2 Kurintu 11 - Manobo Western Bukidnon

Si Pablo wey Sikan is Uvag Menge Epustul

¹ Pekelalaglalag kew he entusa niw is egkeg̵iyen ku keniyu minsan ke henduen be te tulebung a.

² Su insavuk te Megbevayà kayi te kediey is dekelà he suat he kenè kew medsuwey te Nengazen. Iring kew te rag̵a he nekeg̵unan, iyan, iyan si Kristu ingkag̵un ku keniyu. Ne egkesuatan ku he wazà duma he ebpekeesawa keniyu.

³ Egkeipeng a keniyu su kela ke meengkezi niw is kebpurungi niw kedtumana te menge sug̵ù ni Kristu su kela ke mesahug is kedtuu niw te selakew he edtuuwen. Kela ke meiringi niw si Ibà dengan su mid-akalan sikandin te teruen he uled he iyan si Setanas.

⁴ Umba egkeipeng a su ke zuen ebpekeuma ziyan he selakew is ibpesavut dan mehitenged ki Jesus, ne selakew is mulin-ulin he ibpenurù dan, ne kenè dan iyan ibpesavut is tutuu he tuluuwen he impesavut dey, kekenà, selakew is ibpenurù dan, ne ed-entusen niw mulà is kandan he kebpenurù ne kenà duen dà taman su utew niw egkesuati te ebpemineg.

⁵ Ne heini is menge uvag kun lavew he epustul ni Kristu, kunaan dan ke utew zan lavew, iyan, netuenan ku he wazè e zan melevawi

⁶ su minsan ke kenà a metau he egkag̵i netuenan ku mulà ke hengkey is tutuu he tuluuwen. Ne iyan heini impesavut dey keniyu zengan te minsan keenu he timpu wey te minsan hengkey he paag̵i.

⁷ Hein impesavut ku ziyan te keniyu is Meupiya he Tudtulanen, wazà a mebpesuhul keniyu te minsan sengesintabus dà. Ne iyan benar is: mibpekeminus ku en is pid-etawan ku su wey ku sikiyu ikepelavew. Sayep ku ve heeyan?

⁸ Dutun te kebpenurua ku keniyu ne iyan midsuhul kedì is menge tumutuu ziyà te zuma pa he menge inged. Henduen be te midtekawan ku sikandan wey ku sikiyu iyan metevangi.

⁹ Ne hein diyan a te keniyu ke zuen kinahanglan ku he selapì, wazè ku vuyua ziyan te keniyu su is menge suled tew he ebpuun diyà te prubinsya he Mesidunya, imbeg̵ey zan kedì is minsan hengkey he egkinehenglanen ku. Sikiyu is tigGerisya, wazè ku pa sikiyu vuyui te igkeuyag ku, ne kenà daan egkehimu he ebuyù a ziyan te keniyu te minsan keenu he timpu.

¹⁰ Ne heini is idantal ku, kenà egkehimu he egkehalin te minsan keenu he timpu su kenà a edawat te selapì te minsan hentei he ziyan te tivuuk he prubinsya he Gerisya. Tutuu heini iring te netuenan ku he tutuu is impesavut ni Kristu.

¹¹ Kunaan niw vuwa ke umba egkeg̵iyen ku he kenà a ebuyù diyan te keniyu su wazà gehinawa ku keniyu, iyan, utew kew mahal zini te g̵ehinawa ku. Netuenan te Megbevayà he mahal kew zini te g̵ehinawa ku.

¹² Kenè ku edlekaan heini is lalag ku he kenè ku kebuyù diyan su wey haazà is menge uvag kun lavew he epustul ni Kristu, kenè dan mekekag̵i he iring te kenami is menge paag̵i zan te kebaal.

¹³ Kenà sikandan tutuu he menge epustul ni Kristu, kekenà, tarù sikandan he menge sulug̵uen ni Kristu. Edterteruan kew zan pinaag̵i te menge vaal zan ne egkeg̵iyen dan he tutuu sikandan he menge epustul ni Kristu.

¹⁴ Ne kenè ku heini igkeinuinu su minsan si Setanas, egkehimu zin is dagwey zin he iring te utew merayag he velinsug̵uen te Megbevayà he ebpuun te langit.

¹⁵ Umba, kenè ki egkeinuinu ke egkehimu zaan is menge sulug̵uen ni Setanas he iring te menge metazeng he sulug̵uen te Megbevayà. Iyan, keuzemà edsilutan sikandan sumalà is menge mezaat he vaal zan.

Is Ked-antus ni Pablo

¹⁶ Edsublien ku te egkag̵i he kinahanglan he kenà isipa te minsan hentei keniyu he tulebung a tenged te menge lalag ku keniyu. Iyan, minsan ke ed-isipen niw he tulebung a, entusa niw te ebpemineg su wey a mekezantal te kenà utew egkeug̵et.

¹⁷ Heini is egkeg̵iyen ku keniyu, ne kenà iyan ibpekag̵i kedì te Nengazen, su iring a te tulebung is edantal.

¹⁸ Ne g̵eina te zuen mezakel he idantal zan is menge ulaula zan dini te kelibutan egkehimu vuwa taman te meg̵aan dà ke idantal ku zaan is kedì.

¹⁹ Ne g̵eina te menge uluwanen kew he etew, utew kew metau he ed-antus te menge lalag te tulebung diyà te keniyu.

²⁰ Su ke zuen minsan hentei he ebmandarmandar keniyu wey ke zuen ed-ag̵ew te menge azen niw wey ke zuen edlimbung keniyu wey ke edlupig̵en kew zan wey ke ebug̵elen kew zan ne ed-entusen niw.

²¹ Utew zan mevurut, iyan, sikami, telawen key ne egkeeled a su haazà is menge ulaula zan keniyu he kunaan niw ke utew meupiya, wazè dey meulaula ziyan te keniyu. Ne g̵eina te wazè dan en kegkehandek te edantal ne kenà a zaan egkehandek he edantal minsan ke ebpekeiring a te tulebung.

²² Haazà he menge etew, egkeg̵iyen dan he menge pinilì sikandan te Megbevayà su menge Hudiyu zan, menge kevuwazan ni Israyil wey menge kevuwazan te kepuun ni Israyil he si Abraham. Ne siak daan, Hudiyu a he kevuwazan daan ni Israyil wey ni Abraham.

²³ Netuenan ku he henduen a te ebuneg̵en kayi te menge lalag ku, iyan, kenà egkesabpeng is bèbè ku kayi te egkeg̵iyen ku. Egkeg̵iyen dan he menge sulug̵uen sikandan ni Kristu. Siak, lavew e pa he metinumanen he sulug̵uen ni Kristu. Utew memereg̵en is ebpeveelan din kediey. Lelayun ad egkepirisu ne sikandan, kenà layun. Lelayun ad ebug̵ela te menge etew he kuntada te Megbevayà, kenà te sikandan. Mezakel en is nengeeg̵iyan ku he edhimetayan a pezem, kenà te sikandan.

²⁴ Kelelima e en bug̵ela te menge Hudiyu te menge ketluan wey siyew he lagkut.

²⁵ Ketetelu ad bug̵ela pinaag̵i te menge tuked. Midtuleng a te vatu te menge etew su edhimetayan e zan pezem. Ketetelu en daan melavu is barku he mid-untuzan ku ne zuen timpu he sengekezukileman wey sengeandew ziyà a te lawed te zag̵at is nekeg̵eg̵entungan dà.

²⁶ Ne zutun te menge kedhipanew ku ne nengeeg̵iyan ku is mezakel he menge kemereg̵enan tenged te kedalem te wahig, wey tenged te menge tulisan, wey tenged te menge kuntada ku he menge zuma ku he Hudiyu wey menge kenà Hudiyu. Mezakel is menge hitavù kediey ziyà te menge inged wey ziyà te wazà meg̵inged wey ziyà te zag̵at wey pinaag̵i te menge tarù he tumutuu.

²⁷ Midhag̵ù a is edterebahu; layun a egkepurang; layun a egkevitil; ne layun a egkemezahi. Layun a kurang te egkeenen wey layun a egkealang-alang te egkeubpaan wey ugelingen.

²⁸ Ne kenà duen dà taman su andew-andew egkereg̵enan a te kedumelaha ku te langun he menge gurupu te menge tumutuu ziyà te minsan hendei.

²⁹ Su ke zuen tumutuu he edlised su ebmeg̵uyà is kedtuu zin, ne edlised a zaan su egkeipeng a kandin. Ke zuen nepenulayan ne nekesalà, ne haazà is etew he nekepenuley kandin, utew ku igkeepes.

³⁰ Kenè ku egkesuatan he edantal a, iyan, emun kinahanglan he ibpezantal a, idantal ku is menge kemeresayan he nengeeg̵iyan ku su pinaag̵i kayi egketuenan niw he zekelà is kurang ku te ketau.

³¹ Is Megbevayà wey Amey te Nengazen tew he si Jesus, delig̵a sikandin te wazà pidtemanan. Netuenan din he kenà tarù heini is egkeg̵iyen ku.

³² Dengan, hein diyà a te inged he Demasku, is gubirnedur he intezù ni Hadì Eritas, midsug̵ù din is menge sundaru he ventayi zan is pultahan he idselang dutun te kutà te inged su wey e zan mezakep ke egawas a zutun.

³³ Iyan, duen menge etew he midtavang kediey ne in-ahuk e zan te zekelà he vinevey ne midhelug̵an e zan diyà te sulawà he liyu te metikang he elavat he kutà dutun te inged ne nekeg̵awas a zutun.