2 Kurintu 2 - Manobo Western Bukidnon

¹ Ne tenged kayi, menge suled, neisip ku he kenà ad ed-uman ebpenumbaley ziyan emun iring ded dutun te nehuna he kedhendiyan ku, su zutun ingkeseeng niw is kebpenumbaley ku.

² Su emun igkeseeng a keniyu ne hentei is edlipey kedì? Wazà, su egkeseeng kew man kediey.

³ Umba, menge suled, iyan mibeelan ku zutun is mibpeuwitan ku zà sikiyu te surat. Su kenè ku zutun egkesuatan he ebpenumbaley a ziyan su netuenan ku he sikiyu is menge etew he kinahanglan pezem he iyan igkelipey ku, ne igkeseeng ku zutun. Ne netuenan ku zaan he emun egkelipey a, egkelipey kew zaan.

⁴ Dutun te kebpeuwiti ku keniyu te surat, utew ad neseeng. Mibmesakit is gehinawa ku ne mibpenig̵is is luhè ku. Iyan, kenè ku pezem dutun tuyù is wey kew meseeng, kekenà, egkesuatan ku he metueni niw he utew kew mahal zini te g̵ehinawa ku.

Is Kebpesaylu Zuen te Nekesalà

⁵ Ne haazà is etew he nekesalà diyan, kenà a iyan neselaan din, kekenà, iyan kew, ne emun kenà, ne iyan is duma keniyu. Kenè ku egkesuatan he utew mesekiti is gehinawa zin pinaag̵i te menge lalag ku.

⁶ Netengkaan en, menge suled, is kedsiluti niw kandin.

⁷ Ne g̵untaan kinahanglan he peseyluwa niw sikandin. Sembag̵i niw su kela ke maawà is kedsarig din te Megbevayà te utew subra he kegkeseeng din.

⁸ Edhengyuen ku keniyu he ipeehè niw kandin he tutuu iyan is gag̵ew niw kandin.

⁹ Umba mibpeuwitan ku sikiyu te surat ku su wey ku maahà ke metinumanen kew ve te langun he menge sug̵ù ku.

¹⁰ Ne ke zuen etew he ebpeseyluwen niw, ebpeseyluwen ku zaan. Su penenglitan ke zuen nekesalà diyan wey ebpeseyluwen ku, netuenan ni Kristu he iyan ketezengan ke maan is ebpeseyluwen ku su wey mebmelinew is kedezepitè niw.

¹¹ Ne umba ed-ul-ulahan ku heini su wey kenè kiw meekali ni Setanas. Netuenan tew ke hengkey is mezaat he edhimuwen din pezem dini te kenitew.

Is Ingkesemuki ni Pablo Ziyà te Truwas

¹² Menge suled, hein midhendiyà a te inged he Truwas te kedsangyew te Meupiya he Tudtulanen, neehè ku he midhimu en te Nengazen is paag̵i wey ku ikepelaus is ebpeveelan din kedì.

¹³ Iyan, utew zutun nesemuki is gehinawa ku su kenè ku egketuredu is suled tew he si Tito. Ne tenged kayi, mid-ewaan ku is menge tumutuu he meg̵inged dutun ne midlaus a ziyà te prubinsya he Mesidunya.

Is Kebpekeeneb te Meupiya he Tudtulanen

¹⁴ Ne minsan pa zutun utew zekelà is kebpeselemati ku te Megbevayà su tenged te kebpekidsevaha tew ki Kristu, iring kiw te menge vihag ni Kristu he ibpeehè din diyà te minsan hentei. Ne pinaag̵i kenitew ibpesavut din diyà te menge etew ke hentei sikandin diyà te minsan hendei.

¹⁵ Ne g̵eina te nehimu key he menge sug̵ù ni Kristu, iring key te veyawà he ibegey ni Kristu ziyà te Megbevayà. Is ngazeg kayi, ne ziyà mekeeneb te menge etew he egkelibri te silut wey ziyà daan te kenà egkengelibri.

¹⁶ Ne haazà is menge etew he kenà ebpelibri, is ibpesavut dey kandan ne henduen be te utew memahù su nesavut dan he neangken dan en is kemetayen. Ne haazà mulà is menge etew he ebpelibri ki Kristu, is ibpesavut dey kandan, ne henduen be te utew mehemut su nesavut dan he neangken dan en is untung he wazà pidtemanan. Hentei vuwa is dait te kedsengyawa kayi te tudtul?

¹⁷ Iyan, sikami, kenè dey ed-iringan is ulaula te mezakel he ebpenurù su ziyà te kandan henduen be te ibpenapì dan is Lalag te Megbevayà. Ne tenged te midsugù key te Megbevayà, ne tenged daan te edsusiyen key layun te Megbevayà, tutuu is tuyù dey wey egkeg̵iyen dey su nekidsevaha key ki Kristu.