1 Kurintu 6 - Manobo Western Bukidnon

Is Kedhusey te Menge Tumutuu

¹ Ne emun duen idsumbung te sevaha keniyu he zuma zin he tumutuu, maan is layun kew ebpehusey te menge zatù he kenà tumutuu? Kinahanglan he iyan edhusey kenitew is duma tew he tumutuu.

² Wazè niw ve metueni he sikitew is menge tumutuu, iyan kiw ebpenhusey keuzemà te langun he menge etew zini te kelibutan? Ne emun egkehimu he ebpenhusey kiw te tivuuk he menusiyà, wey pe be kenà egkehimu he edhusayen tew heini is menge zeisey he sumbung?

³ Su iyan kiw keuzemà edsusi te menge ulaula te minsan menge velinsug̵uen te Megbevayà ne iyan pe be kenè tew egkesusi is menge ulaula he zini zà te tanà!

⁴ Ne emun duen idsumbung te sevaha keniyu he zuma zin he tumutuu, kenà meupiya ke ibpehusey zin te etew he wazè din kelavet dini te kenitew te menge tumutuu?

⁵ Umba egkeg̵iyen ku heini su wey kew meeled. Siguradu zuen sevaha keniyu he egkehimu he zatù he metau he edhusey te menge tumutuu.

⁶ Iyan, sikiyu, ke zuen idsumbung niw he zuma niw ne kenà meupiya is ulaula niw su ziyè kew ebpehusey te huwis he kenà tumutuu. Ne kenà meupiya ke iyan edhusey kenitew is etew he kenà tumutuu.

⁷ Ne heini is kebpesumsumbungè niw, wazè niw ve metueni he tuus heini he utew zekelà is kurang te kedsunud niw te Nengazen? Deyzey ke kenè kew medsukul ke zuen ebpesipala keniyu. Deyzey ke ed-eg̵awan kew te menge azen niw, kenà te idsumbung niw is duma niw he tumutuu.

⁸ Iyan, sikiyu, ebpesipelahan niw wey ed-eg̵awan niw is menge zuma niw he tumutuu!

⁹ Siguradu netuenan niw he haazà is menge etew he ed-ulaula te mezaat, kenà sikandan keuzemà egkehedian te Megbevayà! Ne tenged kayi, purungi niw heini isipa su wey kenè kew mesayep su is menge etew he meremerik is ulaula zan, is ed-azap te kenà tutuu he megbevayà, is etew he egkevut te kenè din esawa, is maama he egkeerig̵an te maama wey is bahi he egkeerig̵an te vahi,

¹⁰ is tekawen, is leg̵ezen, is lelenguten, is ebpen-ulug te salà diyà te zuma zin, wey is limbungan, wey is minsan hentei etawa he ed-ulaula te iring kayi, ne kenà sikandin egkehedian keuzemà te Megbevayà, kekenà, edsilutan sikandin.

¹¹ Iring kayi is ulaula zengan te zuma keniyu, iyan, guntaan, nelumpiyuwan kew en te menge ulaula niw he mezaat ne nehimu kew en he menge g̵aked te Megbevaya. Ne pinaag̵i te g̵ehem te ngazan te Nengazen tew he si Jesu Kristu wey pinaag̵i te ked-ulini keniyu te Wag̵as he Mulin-ulin he ebpuun te Megbevayè tew, mid-isip kew en he metazang te Megbevayà.

Is Lawa Iyan ed-ubpaan te Megbevayà

¹² Ne ke zuen egkag̵i he sikitew is tumutuu, egkehimu en he ed-ul-ulahan tew is minsan hengkey emun kenà mezaat su nelibri kiw en te kedtumana te kesug̵uan, ne utew venar heeyan, iyan, mezakel is ulaula he kenà ebpeketavang kenitew te kedtuu tew. Su minsan ke egkehimu he ed-ul-ulahan ku is minsan hengkey, kenè ku idtug̵ut he ed-uripenen a te minsan hengkey he ulaula.

¹³ Ne ke zuen daan egkag̵i he umba mibeelan te Megbevayà is getek ta su wey mahantey te egkeenen, ne utew zaan benar heeyan, iyan, duen timpu keuzemà he wazè en pulus te g̵etek ta ne wazà daan dutun pulus te egkeenen su id-awà keuzemà te Megbevayà is kegemita kayi. Ne iring din ded daan is lawa ta, su kenà egkehimu he egemiten ta is lawa ta wey mahantey is suat ta zuen te etew he kenè ta esawa. Su wazà limbag̵a te Nengazen is lawa tew su wey tew meulaula is meremerik, kekenà, iyan inlimbag̵a zin su wey pinaag̵i kayi mezalig sikandin. Ne iring din ded daan pinaag̵i te Nengazen tew he si Jesus edtulusen keuzemà is lawa tew.

¹⁴ Su si Jesus, is Nengazen tew, ne mibanhew sikandin te Megbevayà ne ebenhawen kiw zaan keuzemà te Megbevayà pinaag̵i te zekelà he g̵ehem din.

¹⁵ Netuenan niw ve he heini is menge lawa tew te menge tumutuu, ne parti te lawa ni Kristu. Ne tenged kayi kenà egkehimu he egemiten ta is parti te lawa ni Kristu te kedhuliza te vahi he meremerik is ulaula zin.

¹⁶ Siguradu netuenan niw he is maama he edhulid te vahi he meremerik is ulaula zin, egkehimu is lawa zan te zezuwa he sevaha zà he lawa. Su zuen insurat he Lalag te Megbevayà mehitenged te maama wey vahi he ebpeked-esawa he edhenduen te, “Haazà is dezuwa, ne egkehimu en he sevaha zà he lawa.”

¹⁷ Iyan, is etew he ebpekidsevaha te Nengazen tew he si Jesus, egkesevaha is gehinawa zin wey is gehinawa ni Jesus.

¹⁸ Likayi niw is kegkevuta te kenè niw esawa su utew heeyan mezaat he salà. Is duma he menge salà ne mezaat daan, iyan, kenà pinaag̵i te lawa. Haazà is meremerik he ulaula, ne utew ebpekezezaat kenitew su pinaag̵i te lawa ta.

¹⁹ Siguradu netuenan niw he is lawa niw, ne iyan ed-ubpaan te Wag̵as he Mulin-ulin he imbeg̵ey keniyu te Megbevayà. Kenè ki en maan teg̵ig̵aked te lawa ta, kekenà,

²⁰ iyan teg̵ig̵aked kenita is Megbevayà su utew mahal is imbelukas din kenita. Umba, gemita niw is lawa niw te paag̵i he mevantug is Megbevayà.