1 Kurintu 8 - Manobo Western Bukidnon

Is Ketudluanan Mehitenged te Impemuhat Diyà te Kenà Tutuu he Megbevayà

¹ Ne mehitenged te insè niw ke idtug̵ut be kenitew te menge tumutuu ke egkeenen tew is usa he impemuhat diyà te menge tarù he ed-ezapen, netuenan tew te langun he heini is menge tarù he ed-ezapen ne wazè dan gehem kenitew. Ne minsan ke netuenan ta he wazà gehem dan kenita, egkehimu he ebpegalbu ki tenged kayi te netuenan ta emun wazà heini metueni te menge zuma ta. Umba egkeg̵iyen ku heini su kenè ki ebpeketavang te menge zuma ta pinaag̵i zà te netuenan ta, kekenà, pinaag̵i te g̵ag̵ew ta kandan.

² Is etew he kunaan din ke zekelè en is netuenan din, is hustu he ibpesavut pezem kandin te Megbevayà, wazè din pa metueni.

³ Ne haazà mulà is etew he mahal ziyà te gehinawa zin is Megbevayà, iyan sikandin kes migkag̵i te Megbevayà he g̵aked din.

⁴ Ne mehitenged te kegkaan te usa he impemuhat duen te menge tarù he ed-ezapen, netuenan tew he kenè man Megbevayà is iring dutun su sebsevaha zà is tutuu he Megbevayà.

⁵ Mezakel utew is menge tarù he megbevayà he ed-ezapen te menge etew ne egkeg̵iyen te menge etew he ziyà ed-ubpà haazà is menge megbevayà te langit wey zini te tanà, ne edhimuwen dan he menge ziwata zan wey menge egalen dan.

⁶ Ne minsan pa zutun, sikitew, netuenan tew mulà he sebsevaha zà is kenitew he Megbevayà he iyan Amey tew he nenlimbag te minsan hengkey. Iyan sikandin edlingahaan tew te minsan hengkey he timpu. Ne sebsevaha zà daan is Nengazen tew he iyan si Jesu Kristu. Pinaag̵i kandin nelimbag is minsan hengkey, ne pinaag̵i zaan kandin mibeg̵ayan kiw en te veg̵u en he untung.

⁷ Iyan, duen menge zuma tew he tumutuu he wazà mesayud he wazà gehem te tarù he Megbevayà diyà te kandan. Ne utew mereg̵en kandan is ked-ewai zan te imbilinbilin kandan he tuluuwen mehitenged te tarù he megbevayà. Ne emun egkaan dan te egkeenen he impemuhat, iyan egketag̵ù te isip dan he neketampu zan dutun te ked-ezapa te tarù he megbevayà. Ne tenged kayi ebpekezezaat te g̵ehinawa zan su kunaan dan ke nekesalè dan su nekekaan dan te usa he impemuhat diyà te tarù he megbevayà.

⁸ Ne sikitew, netuenan tew he kenà iyan is egkeenen tew wey is kenè tew egkeenen igkesuat te Megbevayà su emun egkaan ki te usa ne wazè din pulus diyà te Megbevayà ne emun kenè ki egkaan te usa ne iring din ded daan.

⁹ Ne minsan pa zutun kinahanglan he purungi niw isipa heini is intug̵ut en keniyu su kela ke tenged keniyu egkesanggen is kedtuu te sevaha he wazè pa sikandin mekesavut te hustu.

¹⁰ Su penenglitan, ke zuen duma ta he wazà sikandin mekesavut te hustu, ne sikita is nekesavut mulà, neehè ki zin is egkaan dutun te valey he zutun ed-ezapen is tarù he megbevayà, ne egkeuwit sikandin ne edtampu zaan sikandin he egkaan, iyan, egkepenulayan is isip din su kunaan din ke tutuu he ed-ezapen haazà is ed-ezapen dan dutun.

¹¹ Ne tenged te nesavut ta he kenà tutuu he ed-ezapen haazà is mibpemuhatan, nezeetan heini is duma ta he midlibri te silut pinaag̵i te kebpatey ni Kristu.

¹² Ne emun pinaag̵i kayi te ulaula ta ebmesakit is gehinawa te menge zuma ta he tumutuu, nekesalè ki ziyà te kandan ne nekesalè ki zaan diyà te ki Kristu.

¹³ Ne emun egkehimu he egkepenulayan is duma ku he tumutuu pinaag̵i te kegkaan ku te usa, ne kenà ad maan te minsan keenu egkaan te usa.