1 Kurintu 5 - Manobo Western Bukidnon

Is Kedhukum Duen te Ebaal te Mahawag

¹ Duen nezineg ku, menge suled, he zuen sevaha keniyu he utew meremerik is ulaula zin. Duen kun maama ziyan he migkumpadi zin is esawa te amey zin. Ne minsan is menge etew he wazà medtuu te Megbevayà, wazà ulaula zan he utew mezaat he iring keniyan!

² Ne minsan pa zutun kemulu kew pa ebpegalbu. Kunaan niw vuwa ke utew meupiya is ulaula niw! Deyzey pezem ke egkeseeng kew. Kinahanglan pezem he wazè niw tug̵uti heeyan is maama he mebpekiduma keniyu.

³ Siak, minsan pa te zini a te meziyù, henduen be te ziyan e en te keniyu su layun ku sikiyu ed-isipa. Ne iring te ziyan e en, netuenan ku he zaan ke hengkey is hustu he idsilut keniyan te etew he utew mezaat is mid-ulaula zin.

⁴ Kinahanglan he edtig̵um kew ne emun netig̵um kew en ne iring ded te zuma a keniyu su ziyan te keniyu is isip ku ne idsug̵ù ku keniyu he pinaag̵i te keg̵ehem he imbeg̵ey te Nengazen tew he si Jesus

⁵ engkezi niw sikandin, ne iveg̵ey niw sikandin diyà te ki Setanas su wey mezeeti is lawa zin ne human egkelibri is gimukid din te silut te Megbevayà keuzemà te andew te kedsusi te Nengazen tew he si Jesus.

⁶ Maan is ebpegalbu kew? Netuenan niw is erubasa he edhenduen te, “Minsan ke zuen deisek dà he tapey ne egketepayan din is sengebisin en he erina he ebeelan he supas.”

⁷ Is mezaat he ulaula, ne iring te tapey su ke ed-ulaula is sevaha te mezaat egkeuwit din daan is mezakel he menge zuma zin. Kinahanglan he iawè niw ziyan te keniyu is daan he tapey su wey wazà mezaat diyan te keniyu. Emun edtumanen niw heini ne egkeiringan niw is beg̵u en he supas he wazè din tapey. Netuenan ku he zaan kew en he iring kayi tenged te kedtuu niw ki Kristu. Su si Kristu, iring sikandin te nati he kerehidu he ibpemuhat emun Pista te Kedlevayi su impemuhat en sikandin wey kiw melibri.

⁸ Ne tenged kayi, duen en daan kenitew he kedsilibra te Pista te Kedlevayi ne kinahanglan he kenè tew en maan egemiten is daan he supas he zuen din tapey he iyan is mezaat wey meremerik he ulaula, kekenà, iyan tew en egemiten is supas he wazè din tapey, he ke và dà egkeg̵iya, is kedtumana te tutuu he tuluuwen wey is kedtudtula te tutuu.

⁹ Duen te nehuna he surat he impeuwit ku keniyu, insug̵ù ku keniyu he kinahanglan he kenè kew mebpekiduma pa maan te menge etew he meremerik is ulaula.

^10-11 Ne kenè ku iyan egkeg̵iyen is menge etew he wazà medtuu te Megbevayà he meremerik is ulaula zan, wey menge leg̵ezen, wey menge tulisan, wey menge ed-azap te kenà tutuu he megbevayà, su emun iyan en haazà migkag̵i ku ne utew mereg̵en he edlikayan su wey kiw zà ebpekelikey te iring dutun ke ed-awè kiw kayi te kelibutan. Iyan egkeg̵iyen ku he edlikayan is etew he egkag̵i he tumutuu sikandin, iyan, mezaat is ulaula zin iring te meremerik is baal zin, wey ke leg̵ezen sikandin, ed-azap te kenà tutuu he megbevayà, ed-ulug̵an din te salà is duma he etew, lelenguten be, wey tulisan sikandin. Ne minsan is kegkaan dà duma kandin ne kenè kew medtampu.

^12-13 Iyan, haazà is menge etew he wazà medtuu ki Jesus, wazè tew kelavet duen te kedsusi te menge ulaula zan. Iyan edsusi kandan is Megbevayà. Iyan, kinahanglan he edsusiyen tew is menge ulaula te menge zuma tew he tumutuu su zuen insurat he Lalag te Megbevayà he edhenduen te, “Haazà is duma niw he mezaat is ulaula zin, kenè niw tug̵uti he mebpekiduma pa maan sikandin keniyu.”