2 Kurintu 1 - Manobo Western Bukidnon

¹ Siak si Pablo. Migeraran a he epustul ni Jesu Kristu tenged te iyan egkesuatan te Megbevayà. Siak wey si Timoteo he suled tew, ebpesuratan dey sikiyu is langun he menge tumutuu te Megbevayà diyan te inged he Kurintu wey is langun daan he menge etew he neg̵aked te Megbevayà seled te tivuuk he prubinsya he Gerisya.

² Berakat he ikeg̵ag̵ew kew te Amey tew he Megbevayà wey te Nengazen tew he si Jesu Kristu ne tuvazi kew zan te melinawen he kebpekesavuk.

Is Kedasig te Megbevayà

³ Edelig̵en tew is Megbevayà he iyan Amey te Nengazen tew he si Jesu Kristu; iyan sikandin hihizuwen he Amey tew wey puunà te minsan hengkey he tavang kenitew.

⁴ Edtevangan kiw zin te langun he menge seeng tew ne tenged kayi ebpeketavang kiw zaan te zuma he etew he zuen din minsan hengkey he seeng. Is idtavang tew kayi, ne iyan ded is intavang kenitew te Megbevayà.

⁵ Minsan pa te zekelà is kemeresayan he egkeantus tew tenged te nekidsevaha kiw ki Kristu, dekelà daan is tavang kenitew te Megbevayà tenged daan ki Kristu.

⁶ Emun idtug̵ut te Megbevayà he mekeantus key te merasey, umba ibpaantus key zin su wey kew mezeyzey ne wey kew zaan meveg̵ayi te untung he wazà pidtemanan. Ne iring din ded daan emun edtevangan key te Megbevayà ne egkehimu heini he tavang din daan keniyu. Ne pinaag̵i kayi edlig-enan din is kedtuu niw wey niw zaan maantus is merasey he iring te ibpaantus kenami.

⁷ Umba kenà duwazuwa is kedsarig dey keniyu su netuenan dey he emun ed-entusen niw is merasey he iring te naantus dey zaan, ne iring din ded daan, edtevangan kew te Megbevayà iring te edtevangan key zin daan.

⁸ Su egkesuatan dey, menge suled, he metueni niw is dekelà he samuk dey hein diyè key te prubinsya he Asya. Utew merasey is penggezam kenami he kenè dey pezem egkeantus umba kunaan dey ke ibpatey zey.

⁹ Henduen be te iyan en haazà ketepusan te untung dey, iyan, umba nehitavù heini zini te kenami su wey key kenà mekesarig te kenami zà he ketau, kekenà, wey key mekesarig te Megbevayà he iyan ebpemanhew te menge minatey.

¹⁰ Ne midtevangan key te Megbevayà ne midlig-enan key zin, umba nelibri key ne wazè key mehimetayi. Ne netuenan dey he ebpenigudu sikandin he edtavang kenami. Dekelà is kedsarig dey he kenè key zin ed-engkezan te edtavang.

¹¹ Ne kinahanglan he edtevangan key zaan keniyu pinaag̵i te ked-ampù. Ne human egkehimu he mezakel is ebpeselamat te Megbevayà tenged te g̵ag̵ew zin kenami tenged te ked-ampù te mezakel he menge etew.

Is Kebisita Pezem ni Pablo

¹² Duen, menge suled, idantal zey ne netuenan dey he tutuu heini, ne iyan is: layun meupiya is ulaula zey ziyà te minsan hentei he etew, lavew en diyan te keniyu. Su layun key edtuman te egkesuatan te Megbevayà ne utew hustu is tuyù dey. Wazè dey g̵emita is ketau zey te etew zà duen, kekenà, iyan igkehimuwa zey te langun is mekeg̵eg̵ehem he tavang te Megbevayà.

¹³ Iyan dey zà idtag̵ù te surat emun ebpeuwitan dey sikiyu te surat is egkevasa niw wey egkesavut niw. Ne egkesuatan ku he egkepurung niw egkesavut

¹⁴ haazà is wazè niw pa maamin mesavut mehitenged te ed-ul-ulahan dey su wey zutun te andew te kedlikù te Nengazen tew he si Jesus, mehimu he igkelipey key keniyu iring te igkelipey zey zaan sikiyu.

¹⁵ Ne g̵eina te netuenan ku he siguradu nesavut niw en heini, neisip ku he edhuna a ebpenumbaley ziyan te keniyu su wey kezezuwa ku sikiyu metevangi

¹⁶ su iyan pezem dini te isip ku is: edtuluy a ziyan ke edhendiyà a te Mesidunya ne emun ed-ulì a ne edtuluy e zed maan diyan te keniyu su wey a zaan metevangi keniyu zutun te kedhendiyè ku te prubinsya he Hudiya.

¹⁷ Ne g̵eina te wazè ku heini metuman kunaan niw vuwa ke layun edhalinhalin is isip ku. Kunaan niw vuwa zaan ke iring is menge isip ku te isip te etew he iyan ebayàbayà kandin is kandin dà he mezaat he suat. Kunaan niw ke zutun te kegkag̵i ku he ebpehendiyan a ne iyan bes neseled dini te g̵ehinawa ku is kenà a ebpehendiyan.

¹⁸ Emun tutuu is egkeg̵iyen te Megbevayà, ne tutuu zaan heini is egkeg̵iyen ku. Su is neseled diyà te g̵ehinawa ku ne kinahanglan he edtumanen ku.

¹⁹ Sikami engki Silas wey si Timoteo, impenudtul zey ziyan te keniyu kes Anak te Megbevayà he iyan si Jesu Kristu. Ne netuenan niw he metinumanen sikandin te lalag din ne kenà egkehimu he kenè din edtumanen is penaad din.

²⁰ Su pinaag̵i kandin edtumanen is langun he menge penaad te Megbevayà. Ne tenged kayi ebpekekag̵i kiw he venar iyan he metinumanen sikandin ne tenged kayi egkezalig is Megbevayà.

²¹ Su is Megbevayà, ne iyan edheg̵et te kedtuu tew ki Jesu Kristu ne iyan sikandin mibpilì kenitew

²² ne mibeg̵ayan kiw zin te g̵ehem he tuus he menge g̵aked kiw zin, ne midhimu zin he ulini kiw te Wag̵as he Mulin-ulin he iyan tuus he edtumanen din is minsan hengkey he penaad din kenitew.

²³ Siluti a te Megbevayà emun kenà tutuu is egkeg̵iyen ku. Netuenan din he iyan ketezengan ke maan is wazà a mekepenumbaley ziyan te Kurintu su wey kenè kew meseeng pinaag̵i te kedsusiya ku te menge ulaula niw.

²⁴ Kenè dey egkesuatan he ebayàbayè key ke hengkey is edtuuwan niw su netuenan dey he meheg̵et en is kedtuu niw. Egkesuatan dey zà he mehimu key he timbang niw te ebpeveelan kenitew te Megbevayà su wey kew melipey.