1 Kurintu 9 - Manobo Western Bukidnon

Is Ketengdanan te Epustul

¹ Intug̵ut kedì he iyan a ebayàbayà te ebeelan ku su zuen ku keg̵ehem te kegkeepustul. Iyan inggerari kedì he epustul su mibpaahà kedì dengan si Jesus is Nengazen tew. Ne kenà dutun dà taman su pinaag̵i kedì nemeketuu kew te Nengazen.

² Ne minsan ke kenà ebpeketuu is duma he epustul a, sikiyu is diyan te Kurintu, netuenan niw en he epustul a su kenà egketarù he pinaag̵i kedì mibeg̵ayan kew en te veg̵u en he untung.

³ Ne is menge etew he egkesuat he edsusi te menge ulaula ku iyan tavak ku kandan is:

⁴ mezaat be ke ebuyuen ku is egkeenen ku wey ed-inumen ku ziyà te menge tumutuu he ebpekezawat te ibpenurù ku? Kenà mezaat.

⁵ Ne mezaat be zaan ke ed-iringan ku is menge zuma he epustul wey is menge hazi ni Jesus wey si Pedro zaan su pudu zan duen esawa he tumutuu he edumahan dan ke edhipanew zan? Kenà daan mezaat.

⁶ Ne egkehimu ve he iyan key zà ki Bernabe wazè din ketenged te kebuyù te igkeuyag dey ziyà te ebpekezawat te menge penurù dey?

⁷ Penenglitan, is sundaru, egkehimu ve ke kenà sikandin ebeg̵ayan te egkeg̵astu zin? Kenà egkehimu. Kenà daan egkehimu he kenà ebpekekaan is teg̵ipinemula zutun te veg̵as te pinemula zin. Ne iring din ded daan is ed-elima te kerehidu su zuen din egkepupulus tenged dutun.

⁸ Menge ketezengan heini he zini zà ebpuun te menge ulaula tew te menusiyà, iyan, iyan gihapun ibpenurù te kesug̵uan.

⁹ Su insug̵ù dengan ni Moises he, “Is ibpeg̵unas he vaka, ne kinahanglan he kenè niw ebusalan.” Ne kenè ta ed-isipen he iyan dà egkeg̵iyen te Megbevayà kayi is menge vaka,

¹⁰ su siguradu elin key zaan egkeg̵iyen din dutun. Su umba edhag̵ù is edadu wey is ed-eg̵ani su ebpeebuten te uman sevaha kandan he zuen egkekuwa zan dutun te abut te tanà.

¹¹ Ne iring din daan, is impemula zey ziyan te keniyu, ne zuen pulus din te wazà pidtemanan. Ne kenè be egkehimu he zuen ebpeebuten dey ziyan te keniyu he igkeuyag dey he kayi zà te kelibutan is pulus din?

¹² Su ke egkehimu ke zuen ebpeebuten he igkeuyag te menge zuma he ebpenurù diyan, iyan key pe be kenà mebpaabut daan te lavew pa he zekelà. Ne minsan pa te iyan heini ketezengan, wazè key mebuyù diyan te keniyu su kela ke zuen egkag̵i he ibpenapì dey zà is baal zey ziyan. Ed-entusen dey is minsan hengkey su kenè dey egkesuatan he mesanggen is kedsengyawa te Meupiya he Tudtulanen mehitenged ki Kristu.

¹³ Siguradu netuenan niw he haazà is menge etew he ebaal ziyà te simbahan he Valey te Megbevayà, ne zutun dan egkuwaa is egkeenen dan. Ne is menge memumuhat daan he ebpemuhat dutun, ne egkezawat dan daan is bahin dan dutun te impemuhat.

¹⁴ Ne iring din ded daan is intelaan dengan te Nengazen tew su migkag̵i zin he kinahanglan he edsuhulan is ebpenurù te Meupiya he Tudtulanen te menge ebpepenurù kandin.

¹⁵ Ne minsan pa te egkehimu he egkekuwa ku is igkeuyag ku zutun te ebpepenurù kedì, wazà a mebuyù diyà te minsan hentei. Ne kenà a zaan ebuyù guntaan diyan te keniyu. Deyzey pa ke egkeumes a te vitil kenà te mekevuyù a su utew ku egkesuati he kenà maawà is igkezantal ku he iyan is: wazè ku mesanggen is kedsengyawa te Meupiya he Tudtulanen.

¹⁶ Ne kenà egkehimu he idantal ku is kedsengyawa ku te Meupiya he Tudtulanen su intelaan kedì te Nengazen heini, ne kenà egkehimu he kenè ku edtumanen. Meveg̵at is silut din kedì ke kenè ku idsangyew is Meupiya he Tudtulanen.

¹⁷ Emun kediey zà he isip is kedsengyawa ku, ne egkehimu he edsuhulan a, iyan, geina te intelaan kedì te Megbevayà tenged te sulug̵uen e zin dà ne kinahanglan he edtumanen ku tenged dà te insarig din heini kediey.

¹⁸ Ne hengkey ve is suhul ku kayi? Iyan suhul ku kayi is: egkehimu he ibpesavut ku is Meupiya he Tudtulanen te wazà bayad diyà te menge etew minsan pa te zuen ku ketenged te kebuyù te igkeuyag ku.

¹⁹ Ne kenà duen dà taman su minsan pa te kenà dait he edsugsug̵uen a te minsan hentei su kenè e man uripen te minsan hentei, egkesuatan ku he mehimu a he sulug̵uen te minsan hentei su wey mehimu he meketuu ki Jesus is utew mezakel he menge etew.

²⁰ Ne tenged kayi emun diyà a te menge Hudiyu, ne hinudiyu zaan dutun is menge ulaula ku su wey maag̵ak sikandan ne meketuu sikandan. Ne minsan pa te kenè e en dizalem te kesug̵uan he imbilinbilin ni Moises diyà te menge Hudiyu, edtumanen ku g̵ihapun su wey ku maag̵ak sikandan ne ebpeketuu sikandan ki Jesus.

²¹ Ne ziyà te menge etew he kenà menge Hudiyu, emun iyan sikandan menge zuma ku ne kenè ku en maan ed-ul-ulahan is kesug̵uan he ebentayan te menge Hudiyu su ed-ul-ulahan ku is menge ulaula te kenà menge Hudiyu su wey ku sikandan maag̵ak ne ebpeketuu zan ki Jesus. Wazè ku engkezi is menge sug̵ù te Megbevayà su edtumanen ku is menge sug̵ù ni Kristu.

²² Ne haazà is menge tumutuu he wazà sikandan mekesavut te hustu, egkehimu a he iring kandan ne kenè ku idteg̵el is kediey he egkesuatan su wey pinaag̵i kedì meheg̵et is kedtuu zan. Ne zuen te kada sevaha he ebpenudtulan ku te Lalag te Megbevayà, ebpen-ahaan ku is paag̵i he engayan kandin su wey ku maag̵ak sikandin ne ebpeketuu sikandin ki Jesus.

²³ Umba ebeelan ku heini su wey mesangyew is Meupiya he Tudtulanen ne wey a zaan mekeambit te menge tuvad he impenaad kenitew pinaag̵i te Meupiya he Tudtulanen.

²⁴ Netuenan niw he ke zuen lumbaan ne mezakel is ebpekibanggà, iyan, sevaha zà is ebpekezaag ne iyan edsuhulan. Ne sikiyu is tumutuu ki Jesus, iringi niw is edlumbà su wey kew mesuhuli keuzemà te Megbevayà.

²⁵ Ne sikan is idlumbà, edhag̵ù sikandin su wey melumbad is lawa zin. Iyan id-ul-ulaha zin kayi su wey zin mezawat is suhul he melemu egkeawà is pulus din. Ne sikitew is tumutuu, edhag̵ù kiw zaan kayi te kedsundan tew te Nengazen su wey tew mezawat is suhul he kenà mulà egkeawà is pulus din te wazà pidtemanan.

²⁶ Umba ed-iringan ku is idlumbà he edlelagdeng diyà te edungguan su kenà a ed-awà kayi te hustu he ibayà. Ne kayi te kebpenurua ku te menge etew, ed-iringan ku zaan is beksidur he pirmi ebpekesug̵at is sumbag din su wey layun mekesug̵at is menge lalag ku.

²⁷ Ne heini is lawa ku, ke zuen mezaat he suat din, ne edhimuwen ku is taman te egkehimu ku su wey ku meeg̵en su kela ke, siak is nekepenurù te zuma, ne iyan a kenà egkesuhulan keuzemà te Megbevayà.