1 Timoteo 4 - Manobo Western Bukidnon

Is Tarù he Ketudluanan

¹ Utew keladu is impesavut te Wag̵as he Mulin-ulin he keuzemà te ketepusan he timpu zuen menge etew he kenè en edtuu te tutuu he tuluuwen, kekenà, iyan ebpemineg̵en dan is impinted te menge teruen he menge mulin-ulin. Ebpemineg̵en dan is impenurù kandan te menge mezaat he mulin-ulin

² pinaag̵i te menge tarù te menge uvag kun tumutuu he kenè en ibmezaat te g̵ehinawa zan is menge mezaat he ulaula zan.

³ Ibpenurù dan he indawey te Megbevayà is kebpengesawa ne egkeg̵iyen dan he zuen menge egkeenen he indawey zaan. Iyan, heini is menge egkeenen, midlimbag te Megbevayà he egkeenen tew te menge tumutuu he nekesavut te tutuu he tuluuwen. Ne kinahanglan he ebpeselematan tew te Megbevayà emun egkeenen tew.

⁴ Meupiya is minsan hengkey he egkeenen he midlimbag te Megbevayà ne kinahanglan he kenè tew egkeg̵iyen he mezaat is minsan hengkey, kekenà, edewaten tew wey ebpeselematan tew.

⁵ Netuenan ta he meupiya is kegkeena ta kayi tenged te iyan migkag̵i te Megbevayà wey tenged te ebpeselematan tew.

Is Metinumanen he Sulug̵uen

⁶ Emun ibpenurù nu heini ziyà te menge zuma he tumutuu egkehimu ka he metinumanen he sulug̵uen ni Jesu Kristu. Ne egkeheg̵et is kedtuu nu pinaag̵i te ked-istudyu nu te tuluuwen tew wey pinaag̵i te kedhamen nu te hustu he impenurù kenikew.

⁷ Iyan, likayi nu is menge penurù he menge tarù he g̵ug̵ud he kenà dait te Megbevayà. Purungi nu tumana is egkesuatan te Megbevayà.

⁸ Duen deisek he pulus te kedlumbaza te lawa, iyan, utew zekelà is pulus te kedlumbaza te kedtuu ta su iyan ibmeupiya te kebpekesavuk tew minsan guntaan wey lavew en keuzemà ke ziyà ki en te langit.

⁹ Erubasa heini he utew tutuu ne kinahanglan he tuuwi te langun.

¹⁰ Tenged kayi ebpenigudu ki edhag̵ù wey metuuwi heini te langun he menge etew su nekesarig ki en te wazè din kemetayen he Megbevayà ne iyan sikandin Menluluwas te langun he menge etew, lavew en is menge tumutuu kandin.

¹¹ Heini is menge sug̵ù ku wey penurù ku kenikew, isug̵ù nu wey ipenurù nu zaan diyà te menge zuma nu.

¹² Minsan pa te menguhed ke pa, kinahanglan he mezait ka he edtehuzen te minsan hentei; kinahanglan he iyan ka ed-iringan te menge tumutuu ki Kristu, ne tenged kayi kinahanglan he tegteg̵ami nu is kegkag̵ikag̵i nu, is ulaula nu, is kebmahala nu te langun, is kedsarig nu te Megbevayà, wey is kedlikayi nu te meremerik he ulaula.

¹³ Taman te kenè e pa ebpekeuma ziyan, iyan beeli nu is: besaha nu is Lalag te Megbevayà diyà te menge etew. Sembag̵i nu wey penurua nu sikandan.

¹⁴ Kenè nu lipati haazà is ketau he imbeg̵ey zengan kenikew te Megbevayà pinaag̵i te kebpenuvadtuvad te ebpeneuven wey pinaag̵i te kedempaa kenikew te menge ebmeg̵urangen.

¹⁵ Hemeni nu wey purungi nu is kedtumana nu kayi te langun su wey metueni te langun is layun ked-iseg te kebpeketuman nu te egkesuatan te Megbevayà.

¹⁶ Purungi nu susiya is kenikew he ulaula wey is kebpenurù nu. Su emun edhemenan nu heini kenà iyan ke zà is egkelibri te silut, kekenà, pinaag̵i kenikew egkehimu he egkelibri zaan is menge etew he ebpememineg te ibpenurù nu.