1 Timoteo 1 - Manobo Western Bukidnon

^1-2 Sikew, Timoteo he iring te tutuu he anak ku tenged te kedtuu nu ki Kristu, ebpesuratan ku sikew. Iyan a si Pablo he epustul ni Jesu Kristu, he ke và dà egkeg̵iya, sulug̵uen e zin. Nehimu a he epustul mehitenged te sug̵ù te Megbevayà he iyan midlibri kenitew te silut wey mehitenged te sug̵ù ni Jesu Kristu. Iyan sikandin egkeserig̵an ta. Berakat he ikeg̵ag̵ew ka wey kehizuwi ka te Amey tew he Megbevayà wey te Nengazen tew he si Jesu Kristu wey veg̵ayi ke zan te melinawen he kebpekesavuk.

Is Kedewaya te Teruen he Menunudlù

³ Ed-umanan ku egkeg̵iya kenikew is sambag ku hein mid-awà a ziyan pehendiyà te Mesidunya. Iyan is: kenè ka med-awà diyan te Ipisu. Iyan idsembag̵i ku kenikew su zuen menge etew ziyan he kinahanglan he zewaya nu. Dewaya nu he med-engked dan te kebpenurù te menge sayep he tuluuwen

⁴ wey med-engked dan te ked-istudyu te menge sayep he menge g̵ug̵ud, wey te menge melug̵ayad he g̵ug̵ud te kepuun te menge etew. Su emun iyan heini ed-istudyuwan dan ebpekidlewanè dan dà ke hengkey is hustu. Kenà egkehimu he pinaag̵i kayi egketuenan ta is ibpesavut te Megbevayà pinaag̵i te kedtuu.

⁵ Ne kinahanglan he iyan ketezengan ke maan is idsug̵ù nu kandan heini su wey zan mahala is menge zuma zan diyà te g̵ehinawa zan. Ne kenà egkehimu he hustu is kebmahala ta te menge zuma ta emun wazè ki melumpiyuwi te Megbevayà duen te menge salè ta. Kinahanglan he iyan dà ed-ul-ulahan ta is netuenan ta he hustu ne kinahanglan daan he tutuu is kedtuu ta te tutuu he tuluuwen ne zutun human hustu is kebmahala ta te menge zuma ta.

⁶ Duen diyan menge etew he wazè dan meseg̵ipà heini. Iyan dan impelavi is kebpekidlewanà mehitenged te wazè din pulus.

⁷ Su minsan pa te egkesuatan dan pezem he menge menunudlù sikandan te kesug̵uan he imbilinbilin ni Moises wazè dan hanew te egkeg̵iyen dan wey wazè dan mesavut is tuluuwen dan he idteg̵el zan diyà te zuma he menge etew.

⁸ Netuenan ta he meupiya is kesug̵uan he imbilinbilin ni Moises ke hustu is kegemita ta kayi.

⁹ Iyan, wazà isug̵ù heini su wey mezawey is menge metazeng he etew, kekenà, insug̵ù heini su wey mezawey is menge mesinupaken, menge kenà metinumanen, menge kenà edtuu te Megbevayà, menge selaan, menge lalung wey menge kenà edtahud te Megbevayà, menge ebunù te amey wey iney zan, menge teremunù,

¹⁰ menge egkevut te kenè dan esawa, menge maama he egkeerig̵an te iring dan he maama, menge menggeg̵ebpà, menge teruen, menge ebpen-ulug te kewsa wey is minsan hentei he ebpekesupak is ulaula zin te hustu he tuluuwen.

¹¹ Ne heini is hustu he tuluuwen, ne ebpuun te Meupiya he Tudtulanen mehitenged te utew zekelà he g̵ehem te Megbevayà. Is Megbevayà he iyan dait he edelig̵en, insarig din kedì heini is tudtulanen wey ku mesangyew.

Is Gag̵ew te Megbevayà

¹² Ebpeselematan ku is Nengazen tew he si Jesu Kristu su mibeg̵ayan e zin te zesen wey ku metuman heini is ebpeveelan din kedì. Mid-isip e zin he metinumanen ne tenged kayi intezù e zin he sulug̵uen din.

¹³ Dengan, mezaat is menge lalag ku mehitenged kandin; midrasey ku is menge sumusundan din ne midsumpalit ku sikandin. Ne minsan pa zutun, nehizuwan e zin su nehimu ku is menge mezaat he vaal ku tenged te wazè ku pa metueni is tutuu he tuluuwen wey wazè ku pa sikandin tuuwi.

¹⁴ Ne kenà dutun dà taman su utew ad ingkeg̵ag̵ew te Megbevayà ne g̵untaan neketuu ad ki Jesu Kristu ne utew en sikandin mahal zini te g̵ehinawa ku.

¹⁵ Duen erubasa he utew tutuu ne kinahanglan he tuuwi te minsan hentei; ne iyan is: “Midhendini si Jesu Kristu te kelibutan wey zin libriya te silut is menge mekesesalà.” Ne siak, iyan a tuwas he lalung te langun kandan.

¹⁶ Ne minsan pa zutun, nehizuwan a g̵ihapun te Megbevayà su wey pinaag̵i te kebpelevaya zin kedì te utew lalung, ikepezayag ni Jesu Kristu he utew mepelevayen sikandin. Impezayag din heini su wey mesavut heini te langun he menge etew he edtuu kandin keuzemà ne ebeg̵ayan din te untung he wazà pidtemanan.

¹⁷ Kes sebsevaha zà he Megbevayà, kenà egkeahà. Iyan sikandin hadì te minsan hengkey ne wazè din kemetayen; berakat he tehuza wey zelig̵a sikandin te wazè din pidtemanan.

¹⁸ Ne sikew, Timoteo he anak ku, edteleenan ku sikew he ipenurù nu te menge etew heini is migkag̵i ku. Sungkad heini te netagnà dengan mehitenged kenikew. Ne idtelaan ku zaan he sumalà haazà is netagnà, pekezesen ka te kedsundaru nu tenged ki Jesu Kristu.

¹⁹ Iyan gumaan nu is kedtuu nu te tutuu he tuluuwen wey is kedtumana nu te langun he netuenan nu he hustu. Duen menge etew he wazè dan tumana is netuenan dan he hustu ne tenged kayi nezeetan en is kedtuu zan te Megbevayà.

²⁰ Duma kayi si Himinyu wey si Alejandro. Impevayàbayè ku si Setanas kandan wey ikepenurù kandan he kenè dan sumpelita is Megbevayà.