1 Timoteo 3 - Manobo Western Bukidnon

Is Ed-uwit te Menge Tumutuu

¹ Utew tutuu is erubasa he edhenduen te: Is maama he egkesuat he iyan sikandin ed-uwit te menge tumutuu, utew meupiya haazà is terebahu he egkesuatan din.

² Iyan, is ed-uwit te menge tumutuu, kinahanglan he wazà igkesewayi kandin. Sevaha zà is esawa zin ne kenè din selselai. Kinahanglan he egketengkaan layun is ed-ul-ulahan din; metau sikandin he ed-isip te hustu wey telehuzen sikandin. Kinahanglan he meelima sikandin te menge meg̵eliyug din. Kinahanglan daan he metau he ebpenurù.

³ Kenà sikandin lelenguten; kenà sikandin ebpemeg̵espeg̵es, kekenà, metulanged sikandin. Edlikayan din is samuk ne kenà susuaten te selapì.

⁴ Kinahanglan he meupiya is ked-uwita zin te esawa zin wey menge anak din. Kinahanglan he menge mepeveyveyaan wey metinehuzan layun is menge anak din kandin.

⁵ Su is maama he kenà metau he ed-uwit te esawa zin wey menge anak din, ebmenumenu sikandin he ed-uwit te menge etew he menge tumutuu te Megbevayà?

⁶ Ne kinahanglan daan he kenà sikandin beg̵u pa he tumutuu, su kela ke mehimu he mepelevawen ne egkesilutan te Megbevayà iring te midsilutan si Setanas.

⁷ Kinahanglan he meupiya layun is menge ulaula zin su wey mehimu he telehuzen sikandin te menge etew he kenà tumutuu ki Kristu, su emun kenà, kela ke ituka zan ne egkeseleizan sikandin ni Setanas.

Is Edtavang te Menge Tumutuu

⁸ Ne iring din ded daan is menge diyekunu, he ke và dà egkeg̵iya, menge edtavang te menge tumutuu; kinahanglan he meupiya is menge ulaula zan. Kinahanglan he telehuzen sikandan; metinumanen sikandan te menge lalag dan. Kenè dan lelenguten, ne kenè dan mebmanggad pinaag̵i te limbung.

⁹ Kinahanglan he edhemenan dan te edtuu he kenà duwazuwa is menge tuluuwen he imbugnà kenitew te Megbevayà.

¹⁰ Ke zuen etew he ebpilien niw he diyekunu, kinahanglan he edsusiyen pa is menge ulaula zin. Ne emun wazà netuenan he mezaat he ulaula zin, egkehimu he ebpilien sikandin he diyekunu.

¹¹ Iring din ded daan is bahi he esawa te diyekunu su kinahanglan he telehuzen sikandin. Kenà menge vereituk, kekenà, egketengkaan is ked-isipa zin te langun wey egkengeserig̵an te minsan hengkey he meupiya he ulaula.

¹² Is diyekunu, ne kinahanglan he sevaha zà is esawa zin ne kenè din selselai. Kinahanglan daan he meupiya is ked-uwita zin te esawa zin wey menge anak din

¹³ su is diyekunu he meupiya is menge vaal zin te kedtavang din te menge tumutuu, telehuzen sikandin utew te menge etew ne egkehimu he kenè din igkehandek is kebpenurù din mehitenged te kedtuu zin ki Jesu Kristu.

Is Tutuu Mehitenged ki Jesu Kristu

¹⁴ Kayi te kedsurat ku, ebperetengen ku he meg̵aan e en ebpekepenumbaley ziyan te kenikew.

¹⁵ Umba ebpesuratan ku sikew su kela ke mesanggen a. Ne emun egkesanggen a egketuenan nu g̵ihapun ke hengkey is hustu he ed-ul-ulahan he zait tew te menge anak te Megbevayà. Iyan kiw iglisya, he ke và dà egkeg̵iya, menge tumutuu te wazè din kemetayen he Megbevayà. Iyan kiw kes menge tukud wey vangel he zutun mekesavuk is tutuu he tuluuwen.

¹⁶ Ne netuenan tew te langun he lavew pa te langun is imbugnà he tuluuwen he midtuuwan tew. Mibpeetew si Kristu; midtistig̵usan te Wag̵as he Mulin-ulin he metazeng sikandin; naahà sikandin te menge velinsug̵uen te Megbevayà; insangyew sikandin diyà te menge etew he kenà menge Hudiyu; duen menge tumutuu kandin dini te tivuuk he kelibutan; midtulus sikandin pehendiyà te langit.