1 Timoteo 5 - Manobo Western Bukidnon

Is Ketengdanan te Menge Tumutuu

¹ Kenè nu bensag̵i is meg̵urang, kekenà, sembag̵i nu he iring te amey nu en. Sembag̵i nu zaan is menge menguhed he maama he iring te menge suled nu en.

² Is menge vahi he meg̵urang en, sembag̵i nu zaan he iring te iney nu en wey is menge menguhed he vahi, sembag̵i nu sikandan he iring te menge etevey nu en. Ne kinahanglan he utew hustu is ked-isipa nu kayi ziyà te kandan.

³ Purungi niw is menge valu he vahi he wazè dan egkeserig̵an te keuyag̵an dan.

⁴ Ke zuen balu he vahi he zuen din menge anak wey menge apù, ipenurù nu kandan ke hengkey is ed-ul-ulahan dan wey zan metahud is ginikanan dan wey zan meverasi. Iyan heini egkesuatan te Megbevayà.

⁵ Ne sikan is balu he vahi he wazè din egkeserig̵an te keuyag̵an din, iyan din dà egkeserig̵an is Megbevayà, ne maandew wey mezukilem ed-ampù wey ebuyù te tavang diyà te Megbevayà.

⁶ Iyan, haazà is balu he vahi he iyan dà mulà egkesuatan din is menge kelibutanen he kelipey, minsan ke uuyag pa, iring sikandin te minatey en.

⁷ Heini is impenurù ku, ipurung nu isug̵ù diyà te menge tumutuu ziyan su wey wazà igkesewayi kandan.

⁸ Su ke zuen tumutuu he kenè din ed-elimahan is menge edsarig kandin, lavew en sikandan he ziyà ed-ubpà te valey zin, mid-engkezan din en is kedtumana zin te tuluuwen tew. Meupiya pa sikan is wazà meketuu kenà sikandin.

⁹ Kenè niw ilista is balu he vahi he minus pa te keneman is penuig̵an din. Kinahanglan he wazè din selselai is esawa zin.

¹⁰ Ne kinahanglan daan he nevantug sikandin tenged te menge vaal zin he meupiya iring te ked-elimahi te menge vatà, ked-elimahi te menge meg̵eliyug; nekelùlù sikandin te paa te menge tumutuu, midtavang sikandin te nengeseeng wey mibeelan din is minsan hengkey he menge meupiya.

¹¹ Kenè niw ilista is menge menguhed he menge valu he vahi su zuen timpu he pinaag̵i te suat te lawa zan, egkesuat dan pa he ebpeesawa ebpeuman.

¹² Ne pinaag̵i zutun ebpekesalè dan su kenè dan edtumanen is pesarig dan ki Kristu.

¹³ Ne kenà duen dà taman su melemu zan ebpetetapul ne layun dan ebpenumbaley ziyà te menge valey, ne kenà iyan dà haazà su egkehimu zan daan he vereituk, ne ebpekekevut dan te wazè dan kelavet duen ne ebenteenan dan is kenà meupiya he ebenteenan.

¹⁴ Ne tenged kayi egkesuatan ku he mebpeuman mebpeesawa is menge menguhed he valu he vahi su wey mekeanak sikandan ne med-elima te pemilya zan. Ne zutun wazà igkesewayi kandan te menge kuntada tew.

¹⁵ Umba egkeg̵iyen ku heini su zuen menge valu he vahi he mid-engkezan dan is kedsunud dan ki Kristu ne ebpezumdumahan dan si Setanas.

¹⁶ Ke zuen tumutuu he vahi he zuen menge keg̵apì din he valu he vahi, kinahanglan he elimahi zin. Kenè din serig̵i is duma he tumutuu he iyan ed-elima su wey kenà mesemuki is menge tumutuu he ed-elima te zuma he menge valu he vahi he wazà egkeserig̵an.

¹⁷ Is menge ebmeg̵urangen he meupiya is ked-uwita zan te menge tumutuu, kinahanglan he isipa niw sikandan he zait he edtekepen is suhul kandan, lavew en sikandan is dekelà is baal zan te kedwali wey kebpenurù.

¹⁸ Iring sikandan te vaka he ibpeg̵unas su zuen insurat he Lalag te Megbevayà he edhenduen te, “Is ibpeg̵unas he vaka, kinahanglan he kenè niw ebusalan,” ne heini zaan, “Is etew he edterebahu, dait sikandin he edsuhulan.”

¹⁹ Kenè niw pemineg̵a is edsumbung te ebmeg̵urangen te menge tumutuu ke wazà dezuwa wey ke tetelu ve he ebpeketistig̵us te idsumbung.

²⁰ Is ebmeg̵urangen he layun ebpekesalà, sewaya nu ziyà te etuvangan te menge tumutuu su wey mahandek is menge zuma he ebmeg̵urangen.

²¹ Edteleenan ku sikew he purungi nu tumana heini is insug̵ù ku kenikew. Iyan ebpeketistig̵us kayi is Megbevayà, si Jesu Kristu, wey is menge pinilì din he velinsug̵uen. Kinahanglan he te minsan hengkey he ed-ul-ulahan nu wazè nu zepig̵i he minsan hentei. Ke edhusey ka kinahanglan he iyan nu pemineg̵a kes ebpekevenar.

²² Kinahanglan he kenè nu zegdeg̵usuwi is kebpilì nu te ed-uwit te menge tumutuu su ke ebpekesalà sikandin iyan ka egkevesulan. Ne kinahanglan he wazà igkevesuli kenikew he iring kayi.

²³ Ne elin daan sambag ku kenikew is: kenè nu iyan dà inuma is wahig, kekenà, inum ka zaan te zeisey he vinu su wey mevewii is getek nu wey is mezakel he zaru nu.

²⁴ Duen menge etew he kenè en ebpekeeles is menge mezaat he vaal zan ne netuenan te langun te wazè pa sikandan imbistigaha. Ne zuen daan menge etew he nekeeles is menge mezaat he vaal zan ne wey zà heini egketueni ke ed-imbistigahan.

²⁵ Ne iring din ded daan duen menge etew he kenà ebpekeeles is menge vaal zan he meupiya ne zuen daan menge etew he kenà egketuenan is menge vaal zan he meupiya, iyan, duen timpu he egketuenan ded daan heini.