iyan pe be kenà dekelè pa utew is gehem te veg̵u he kenà mulà egkeawà.

¹² Ne g̵eina te ebpekesarig key he kenà heini egkeawà te minsan keenu kenè key egkehandek te kedsengyawa zey te Lalag te Megbevayà.

¹³ Ne kenè key iring ki Moises su wazè dey id-eles. Su si Moises, mid-elangan din is buked din wey kenà maahà te menge zuma zin he kevuwazan ni Israyil kes ed-anlag he g̵ehem he egkenaney en egkeawà.

¹⁴ Su zutun neelangan daan is menge kedsavut dan. Ne wazà daan mahalin heini g̵untaan su kemulu pa neelangan is kedsavut te menge Hudiyu. Ne emun ebasa zan mehitenged te zaan he paag̵i kenè dan egkesavut. Ne emun duen kandan edtuu ki Kristu, id-awà te Megbevayà is ebpekealang te isip din ne human sikandin ebpekesavut.

¹⁵ Ne kemulu pa g̵untaan is kenè dan kebpekesavut su emun ebesahan te menge Hudiyu is kesug̵uan he imbilinbilin ni Moises, kenè dan egkesavut su neelangan pa is isip dan.

¹⁶ Iyan, id-awà is ebpekealang te kedsavut te etew emun edtuuwan din is Nengazen.

¹⁷ Ne heini is egkeg̵iyen he Nengazen, ne iyan kes Wag̵as he Mulin-ulin, ne emun ed-ulinan is etew te Wag̵as he Mulin-ulin nevelukasan en sikandin te kegkeuripena kandin te kesug̵uan.

¹⁸ Ne, menge suled, sikitew is langun, nesavut tew en he utew lavew is gehem te Nengazen tew, ne wazà ebpekealang te kedsevuta tew kayi. Ne pinaag̵i kayi te g̵ehem he ebpuun te Nengazen he iyan kes Wag̵as he Mulin-ulin, edhimuwen kiw zin he iring te kandin ne layun ed-iseg heini is gehem.