1 Kurintu 7 - Manobo Western Bukidnon

Is Kebpengesawa

¹ Ne idsurat ku is tavak ku zuen te menge insè niw zuen te surat niw. In-insè niw ke meupiya ve ke kenè ki ebpengesawa. Ne meupiya iyan ke kenè ki is maama ebpengesawa,

² iyan, geina te utew mezakel is menge etew he egkevut te kenè dan esawa, deyzey ke ebpengesawa is maama ne ebpeesawa is bahi su kela ke meuwit kew zuen te menge etew he meremerik is ulaula zan.

³ Ne sikiyu is teleesawa, kinahanglan he ebpehulizè kew. Kenà meupiya ke kenà edhulid is maama wey ke kenà edhulid is bahi.

⁴ Su is bahi, kenà iyan sikandin teg̵ig̵aked te lawa zin, kekenà, iyan is esawa zin. Ne iring din ded daan, is maama, ne kenà iyan sikandin teg̵ig̵aked te lawa zin su iyan is esawa zin.

⁵ Kenè niw iengked is lawa niw ziyà te esawa niw. Iyan, para kenà mesamuk is ked-ampù niw egkehimu he iengked niw emun neuyunan niw, asal taman dà te egkepipira he andew. Ne emun egketapus haazà is neuyunan niw, ne kinahanglan he ebpehulizè kew en maan su kela ke kenè niw meeg̵en is suat niw ne egkepenulayan kew ni Setanas.

⁶ Kenè ku sikiyu edsug̵uen he mebpees-eseweey kew, kekenà, sambag ku zà keniyu.

⁷ Su egkesuatan ku pezem he ed-iringan a keniyu is wazè din esawa, iyan, netuenan ku he wazà himuwa te Megbevayà he meked-iiring kiw su imbeg̵ey zin diyà te sevaha is kebpekeantus te kenà kebpengesawa, ne selakew is imbeg̵ey zin diyà te sevaha.

⁸ Ne sikiyu is menge rag̵a, menge kenakan, wey menge valu, iyan sambag ku keniyu is deyzey ke ed-iringan a keniyu is wazè din esawa,

⁹ iyan, ke kenè niw egkeeg̵en is suat niw ne deyzey ke ebpees-eseweey kew su zeyzey is duen din esawa kenà is egkereg̵enan tenged te suat te lawa zin.

^10-11 Ne sikiyu is telteleesawa, duen ku zaan sug̵ù keniyu. Kenà kediey zà heini, kekenà, sug̵ù te Nengazen tew. Iyan is: is bahi, ne kinahanglan he kenà mebpekidsuwey te esawa zin. Ne is maama, ne kinahanglan daan he kenè din engkezi is esawa zin. Iyan, ke zuen bahi he mibpekidsuwey en te esawa zin, kenà egkehimu he ed-uman ebpeesawa. Egkehimu ke ebpeuliey sikandan.

¹² Ne sikiyu is duma, duen sug̵ù ku keniyu. (Kediey heini he sug̵ù su wazà isug̵ù heini zengan te Nengazen tew he si Jesus.) Iyan is: ke zuen maama he tumutuu he zuen esawa zin he wazà medtuu, ne kenà egkesuat haazà is bahi he ebpesuwayè dan, ne kenà egkehimu he ed-engkezan dutun te maama haazà is esawa zin.

¹³ Ne iring din ded daan is bahi he neketuu, kenà sikandin mebpekidsuwey te esawa zin he kenà tumutuu ke kenà egkesuat he ebpekidsuwey is maama.

¹⁴ Su sikiyu is nemeketuu te Nengazen tew he si Jesus he zuen esawa niw he kenà tumutuu, edtuvazan daan te Megbevayà is esawa niw tenged keniyu minsan ke wazà sikandin medtuu, ne edtuvazan din daan is menge anak niw. Su emun kenà heini tutuu, ebpekeiring is menge anak niw te menge anak te menge etew he wazà medtuu te Nengazen.

¹⁵ Ne ke zuen sevaha keniyu he zuen esawa zin he kenà tumutuu ne egkesuat he ebpekidsuwey haazà is kenà tumutuu ne tug̵uti niw. Su idtug̵ut te Megbevayà he suwayi is tumutuu zuen te esawa zin he kenà tumutuu su umba impetuu kiw te Megbevayà su egkesuatan din he melinawen is kedepitè tew.

¹⁶ Kinahanglan he edtug̵utan ta he edsuwey is esawa ta he kenà tumutuu su minsan ke kenè ta edtug̵utan kenè ta g̵ihapun egketuenan ke pinaag̵i kenita edtuu keuzemà sikandin te Nengazen wey ke kenà.

Is Kebpekesavuk te Etew Zutun te Kebpeketuu Zin

¹⁷ Ne minsan hengkey is kebpekesavuk te kada sevaha kenitew zini te kelibutan, kinahanglan he edtumanen te kada sevaha is ebpeveelan kandin te Megbevayà sumalà ke hengkey is kebpekesavuk din dutun te kebpetuuwa kandin te Nengazen tew. Ibpenurù ku heini te menge tumutuu ziyà te minsan hendei he inged.

¹⁸ Penenglitan, ke zuen tumutuu he zaan he nesirkunsidar su wey metuusi he Hudiyu sikandin, ne iyan sambag ku kandin is kenè din ipaawà is tuus te kedsirkunsidara kandin. Ne iring din ded daan is etew he kenà Hudiyu zutun te kebpeketuu zin, kinahanglan he kenà sikandin ebpesirkunsidar.

¹⁹ Su minsan ke nesirkunsidar ki wey ke wazà ne wazè din pulus. Iyan, ke edtumanen ta is ebpeveelan kenitew te Megbevayà, ne zekelà is pulus din kenitew.

²⁰ Ipelaus niw en haazà is kebpekesavuk niw puun dutun te aney he kebpetuuwa keniyu te Nengazen tew.

²¹ Emun uripen ka zutun te kebpeketuu nu, ne maambe en, iyan, ke egkehimu he ebelukasan ka ne meupiya pa haazà, pevelukas ka.

²² Minsan ke uripen ka zutun te kedhimuwa kenikew he tumutuu te Nengazen, iyan ked-ahaa zin kenikew is kenè ka uripen. Ne iring din ded daan, minsan pa ke kenè ki uripen, emun tumutuu ki te Nengazen ne uripen ki g̵ihapun ni Kristu.

²³ Utew mahal is imbelukas kenitew te Megbevayà ne tenged kayi kinahanglan he kenè niw iyan sundani is etew zà duen, kekenà, iyan is Nengazen.

²⁴ Menge suled, minsan hengkey is kebpekesavuk niw zutun te kebpeketuu niw te Nengazen ne kinahanglan he kenè niw helina su iyan metau is Megbevayà.

Is Ketudluanan Mehitenged te Wazè Din Esawa

²⁵ Ne sikiyu zaan is wazè pa esawa, wazè ku sug̵ù keniyu he ebpuun te Nengazen, iyan, siak is nehimu he egkeserig̵an tenged te zekelà he hizu kediey te Megbevayà, duen sambag ku keniyu.

²⁶ Iyan is: geina te utew mezakel is kemereg̵enan tew te menge tumutuu kayi te timpu, meupiya ke kenè kew ebpees-eseweey.

²⁷ Ke zuen etew he wazè din esawa ne kenè din pen-ahaa is ed-esewaan din, iyan, ke zuen daan etew he zuen din en esawa ne kenè din engkezi.

²⁸ Ne emun ebpengesawa is maama ne kenà daan salà haazà ne emun ebpeesawa is bahi ne iring din ded daan su kenè man salà. Iyan dà igkekeg̵iya ku he meupiya ke kenè kew ebpees-eseweey su emun ebpees-eseweey kew ne mereg̵en is egkeulaula niw zini te kelibutan ne egkesuatan ku pezem he kenè niw meseg̵azi is iring dutun.

²⁹ Su ibpesavut ku keniyu, menge suled, he mevavè dà utew is timpu tew ne tenged kayi, puun guntaan is etew he zuen esawa zin, ne kinahanglan he tumana zin is ebpeveelan kandin te Nengazen he iring te wazè din esawa.

³⁰ Ne iring din ded daan haazà is etew he egkeseeng, ne kinahanglan he iring te wazè din igkeseeng. Ne iring din ded daan is etew he zuen din igkelipey su kinahanglan he iring te wazè din igkelipey. Ne haazà daan is menge etew he ebpememasa, kinahanglan he kenè dan kenug̵uni is ebpemesahan dan, kekenà, isipa zan he kenà kandan haazà.

³¹ Kinahanglan he ke egemiten ta is menge vutang dini te kelibutan, kenè ta utew edekelaan dini te g̵ehinawa ta. Umba egkeg̵iyen ku heini su meg̵aan en egkehanew is kelibutanen he kebpekesavuk tew g̵untaan.

³² Egkesuatan ku pezem he wazà utew mezakel he kelibutanen he igkesemuki keniyu. Is maama he wazè din esawa, iyan dà seeng din is kedtumana zin te ebpeveelan kandin te Nengazen su iyan din ed-isipen layun is egkesuatan te Nengazen.

³³ Iyan, is maama he zuen din esawa, layun din daan ed-isipen is menge igkeseeng dini te kelibutan su wey mesuat is esawa zin.

³⁴ Ne tenged kayi layun dezuwa is ed-isipen din, ne kenà egkeuyun heini is dezuwa. Ne iring din ded daan is bahi he wazè din esawa su iyan dà ed-isipen din is egkesuatan te Megbevayà. Ibeg̵ey zin is gehinawa zin wey zesen din su wey mesuat is Megbevayà. Iyan, ke zuen esawa zin, egkeisip din layun is menge igkeseeng dini te kelibutan su wey mesuat is esawa zin.

³⁵ Kenè ku iyan igkeg̵iya kayi is wey kew kenà meked-eeseweey, kekenà, egkesuatan ku he mesembag̵i kew su wey metengkai is menge ulaula niw ne wey kenà mesanggen is hustu he kedtumana niw te ebpeveelan keniyu te Megbevayà.

³⁶ Ke zuen maama he zuen din anak he rag̵a he meg̵urang en ne egkereg̵enan haazà is rag̵a su wazà itug̵ut dutun te amey zin he ebpeesawa, ne zeyzey ke ibpeesawa zin emun iyan egkesuatan din su kenè man salà is iring dutun.

³⁷ Iyan, ke wazà mereg̵eni haazà is rag̵a ne maambe en ke kenè din ibpeesawa su zeyzey heini, asal, egkehimu zin is diyà te g̵ehinawa zin.

³⁸ Meupiya ke ibpeesawa zin haazà is anak din, iyan, meupiya zaan ke kenè din ibpeesawa.

³⁹ Ne ke zuen bahi he zuen esawa zin, kenà egkehimu he edsuwayan din haazà is esawa zin. Iyan, emun ebpatey is esawa zin, ne egkehimu ke ebpeesawa sikandin ebpeuman te egkesuatan din he maama, iyan, kinahanglan he iyan ebpekeesawa kandin is tumutuu te Nengazen tew.

⁴⁰ Iyan, meupiya pa is kebpekesavuk dutun te vahi ke kenè en sikandin ebpeesawa. Kediey zà he isip heini, iyan, edtuuwan ku he impinted kediey heini te Wag̵as he Mulin-ulin.