1 Tiselunika 4 - Manobo Western Bukidnon

Is Meupiya he Betasan

¹ Ne g̵untaan, menge suled, tenged te kegkesevaha tew te Nengazen tew he si Jesus, duen ebuyuen dey wey edhengyuen dey ziyan te keniyu. Impenurù dey keniyu is ed-ul-ulahan he egkesuatan te Megbevayà, ne mid-ulaula niw en. Iyan, edhengyuen dey keniyu he ipeiseg niw pa is ked-ul-ulaha niw kayi.

² Netuenan niw is insug̵ù dey keniyu he ebpuun te Nengazen tew he si Jesus.

³ Iyan egkesuatan te Megbevayà is: kinahanglan he zait is menge ulaula niw te etew he g̵aked din. Kinahanglan he kenè niw hileveti is kenè niw esawa.

⁴ Kinahanglan he is uman sevaha keniyu te menge maama, ne mebpengesawa te paag̵i he meupiya wey kenà meremerik,

⁵ ne kenà tenged te egkeveyveyaan sikandin te suat te lawa zin, su iyan heeyan egkeulaula te menge etew he wazà medtuu te Megbevayà.

⁶ Kinahanglan he wazà minsan hentei he ebpekesalà wey ed-akal te zuma zin pinaag̵i te menge ulaula he iring kayi. Su edsilutan te Megbevayà is ed-ulaula te iring dutun. Heini impurung dey ipenurù keniyu.

⁷ Su nehimu kiw te Megbevayà he menge tumutuu kandin su wey mehimu is menge ulaula tew he zait te etew he g̵aked din. Kenà iyan din egkesuatan he meremerik is menge ulaula tew.

⁸ Emun ebpesegdanen niw heini is penurù ku keniyu, kenè niw iyan dà egkepesagdan is penurù te etew, kekenà, iyan niw egkepesagdan is penurù te Megbevayà. Iyan sikandin kes mibeg̵ey kenitew te Wag̵as he Mulin-ulin.

⁹ Ne wazè en kinahanglan he ibpenurù ku pa keniyu he mahala niw ziyà te g̵ehinawa niw is menge zuma niw he tumutuu su impenurù en heini keniyu te Megbevayà.

¹⁰ Netuenan ku he ebmahalen niw en is menge tumutuu ziyà te tivuuk he prubinsya he Mesidunya. Ne edhengyuan dey pa sikiyu, menge suled, he ipeiseg niw pa is kebmahala niw ziyà te g̵ehinawa niw te langun.

¹¹ Ne kenà duen dà taman su iyan layun pen-ahaa niw is melinew he kebpekesavuk. Tegteg̵ami te uman sevaha is kandin dà he vaal. Medhag̵ù sikandin wey zin mekuwa is igkeuyag din. Daan heini he insug̵ù dey keniyu.

¹² Ne emun ebeelan niw heini edtehuzen kew te menge etew he kenè pa tumutuu, ne zutun kenè en daan kinahanglan he ebpekevuyù kew te igkeuyag niw ziyà te minsan hentei.

Is Kedlikù te Nengazen

¹³ Menge suled, egkesuatan dey he metueni niw is egkeulaula te menge tumutuu he minatey en su wey kew kenà meseeng iring te kegkeseeng te zuma he menge etew he kenè dan egkeperateng he egkevanhew sikandan.

¹⁴ Midtuu kiw he mibpatey si Jesus ne nevanhew ne edlikù keuzemà. Iring din daan kes menge tumutuu he minatey en su ebenhawen ne ibpezuma sikandan te Megbevayà ki Jesus keuzemà te kedlikù din.

¹⁵ Lalag en te Nengazen heini is egkeg̵iyen dey keniyu ne iyan is: sikitew is uuyag pa keuzemà te timpu te kedlikù te Nengazen, kenè kiw egkehuna te menge tumutuu he minatey en.

¹⁶ Su ebpuun te langit ebpenaug is Nengazen he edtawag kenitew, ne egkezineg tew is ked-umew te lavew he velinsug̵uen te Megbevayà wey is budyung he ibpezag̵ing te Megbevayà. Ne egkehuna egkevanhew is menge tumutuu ki Kristu he nemematey en.

¹⁷ Ne human kiw is menge uuyag pa, ebpekezuma kiw zaan kandan diyà te menge g̵apun su edtelavuk kiw te Nengazen diyà te zivavew. Ne zutun kenè kiw en ebpekesuwey te Nengazen te wazà pidtemanan.

¹⁸ Umba ipedlilipayè niw heini is egkeg̵iyen ku.