1 Kurintu 4 - Manobo Western Bukidnon

Is Menge Epustul ni Jesu Kristu

¹ Ne sikami is ebpenurù, kinahanglan he isipa key keniyu he menge sulug̵uen dà ni Kristu. Insarig te Megbevayà kenami is kedseysaya te langun he menge in-eles din dengan he tuluuwen.

² Ne is sinerig̵an, ne kinahanglan he metinumanen sikandin te menge sug̵ù te egalen din.

³ Iyan, kenè ku igkesamuk ke hengkey is egkeg̵iyen niw wey ke hengkey is egkeg̵iyen te etew zà duen mehitenged te kedtumana ku te ebpeveelan kedì te Megbevayà su kenè kew iyan edsusi kedì. Kenè daan egkehimu he iyan a edsusi te vaal ku.

⁴ Minsan te wazà egketuenan ku he sayep ku, egkehimu pa he zuen pa kurang te ebeelan ku su iyan metau is Megbevayà. Iyan sikandin edsusi te menge vaal ku.

⁵ Umba, kenè kiw edsawey te menge zuma tew, kekenà, edteg̵azan tew is kedlikù te Nengazen tew he si Jesus. Ibpeg̵awag̵awa zin dutun is nekeeles he menge vaal te menge etew g̵untaan, ne ibpetuenan din is wazè pa metueni he menge ed-isipen te menge etew. Ne zutun egketuenan te kada sevaha he etew ke zuen igkezelig̵i kandin te Megbevayà wey ke wazà.

⁶ Menge suled, kayi te langun he migkag̵i ku, migamit ku he penenglitan si Epulus wey is kediey he keugelingen su wey mekepenurù heini keniyu ke hengkey is hustu he ed-ul-ulahan sumalà is ibpesavut te insurat he Lalag te Megbevayà. Iyan is: kinahanglan he engkezi niw is kebpelevawa te penurù te sevaha kenami su sikami is ebpenurù, wazà lavew kenami su nekedrepeng key.

⁷ Kunaan niw vuwa ke lavew kew te menge zuma he tumutuu ki Kristu. Is dekelà he kedsavut niw, ne kunaan niw vuwa ke zaan heini ziyan te keniyu ne wazà iveg̵ey keniyu te Megbevayà! Su emun netuenan niw he imbeg̵ey zà heini keniyu, maan is idantal niw?

⁸ Kunaan niw vuwa ke wazè en egkinehenglanen niw he tavang te Megbevayà. Henduen be te midtulus kew en ne is langun he menge tuvad te Megbevayà, ne nekuwa niw en. Kunaan niw vuwa ke edhadì kew en dutun te g̵inhedian te Megbevayà ne sikami is menge epustul, kenè key pa ebpekehadì. Meupiya iyan pezem ke tutuu he edhadì kew en su wey key zaan mekehadì duma keniyu.

⁹ Umba egkekag̵i ku heini su sikami is menge epustul, midhimu te Megbevayà he iyan key menge etew he utew minus is pid-etawan din. Iring key te menge pirisu he edhimetayan he ebentayan te langun he menge linimbag, wey te tivuuk he menusiyà, wey te langun he menge velinsug̵uen te Megbevayà he ebpemuun te langit.

¹⁰ Sikami, egkeg̵iyen te menge etew he kenè key metau he ed-isip su ibpenurù dey is lalag ni Kristu. Ne sikiyu mulà, egkeg̵iyen niw he utew kew metau tenged te kedtuu niw ki Kristu! Telawen key kun, iyan, sikiyu, utew kew memevurut! Edtehuzen kew te menge etew, iyan, sikami, kenè key mulà edtehuzen, kekenà, ebpesipelahan key zan.

¹¹ Sikami, minsan guntaan, egkealang-alang key te egkeenen dey wey ed-inumen dey; ebpemug̵elen key ne minsan is hustu he ugelingen dey, ne wazà. Ne minsan is ed-ubpaan dey ne wazà daan.

¹² Kinahanglan he edhag̵ù key su wey zey mekuwa is menge kinahanglan dey. Ne ke edrewakan key te menge etew kenè key edtavak, kekenà, id-ampù dey sikandan he tuvazi sikandan te Megbevayà. Ne emun ebpesipelahan key ne ed-entusen dey.

¹³ Ne emun ed-el-elezen key ne kenà mezaat is idtavak dey. Minsan guntaan henduen key te rapek dà duen su kenè key idrerepengan te menge etew, ne henduen key te utew minus is pid-etawan din.

¹⁴ Menge suled, kenà iyan igkeg̵iya ku kayi su wey kew meeled, kekenà, su wey ku sikiyu mepenurù su nehimu kew en he menge minahal he anak ku pinaag̵i te kedtuu niw ki Kristu.

¹⁵ Su minsan pa te utew mezakel is menge etew he ed-ag̵ak keniyu te menge tumutuu ki Kristu, sebsevaha ku zà is iring te amey niw tenged te kedtuu niw. Su hein impesavut ku keniyu is Meupiya he Tudtulanen, nehimu a he amey niw zutun te kedtuu niw ki Jesu Kristu.

¹⁶ Ne g̵eina te amey a keniyu, edhengyuan ku sikiyu he med-iring kew kediey.

¹⁷ Umba, edsug̵uen ku ziyan te keniyu si Timoteo. Minahal ku sikandin he anak he utew metinumanen te menge sug̵ù te Nengazen. Ibpenurù din keniyu is menge ulaula ku, ne iyan heini meupiya he ed-ul-ulahan te tumutuu ki Kristu, ne iyan daan ibpenurù ku te menge tumutuu ziyà te minsan hendei he inged.

¹⁸ Utew ebpegalbu is duma keniyu su kunaan dan ke egkehandek a he edhendiyan te kedsusi keniyu.

¹⁹ Iyan, ke edtug̵ut is Nengazen tew, meg̵aan e en edhendiyan ne zutun ed-ahaan ku ke hendei taman is kebpegalbu zan su kela ke taman dà te menge lalag is kebpegalbu zan.

²⁰ Haazà is kedhedii kenitew te Megbevayà, ne kenà pinaag̵i te menge lalag dà, kekenà, pinaag̵i te zekelà he g̵ehem din.

²¹ Ne hendei zapit is egkesuatan niw? Emun kenè niw ed-iniyug̵an is mezaat he ulaula, ebeyaan ku sikiyu wey ku sikiyu mesiluti. Ne emun meupiya is ed-ul-ulahan niw, meupiya g̵ihapun is kebpenumbaley ku ziyan, ne zekelà is gag̵ew ku wey hizu ku keniyu.