1 Tiselunika 2 - Manobo Western Bukidnon

Is Kebpenurù ni Pablo

¹ Menge suled, netuenan niw en he mibpulus is kedhendiyan dey te inged niw.

² Su wazè niw melipati is nehitavù kenami ziyà te inged he Pilipus hein wazè key pa mekeuma ziyan te Tiselunika. Wazè key zan urami te kebpemug̵el wey te kebpeelimungawi. Ne minsan pa zutun, tenged te kedtavang te Megbevayà wazè key mahandek he ebpenudtul ziyan te keniyu te Meupiya he Tudtulanen he ebpuun diyà te kandin, iyan, nereg̵enan key utew.

³ Is kedwali zey ziyà te menge etew, ne kenà ebpuun te sayep wey te meremerik he tuyù. Kenè key edtarùtarù te minsan hentei.

⁴ Nezawat key te Megbevayà ne insarig din kenami is kebpesavut te Meupiya he Tudtulanen, ne tenged kayi ebpenudtul key. Kenè dey iyan tuyù is kebpenunuata te menge etew su iyan tuyù dey is kebpenunuata te Megbevayà. Iyan sikandin metau he ebpenggezam kenitew wey metueni he hustu is tuyù dey.

⁵ Netuenan niw he kes menge lalag dey, kenà kedigdig dà. Kenà ibpenapì kes mid-ulaula zey ziyan. Is Megbevayà, iyan ebpeketistig̵us kayi.

⁶ Wazè key mebpezalig keniyu; wazè key zaan mebpezalig te zuma. Geina te menge epustul key ni Kristu, egkehimu he edsug̵ùsug̵ù key zaan keniyu, iyan, wazè dey heini ul-ulaha.

⁷ Mibpurungan dey sikiyu; iring key te iney he metulanged te menge anak din.

⁸ Utew kew mahal kayi te g̵ehinawa zey, umba kenà iyan dey zà egkesuatan is kedweliyi zey keniyu te Meupiya he Tudtulanen he ebpuun te Megbevayà, kekenà, ebpekid-uunungen key en daan keniyu su utew zey sikiyu minahal.

⁹ Menge suled, kenè niw vuwa egkelipatan is kedhag̵ù dey ziyan te kebaal. Su hein impesavut dey keniyu is Meupiya he Tudtulanen he ebpuun te Megbevayà, mibpenigudu key zaan medhag̵ù te maandew se mezukilem wey key mekekuwa te keuyag̵an dey wey key kenà mekesamuk keniyu.

¹⁰ Ebpeketistig̵us kew, ne ebpeketistig̵us daan is Megbevayà he hein diyan key te keniyu te nemeketuu wazà igkesewayi te menge ulaula zey, kekenà, metazeng key wey metinumanen key te egkesuatan te Megbevayà.

¹¹ Netuenan niw he is mid-ulaula zey ziyà te kada sevaha keniyu, ne meupiya su iring te ed-ul-ulahan te amey ziyà te menge anak din.

¹² Midsembag̵an dey sikiyu; iyan key midlangan te g̵ehinawa niw ne midhengyuan dey sikiyu he med-ulaula kew te sungkad te egkesuatan te Megbevayà. Iyan sikandin midhimu keniyu he tumutuu wey kew zin mehedii wey kew tulusa.

¹³ Ne elin daan layun dey ibpeselemati te Megbevayà is: hein impesavut dey keniyu is Lalag te Megbevayà, midawat niw su nesavut niw he Lalag te Megbevayà ne kenà lalag te etew zà duen. Su pinaag̵i te lalag din egkelig-enan is kedtuu tew te nemeketuu kandin.

¹⁴ Kes menge g̵aked te Megbevayà he ziyà te prubinsya he Hudiya he menge tumutuu ki Jesu Kristu, neiringan niw sikandan. Su iring te kedresaya kandan te menge zuma zan he Hudiyu, midrasey kew zaan te menge zuma niw he kenà menge Hudiyu.

¹⁵ Is menge Hudiyu, iyan kes midhimatey te ebpemeneuven te Megbevayà dengan wey te Nengazen tew zaan he si Jesus. Ne mid-avug key zan daan. Utew supak is menge ulaula zan te egkesuatan te Megbevayà,

¹⁶ ne iring te egkuntedahan dan is tivuuk he menusiyà, su edsemuken key zan wey zey kenà ikesangyew is Lalag te Megbevayà he igkelibri te silut te menge etew he kenà menge Hudiyu. Ne ebpeniguduwan dan te ebaal is taman te egkehimu zan he salà. Ne g̵untaan in-andam en is silut kandan te Megbevayà.

Is Kebulunga ni Pablo

¹⁷ Ne sikami, menge suled, hein neewaan dey sikiyu seled te meg̵aan dà, wazè dey sikiyu melipati, kekenà, utew key ebulunga keniyu ne layun key pezem egkesuat he ebpenumbaley ziyan.

¹⁸ Ne tenged kayi layun dey egkeisip he edlikù key pezem diyan te Tiselunika. Siak si Pablo, layun ku egkeisip is iring dutun, iyan, mibangen key ni Setanas, umba wazè key mekelaus.

¹⁹ Umba egkesuatan ku he ed-uman a ebpenumbaley ziyan su tenged keniyu utew meheg̵et is kebperetenga zey te kedlikù ni Jesus su iyan kew igkelipey zey. Tenged keniyu kenè key egkeeled keuzemà, kekenà, igkezantal zey is kedtuu niw emun ed-etuvang kiw ki Jesus dutun te kedlikù din.

²⁰ Uya, iyan kew iyan igkezantal zey; iyan kew igkelipey zey.