1 Pedro 1 - Manobo Western Bukidnon

¹ Iyan a si Pedro is teg̵isurat kayi. Epustul a ni Jesu Kristu, he ke và dà egkeg̵iya, sug̵ù din. Ebpesuratan ku sikiyu is nengaaram te Megbevayà he nemekedsuwey ziyà te g̵awas te inged niw. Is duma keniyu, ne ziyà mekepelag̵uy te prubinsya he Puntu, is duma, ne ziyà te menge prubinsya he Gelasya wey Kepedusya, wey Asya, wey Bitinya.

² Nengaaram kew te Megbevayà he Amey tew sumalà is kebayè din dengan he iyan is: edhimuwen kew zin he metazeng pinaag̵i te Wag̵as he Mulin-ulin wey kew mehimu he menge sakup ni Jesu Kristu ne wey kew zaan mepesaylu tenged te kebpelisi keniyu te lengesa ni Jesus. Berakat he ikeg̵ag̵ew kew zin wey mebmelinawen kew utew.

Is Kebpekeperateng Tew

³ Utew zekelà is kebpeselemati tew te Megbevayà he iyan Amey te Nengazen tew he si Jesu Kristu. Su tenged te zekelà is hizu zin kenitew, mibeg̵ayan kiw zin te veg̵u en he untung. Ne g̵untaan ebpekeperateng kiw he egkevanhew kiw keuzemà su mibanhew zin si Jesu Kristu.

⁴ Ne elin daan egkeperateng tew is utew meupiya he idtuvad din kenitew. Integ̵ana zin en heini ziyà te langit ne zutun kenà egkeredak, kenà egkezeetan, ne kenà daan egkehanew.

⁵ Kenitew en haazà is integ̵ana zin. Tenged te nekesarig kiw kandin, nelig-enan kiw te g̵ehem te Megbevayà te kemulu kiw pa edtag̵ad te kedtulusa zin kenitew keuzemà te ketepusan he timpu.

⁶ Ne tenged dutun ebpekelipey kew en minsan pa te egkeseeng kew zè pa g̵untaan tenged te mezakel he menge kemeresayan he egkeantus niw.

⁷ Is kedtuu niw, ne iring te vulawan su egezaman is bulawan pinaag̵i te hapuy su wey ikepaahà ke tutuu ve. Umba idtug̵ut te Megbevayà he mekeantus kew te merasey su wey pinaag̵i te kemeresayan meg̵ezami is kedtuu niw ke tutuu ve wey ke kenà. Mahal pa is kedtuu niw kenà is bulawan su melemu egkezeeti is bulawan. Ne emun tutuu is kedtuu niw, edelig̵en kew, ebentug̵en kew, wey edtehuzen kew keuzemà emun ibpeg̵awag̵awa en si Jesu Kristu.

⁸ Utew mahal sikandin diyan te g̵ehinawa niw minsan wazè niw pa maahà. Ne edsarig kew kandin minsan pa te kenè niw en sikandin egkeahà guntaan. Ne utew man dekelà is kelipey niw he kenà igkeseysey

⁹ su egkezawat niw en guntaan is kedlibriya keniyu te silut he iyan ebperetengan niw tenged te midtuu kew kandin.

¹⁰ Is ebpemeneuven dengan te Megbevayà, mibpurungan dan istudyuwi is kedlibriya zin kenita te silut wey netagnè dan heini is kedtuvazi zin kenita.

¹¹ Mid-istudyuwan dan ke keenu wey ke egkemenumenu is kegketuman kayi, su in-ulin heini kandan te Wag̵as he Mulin-ulin he ebpuun diyà te ki Kristu. Impesavut din kandan he zuen menge kemeresayan he egkeantus ni Kristu zini te kelibutan ne emun egketapus haazà edhimuwen sikandin he utew lavew.

¹² Impezayag kandan te Megbevayà he kenà kandan he ibmeupiya haazà is netagnè dan dutun, kekenà, kenitew g̵untaan. Ne g̵untaan impesavut en keniyu is tutuu mehitenged dutun te netagnè dan. Duen menge etew he midsug̵ù te Megbevayà su wey zan metudtul keniyu is Meupiya he Tudtulanen. Mid-ulinan sikandan te Wag̵as he Mulin-ulin he midsug̵ù te Megbevayà. Ne heini is impesavut dan keniyu, minsan is menge velinsug̵uen te Megbevayà ziyà te langit, egkesuatan dan he mesavut dan heini.

Is Menge Ulaula te Tumutuu Kinahanglan he Wazà Igkesawey Zuen

¹³ Ne g̵eina te iyan haazà, kinahanglan he ed-andam ki wey ki mekepurung mekeisip-isip su wey ta layun mepurungi is kedsunud ta te Nengazen. Kinahanglan he iyan dekelà diyà te g̵ehinawa ta is kebperateng ta te utew meupiya he ibeg̵ey te Megbevayà kenita keuzemà dutun te andew te kebpeg̵awag̵awa ni Jesu Kristu.

¹⁴ Geina te menge anak ki te Megbevayà, kinahanglan he edtumanen ta is menge sug̵ù din; kenè ta iyan ebpezumdumahan is mezaat he kebayè ta he edtumanen ta layun dengan hein wazè te pa metueni is tutuu he tuluuwen.

¹⁵ Ne g̵untaan kinahanglan he wazà igkesewayi te menge ulaula tew iring te wazà igkesewayi te menge ulaula te Megbevayà he iyan nengelintau wey kiw meketuu.

¹⁶ Su zuen insurat he Lalag te Megbevayà he edhenduen te, “Kinahanglan he wazà igkesewayi te menge ulaula niw su wazà igkesewayi te kedì he menge ulaula.”

¹⁷ Ne g̵eina te mibpetavang ki te Amey ta he Megbevayà kinahanglan he utew meheg̵et is kedtehuza ta kandin te zini ki pa ed-ubpà te kelibutan. Iyan sikandin edsusi te menge ulaula te menusiyà sumalà is mid-ulaula te kada sevaha ne wazè din ibpelavi he minsan hentei.

¹⁸ Netuenan ta he utew mahal is imbelukas din kenita. Su nengeuripen ki zengan te menge ulaula he wazà pulus he imbilinbilin kenita te menge kepuun ta. Sikan is imbelukas din kenita, ne kenà iring te selapì wey vulawan he egkeawà is bali zin.

¹⁹ Iyan imbelukas din si Kristu he impelengesa he utew mevali. Iring sikandin te nati he kerehidu he wazà igkesawey zuen he impemuhat.

²⁰ Te wazè pa limbag̵a is kelibutan, daan en si Kristu he intezù te Megbevayà wey mehimu he Menluluwas tew. Ne kayi te timpu g̵untaan, impezayag sikandin wey kiw mevelukasi.

²¹ Pinaag̵i kandin neketuu kiw te Megbevayà. Mibanhew sikandin te Megbevayà ne midhimu zin sikandin he utew lavew. Ne tenged kayi iyan edserig̵an tew g̵untaan is Megbevayà ne ebpekeperateng kiw he edhimuwen kiw zin daan he utew lavew.

²² Ne g̵eina te nemeketuu kew en te tutuu he tuluuwen nengelumpiyuwan kew en te mezaat he ulaula ne kenà tarù is kebmahala niw te menge zuma niw he tumutuu. Minsan pa zutun, heg̵eta niw pa is kebmahala niw ziyan te g̵ehinawa niw te kada sevaha te menge zuma niw.

²³ Su mid-umanan ki limbag̵a te Megbevayà ne veg̵u ki en maan he etew pinaag̵i te wazà pidtemanan he Lalag te Megbevayà he iyan ebpekeveg̵ey te untung.

²⁴ Su zuen insurat he Lalag te Megbevayà he edhenduen te, “Is menusiyà, geina te mevavè dà utew is untung din, iring sikandin te sagbet. Su is kempet din, ne iring te kevukad te sagbet. Meg̵aan egkeg̵angu is sagbet, ne egkengeulug is kevukazan din.

²⁵ Iyan, is Lalag te Megbevayà, kenà mulà egkehanew te wazà pidtemanan.” Ne is Lalag te Megbevayà, ne iyan impesavut keniyu.