2 Kurintu 13 - Manobo Western Bukidnon

Menge Telaan ni Pablo

¹ Iketelu en heini te kebpenumbaley ku ziyan. Ke zuen etew he ebpehusey kedì ne zuen idsumbunga zin te zuma zin he tumutuu, kinahanglan he ebentayan ta is sug̵ù diyà te insurat he Lalag te Megbevayà he edhenduen te, “Ke zuen idsumbunga niw te zuma niw kinahanglan he edtistig̵usan te menge tetelu ne emun kenà ne menge zezuwa he etew.”

² Dutun te ikezuwa he kebpenumbelayi ku keniyu, sikiyu is memezaat is ulaula zengan, migkag̵i ku keniyu he emun kenè niw ed-engkezan haazà is memezaat he ulaula niw ne edsilutan ku sikiyu emun ebpekelikù a. Ne ed-umanan ku egkeg̵iya g̵untaan diyan te keniyu wey ziyà te minsan hentei pa he ed-ulaula te mezaat. Ke ebpekeuma a, wazà minsan hentei he ed-ulaula te mezaat he ebpekelikey te kedsiluti ku kandin.

³ Dutun, ne egkevenaran kew human he is egkeg̵iyen ku keniyu, iyan is impekag̵i kediey ni Kristu. Ne kenà sikandin telawen, kekenà, emun duen ed-ul-ulahan din keniyu dekelà is gehem din he ibpeehè din keniyu.

⁴ Su minsan ke henduen be te wazà egkehimu ni Kristu zutun te kedrensanga kandin diyà te krus, nevanhew zed sikandin ne zuen din en beg̵u en he untung pinaag̵i te g̵ehem te Megbevayà. Ne sikami zaan, henduen be te wazè dey egkehimu su layun key zaan ebpekeantus te kemeresayan, iyan, pinaag̵i te g̵ehem te Megbevayà he edtavang kenami, duen dey zaan beg̵u en he untung ne ebpeketavang key pa keniyu.

⁵ Susiya niw is gehinawa niw wey niw metueni ke tutuu ve is kedtuu niw ki Kristu. Wazè niw ve metueni he midlumunan kew ni Kristu? Ne emun wazà, ne tarù is kedtuu niw ne wazè kew mezawat ni Kristu.

⁶ Egkesuatan ku he metueni niw he tutuu key iyan he menge epustul ni Kristu.

⁷ Id-ampù dey ziyà te Megbevayà he wazà ulaula niw he mezaat. Ne kenè dey iyan id-empua keniyu su wey metueni te menge etew he edtumanen niw is impenurù dey keniyu su maambe ke kenè niw ed-isipen he epustul key ni Kristu, asal, ed-ul-ulahan niw is hustu.

⁸ Su emun hustu is ed-ul-ulahan niw, sikami is epustul, kenà egkehimu he ibpeehè dey is keg̵ehem dey keniyu su wey zey zà ibpaahà is keg̵ehem dey ke edsupaken niw is hustu he ulaula.

⁹ Egkelipey ad emun wazè niw supak, minsan ke henduen te wazè dey keg̵ehem. Ne kenà duen dà taman su id-ampù dey he mepurung meheg̵et is ked-ul-ulaha niw te hustu.

¹⁰ Umba ebpesuratan ku sikiyu te zini e pa te meziyù su ke ebpekeuma a ziyan kenè en kinahanglan he meg̵amit ku is keg̵ehem ku te epustul te kedsilut. Imbeg̵ey kedì te Megbevayà heini is keg̵ehem. Kenà iyan imbeg̵aya zin kayi te keg̵ehem su wey maawà is upakat niw te tumutuu, kekenà, wey meheg̵et is upakat niw.

Is Kebpengemusta

¹¹ Menge suled, iyan dà heini menge lalag ku keniyu; berakat he mebmelipayen kew. Purungi niw is menge ulaula niw; tumana niw is menge sambag ku keniyu. Kinahanglan he mesevaha is gehinawa niw ne mebmelinawen is ked-ubpè niw. Su emun ebeelan niw heini, is Megbevayà he iyan puunà te g̵ag̵ew wey kelinew, layun eduma keniyu.

¹² Mebpelimlimuey kew he iyan tuus he teltelesuled kew tenged te kedtuu niw.

¹³ Ebpengemusta keniyu is langun he menge tumutuu te Megbevayà dini.

¹⁴ Berakat he ikeg̵ag̵ew kew te Nengazen tew he si Jesu Kristu wey verakat he ipeehè keniyu te Megbevayà he mahal kew ziyà te g̵ehinawa zin wey verakat daan he meheg̵et is upakat niw te Wag̵as he Mulin-ulin. Iyan a si Pablo.