1 Pedro 2 - Manobo Western Bukidnon

¹ Ne g̵eina te veg̵u ki en he etew, ed-iniyug̵an te en is minsan hengkey he kebpesipala wey is kedtarùtarù. Kinahanglan he kenà tarù is kedsundan ta te Megbevayà; kenè ki egkesina ne kenè ki ebpemenulà.

² Ed-iring ki zuen te vatà he kemulu pa edsusu he layun egkesuat te g̵atas. Kinahanglan he layun ki ed-inum te g̵atas he iyan is wag̵as he Lalag te Megbevayà su wey layun mebmezesen is kedtuu ta taman te timpu keuzemà he edtulusen ki te Megbevayà.

³ Su neg̵ezaman niw en he utew velig̵eg̵awen keniyu is Nengazen tew.

Is Batu he Zekelà is Pulus Din wey is Menge Etew he Gaked te Megbevayà

⁴ Pevayàbayè kew en te Nengazen tew he si Jesus he iyan ebeg̵ey te untung he wazà pidtemanan. Iring sikandin te vatu he pengawid te valey he kenà edewaten te menge pandey. Wazà sikandin dewata te menge etew, iyan, iyan sikandin mibpilì te Megbevayà su utew sikandin mahal.

⁵ Ne sikitew zaan is mibeg̵ayan te untung he wazà pidtemanan, ebpevayàbayè kiw kandin wey kiw zaan mehimu he iring te menge vatu he pengawid te valey he zutun ed-ezapa is Megbevayà. Ne zutun te valey zin edhimuwen kiw zin en he menge memumuhat he mibpilì din. Ne zutun, pinaag̵i te kedtavang ni Jesu Kristu, ebpekepemuhat kiw ne iyan pemuhat he egkesuatan din is: ed-ezapen tew sikandin pinaag̵i te Wag̵as he Mulin-ulin.

⁶ Su zuen insurat he Lalag te Megbevayà he edhenduen te, “Duen mibpilì ku he hadì he iring sikandin te vatu he mahal utew. Idsavuk ku sikandin diyà te inged he Siyun. Iring sikandin te melig-en he vatu he ebpeuntuzan te valey. Is minsan hentei he edsarig kandin, kenè en egkeanggà, su iyan sikandin sikan is tutuu he edserig̵an.” Iyan heini insurat he Lalag te Megbevayà.

⁷ Ne heini is hadì he iring te vatu, mahal utew sikandin dini te kenita te nekesarig en kandin, iyan, is langun he kenà edtuu, netuman pinaag̵i kandan is insurat he tagnà he edhenduen te, “Sikan is batu he himan te valey, mid-engkezan te menge pandey. Ne heini, nehimu en guntaan he vatu he iyan dà ebpekepurung te valey.”

⁸ Ne zuen daan tagnà he netuman he edhenduen te, “Iyan haazà sikan is batu he nesipà te menge etew; iyan haazà nekeseligkat kandan.” Wazè dan medtuu te Lalag te Megbevayà ne tenged dutun, sumalà is netagnà, nekeurambak sikandan su iyan imbanglis te Megbevayà dutun te kenà edtuu.

⁹ Iyan, sikitew mulà, pinilì kiw zin. Menge memumuhat kiw te mibpilì he hadì he iyan si Kristu. Iyan kiw menge sakup din; iyan kiw menge g̵aked din he etew. Umba mibpilì kiw zin su wey tew mesangyew is tudtul te utew egkein-inuwan he menge vaal zin. Iyan sikandin nengelintau wey kiw meketuu wey kiw maawà dutun te kerusireman. Ne g̵untaan edteyawan kiw zin, he ke và dà egkeg̵iya, utew en meupiya is kedtuvazi zin kenitew.

¹⁰ Su zengan kenè kiw menge sakup te Megbevayà ne g̵untaan menge sakup kiw zin en. Dengan wazè tew hanew zutun te hizu te Megbevayà, iyan, guntaan impezayag din en kenitew.

¹¹ Menge minahal ku he suled, kenè en hustu he inged tew heini is kelibutan su menge humuhulevungà kiw zà dini. Ne tenged dutun edhengyuan ku sikiyu he kenè niw pezumdumahi is menge mezaat he kebayè niw su ebpekesanggen heini te kedsundan niw te Megbevayà.

¹² Kinahanglan he utew metazeng is menge ulaula niw su wey maahà te menge etew he kenà tumutuu. Su minsan ke egkeg̵iyen dan he mezaat is ulaula niw, egketuenan dan gihapun he meupiya is ed-ul-ulahan niw ne ebpekezalig dan te Megbevayà keuzemà te andew te kebulusi zin te menusiyà.

Is Kebpesakup te Gubirnu

¹³ Kinahanglan he edtumanen niw is midtukud he velaud diyan te inged niw su iyan heini egkesuatan te Nengazen. Ebpesakup ki te lavew he hadì su iyan sikandin ebayàbayà te langun.

¹⁴ Ebpesakup ki zaan te gubirnedur su iyan midsug̵ù te lavew he hadì wey zin siluti is menge mesinupaken ne wey zin daan delig̵a is menge metazeng.

¹⁵ Umba edhengyuen ku heini su egkesuatan te Megbevayà he is menge mepedeligen he wazà mekesavut te hustu, meehè dan is menge metazeng he ulaula tew. Ne pinaag̵i kayi ebpekeengked dan is edsudì kenitew.

¹⁶ Ne g̵eina te nelibri kiw en te Megbevayà, egkehimu he iyan kiw en ebayàbayà te ed-ul-ulahan tew, iyan, kinahanglan he kenè tew edhimuwen is kelibriyanan tew he pesangil wey kiw mekeulaula te mezaat. Su minsan pa te nelibri kiw en, kinahanglan he menge sulug̵uen kiw g̵ihapun te Megbevayà.

¹⁷ Edtehuzen tew is langun he menge etew; ebmahalen tew is langun he menge suled tew te kedtuu. Igkehandek ta is ked-ulaula te kenà egkesuatan te Megbevayà; edtehuzen ta is keg̵ehem te lavew he hadì.

Si Jesus Iyan Petug-iringan

¹⁸ Sikita is sulug̵uen, ebpesakup ki te egalen ta ne hustu is kedtehuza ta kandin. Kenè ta iyan dà ebpezumdumahan is egalen he metulanged wey meupiya is ulaula zin, kekenà, ebpezumdumahan ta zaan is melemu he egkepauk.

¹⁹ Su edtuvazan ki te Megbevayà emun tenged te kedtumana ta te egkesuatan din, egkeantus ta is kedresaya kenita te egalen ta minsan pa te wazè ki mekesalà.

²⁰ Iyan, kenè ki zait he edtuvazan te meupiya emun iyan igkeentusa ta te kedsiluti kenita is mezaat he ulaula ta. Iyan, ke ebpekeantus ki te merasey te wazà mezaat he mid-ulaula ta, edtuvazan ki te Megbevayà.

²¹ Nekeantus si Kristu te merasey wey ki melibri te silut. Ne nehimu sikandin he petug-iringan he kinahanglan he edsunuzen ta. Umba mibpetuu kenitew is Megbevayà su wey tew si Kristu meiringi.

²² Wazà minsan hengkey he salà he neveelan ni Kristu. Wazà minsan hengkey he tarù he migkag̵i zin.

²³ Hein edsumpeliten sikandin duen te kedrensanga kandin wazà sikandin medtavak te mezaat; wazà sikandin mebpenrawak. Is kebelesi zutun te edrasey kandin, insarig din diyà te Megbevayà he iyan kes metazeng is kedhukum din.

²⁴ Iyan si Kristu midsilutan tenged te menge salè tew zutun te kedrensanga kandin diyà te krus. Umba iyan sikandin midsilutan su wey tew meengkezi is menge mezaat he ulaula ne wey tew iyan meulaula is metazeng. Is menge palì din dutun, ne iyan nekevawì kenitew.

²⁵ Iring kiw zengan te menge ayam he kerehidu he nengetazin, iyan, guntaan impeulì kiw en diyà te Megbevayà he iyan bekidu he metau he ebantey kenitew.