1 Pedro 3 - Manobo Western Bukidnon

Is Kedepità te Teleesawa

¹ Sikiyu zaan is menge vahi, kinahanglan he pesakup kew te esawa niw ne zutun minsan ke kenè dan edtuu te Lalag te Megbevayà kela ke ebpeketuu zan ded ke egkeehè dan is menge ulaula niw he memeupiya. Su iyan heini egkehimu he wali niw kandan.

² Su egkeehè dan is kedtahud niw te Megbevayà wey is ulaula niw he wazà igkesewayi zuen.

³ Sikiyu is menge vahi, kenè niw isipa he iyan ibmekempet niw is pinaag̵i te utew subra he kedeyzeyani niw te vulvul niw wey te kedsul-uva niw te menge mahal he vutang iring te vulawan wey mahal he bisti.

⁴ Su kinahanglan he iyan ibmekempet niw is meupiya he ulaula he ebpuun te g̵ehinawa niw he iring te menayù he kegkag̵i, wey is melinawen he ulaula su is kekempet he iring kayi, ne kenà mulà egkeawà, ne utew mahal ziyà te Megbevayà.

⁵ Is menge vahi zengan he midsarig te Megbevayà, iyan heini kandan he inmekempet. Mibpesakup sikandan te menge esawa zan

⁶ he iring ki Sara he mibpesakup daan te esawa zin he si Abraham. Neisip din he egalen din si Abraham. Ne sikiyu is menge vahi g̵untaan, egkehimu kew he iring te menge anak ni Sara emun ed-iringan niw is ulaula zin he metazeng wey ke kenè niw idtug̵ut he egkesamuk is isip niw te kegkehandek.

⁷ Sikita zaan is maama, kinahanglan he ebpurungan ta wey edtehuzen ta is esawa ta. Su minsan pa te meluya is lawa zan kenà is kenita, iring sikandan kenita su imbeg̵ey zaan kandan te Megbevayà is untung he wazà pidtemanan. Ne tenged kayi kinahanglan he edtehuzen ta sikandan su wey pemineg̵a te Megbevayà is kebpengampù ta.

Is Ked-antus Tenged te Kedtinazeng

⁸ Duen pa egkeg̵iyen ku keniyu te langun ne iyan is: kinahanglan he mesevaha is isip niw wey g̵ehinawa niw. Mebpepurpurungè kew wey megig̵ineg̵awè kew su iring kew en te teltelesuled. Kinahanglan he memetulanged kew wey kenè kew menge mepelevawen.

⁹ Ke zuen ebpesipala keniyu kenè niw velesi te mezaat. Ke zuen edrawak keniyu kenè niw zaan penrewaki, kekenà, belesi niw te meupiya. Su umba midhimu kew te Megbevayà he menge tumutuu su wey kew zin metuvazi te meupiya.

¹⁰ Duen insurat he Lalag te Megbevayà he edhenduen te, “Sikan is egkesuat he meupiya is ked-ubpè din dini te kelibutan wey layun melipey, kinahanglan he kenà mezaat is kebpemèbè din ne kenà edtarùtarù.

¹¹ Engkezi zin en is memezaat he ulaula ne layun meupiya is menge ulaula zin. Layun din pen-ahaa is melinawen he kedepitè dan te menge zuma zin.

¹² Su iyan ebentayan te Megbevayà is memetazeng he etew; ebpemineg̵en din is ked-ampù dan. Iyan, egkuntedahan din mulà is ed-ulaula te mezaat.”

¹³ Wazà edhilavet keniyu ke edhamen kew te ked-ulaula te meupiya.

¹⁴ Iyan, minsan ke ebpekeantus kew te kebpesipala tenged te metazeng is ed-ul-ulahan niw, medlipey kew. Kenè kew mahandek te etew zà duen ne kenè kew meseeng.

¹⁵ Layun niw isipa he iyan egalen niw si Kristu. Layun niw endama is tavak ke zuen ed-insà keniyu ke maan is ebpekesarig kew te Megbevayà.

¹⁶ Mebmetinehuzen kew is edtavak wey menayù is kegkag̵i niw. Kinahanglan he wazà salà he netag̵ù diyà te g̵ehinawa niw te menge sumusundan ni Kristu su emun wazà ulaula niw he mezaat egkeeled is edsudì keniyu tenged te egkeg̵iyen dan.

¹⁷ Deyzey ke ebpekeantus ki te merasey tenged te metazeng is ulaula ta, ke iyan intuvad kenita te Megbevayà, kenà ke ebpekeantus ki te merasey tenged te mezaat is ulaula ta.

¹⁸ Kesevaha zà is kebpehimatey ni Kristu wey mepesaylu is menge salè tew. Mibpehimatey su wey mehimu sikandin is metazeng he elili tew te kenà memetazeng wey kiw mehimu he menge g̵aked te Megbevayà. Nepatey is lawa zin, iyan, nevanhew sikandin

¹⁹ ne mibeyaan din minsan is nengepirisu he g̵imukud te nemematey zengan ne midweliyan din sikandan.

²⁰ Iyan heini menge etew zengan he wazà mebpemineg te Megbevayà dutun te timpu zengan hein ebpelevayen din dà is memezaat he ulaula zan taman te nepasad ni Noe is kebeeli zin te arka. Walu zà he etew is nekeseled dutun te arka wey zan melibri te wahig.

²¹ Ne iyan teg̵ialung kayi te wahig is kebewtismu he ebpekelibri kenitew te silut. Ne haazà is kebewtismu, ne kenà iyan is kedlumpiyuwi te lawa tew ziyà te wahig, kekenà, iyan is kedhengyui tew te Megbevayà he maawè din is menge salè tew. Egkehimu heini tenged te mibanhew zin si Jesu Kristu.

²² Diyà si Jesus med-ulì te langit ne g̵untaan diyà sikandin ebpimpinuu te zapit te egkekewanan te Megbevayà tuus te utew lavew sikandin. Iyan sikandin ebayàbayà te langun he menge velinsug̵uen te Megbevayà wey te menge kedesenan wey te minsan hentei ziyà te langit he zuen din gehem.