2 Juan 1 - Manobo Western Bukidnon

¹ Siak is meg̵urang, ebpesuratan ku sikew is bahi he pinilì te Megbevayà wey is menge anak nu. Utew kew mahal zini te g̵ehinawa ku ne kenà dini zà te kedì he g̵ehinawa, kekenà, mahal kew zaan diyà te langun he neketuu te tutuu he tuluuwen.

² Umba minahal zey sikiyu su g̵eina te midhamen kiw en te tutuu he tuluuwen ne heini is tutuu he tuluuwen, kenà egkeawà dini te kenitew te wazà pidtemanan.

³ Is Amey tew he Megbevayà wey si Jesu Kristu he Anak din, berakat he meg̵eg̵awi zan kenitew, ikehizu kiw zan, ne veg̵ayi kiw zan te melinawen he kebpekesavuk. Egkehimu heini su midhamen kiw te tutuu he tuluuwen wey ebmahalen tew is menge zuma tew.

⁴ Nelipey ad utew su zuen menge anak nu he edtuman te tutuu he tuluuwen sumalà is insug̵ù kenitew te Amey tew he Megbevayà.

⁵ Ne tenged dutun, Bayi, edhengyuen ku he egig̵ineg̵awè kiw. Kenà beg̵u heini he sug̵ù is idsurat ku kayi, su zaan heini zuen te aney tew en kedtuu.

⁶ Su emun egig̵ineg̵awè kiw, egketuman tew is menge sug̵ù te Megbevayà. Su iyan sug̵ù din kenitew is: kinahanglan he egig̵ineg̵awè kiw.

⁷ Mezakel is nemenlepew he ebpenurù te tarù dini te kelibutan. Egkeg̵iyen dan he si Jesus is mibpilì te Megbevayà he ibpahadì, wazà sikandin mehimu he etew. Is minsan hentei he iyan haazà egkeg̵iyen dan, teruen sikandin wey kuntada ni Kristu.

⁸ Andam kew wey kenà maawà diyan te keniyu is midheg̵uan niw su wey kenà meterini keuzemà is suhul te Megbevayà keniyu.

⁹ Ke zuen etew he ed-engkezan din is tutuu he tuluuwen he impenurù ni Kristu su iyan edhemenan din is tarù he tuluuwen he in-uman din dutun, wazà sikandin mebpekidsevaha te Megbevayà. Is minsan hentei mulà he edhemenan din is tutuu he tuluuwen, iyan sikandin mibpekidsevaha te Amey tew he Megbevayà wey is Anak din.

¹⁰ Ke zuen ebpekeuma he minsan hentei he ebpenurù te tuluuwen ne kenè din iyan ibpenurù is tutuu he tuluuwen he impenurù ni Kristu, kenè niw ipepemenahik diyan te valey niw. Kenè niw zaan igalewg̵alew sikandin.

¹¹ Su minsan ke igalewg̵alew niw zà sikandin, egketevangan niw sikandin dutun te ulaula zin he mezaat.

¹² Mezakel pezem is egkeg̵iyen ku keniyu, iyan, kenè ku egkesuatan te edsurat. Egkesuatan ku he ebpenumbaley a ziyan wey kiw mekedlelalag ne wey meheg̵et is kelipey tew.

¹³ Ebpengemusta keniyu is menge anak te suled nu he vahi zini he pinilì daan te Megbevayà.