1 Tiselunika 1 - Manobo Western Bukidnon

¹ Sikami si Pablo, si Silas, wey si Timoteo, ebpesuratan dey sikiyu is menge tumutuu he menge tigTiselunika he g̵aked te Amey tew he Megbevayà wey g̵aked te Nengazen tew he si Jesu Kristu. Berakat he ikeg̵ag̵ew kew te Megbevayà ne veg̵ayi kew zin te melinawen he kebpekesavuk.

Is Kedtuu te Menge TigTiselunika

² Dekelà layun is kebpeselemati zey te Megbevayà tenged keniyu ne layun dey sikiyu id-ampù.

³ Su emun ed-ampù key te Megbevayà he Amey tew kenè dey egkelipatan is kedtuu niw, wey is kebmahala niw, wey is kebperateng niw te Nengazen tew he si Jesu Kristu. Su egketuusan is kedtuu niw kandin pinaag̵i te ulaula niw, ne pinaag̵i te kedhag̵ù niw egketuusan daan is kebmahala niw kandin diyà te g̵ehinawa niw. Ne egketuusan daan is kebperateng niw kandin pinaag̵i te kebmeinentusen niw.

⁴ Ne menge suled he minahal te Megbevayà, netuenan dey he pinilì kew zin

⁵ su impesavut dey keniyu is Meupiya he Tudtulanen, kenà pinaag̵i te lalag dey zà, kekenà, pinaag̵i te g̵ehem te Wag̵as he Mulin-ulin. Midheg̵et te Megbevayà dutun is kedsevuta zey kayi. Ne netuenan niw zaan ke hengkey is menge ulaula zey he meupiya wey kew mezeyzey hein diyan key te keniyu.

⁶ Ne sikiyu zaan, mid-iringan niw is mid-ulaula zey wey is mid-ulaula zengan te Nengazen tew he si Jesus su midawat niw is Lalag te Megbevayà minsan nekeag̵i kew te kemeresayan tenged te kedawat niw. Ne minsan pa te nerasey kew, nelipey kew zed tenged te ked-ulini keniyu te Wag̵as he Mulin-ulin.

⁷ Tenged kayi iyan kew ed-iringan te langun he menge zuma he tumutuu ziyan te prubinsya he Mesidunya wey ziyà daan te prubinsya he Gerisya.

⁸ Ebpuun diyan nekeeneb is Lalag te Nengazen, kenà diyan dà te prubinsya he Mesidunya wey ziyà te prubinsya he Gerisya, kekenà, is menge etew ziyà te minsan hendei, nezineg dan is tudtul mehitenged te kedtuu niw te Megbevayà. Wazè en kinahanglan he ibpenudtul zey pa ziyà te menge etew is kedtuu niw.

⁹ Nezineg dan en ne iyan sikandan ebpenudtul mehitenged te kegelg̵elawa niw kenami. Ebpenudtul zan he mid-engkezan niw kes ked-azap te menge kenà tutuu he ed-ezapen. Mid-engkezan niw kun wey kew mekeazap te tutuu he Megbevayà he wazè din kemetayen.

¹⁰ Su edteg̵azan niw kun is kedlikù te Anak din he ebpuun te langit. Iyan si Jesus he Anak te Megbevayà he mibanhew zin. Iyan si Jesus he midlibri kenitew te silut wey kiw mekeliyu te ebpekeuma he kedlimasa te Megbevayà te menusiyà.