1 Kurintu 2 - Manobo Western Bukidnon

Is Ketudluanan Pinaag̵i te Wag̵as he Mulin-ulin

¹ Siak, menge suled, dutun te aney ku kebpekeuma ziyan, hein impesavut ku ziyan te keniyu is mehitenged te Megbevayà, ne wazè ku g̵emita is ketau te kegkag̵i wey is menge ketezengan he mibeelan te etew zà duen.

² Su neisip ku he iyan ku zà ibpesavut diyan is penurù mehitenged ki Jesu Kristu wey is kedrensanga kandin te krus.

³ Ne hein nekeuma a ziyan te keniyu utew a migkulbai su utew a egkehandek su kela ke kenè ku egkehimu is ebpeveelan kedì te Megbevayà.

⁴ Ne hein midlelag̵an ku sikiyu wey impesavut ku keniyu is Lalag te Megbevayà, wazè ku iyan gemita is ketau te kegkag̵i wey is menge mekempet he lalag. Su is Wag̵as he Mulin-ulin, iyan mibpirma te egkeg̵iyen ku pinaag̵i te g̵ehem din

⁵ su wey mehimu he kenà iyan niw meserig̵i is ketau te etew zà duen, kekenà, iyan niw meserig̵i is gehem te Megbevayà.

Is Impezayag te Wag̵as he Mulin-ulin

⁶ Ne haazà is menge etew he mezesen is kedtuu zan te Megbevayà, duen ketau he ibpesavut ku kandan, asal, is ketau he ibpenurù ku kandan ne kenà daan ebpuun te etew zà duen wey ziyà te menge pengulu he iyan ebayàbayà dini te kelibutan su egkeewaan en heini te menge g̵ehem dan.

⁷ Heini is ketau he egkeg̵iyen ku, ne iyan kes in-eles he edhimuwen te Megbevayà he wazà metueni zengan te menusiyà. Dengan dà te wazè pa limbag̵a is minsan hengkey, daan he mid-isip te Megbevayà heini is edhimuwen din su wey kiw tulusa.

⁸ Ne haazà is menge kelibutanen he pengulu, wazè dan mesuati te edsavut ke hengkey is edhimuwen te Megbevayà su ke nesavut dan, wazè dan pezem iransang te krus kes mekeg̵eg̵ehem he Nengazen te langun.

⁹ Ne tenged kayi iyan ibpenurù dey is insurat dengan he Lalag te Megbevayà he edhenduen te, “Is utew meupiya wey egkein-inuwan he wazè pa maahà wey wazè pa mezineg te menusiyà wey wazè pa meisip te minsan hentei he etew, ne iyan heini mid-andam te Megbevayà he ibeg̵ey zin diyà te langun he menge etew he mahal sikandin diyà te g̵ehinawa zan.”

¹⁰ Ne heini is in-eles din dengan, impesavut din en kenitew pinaag̵i te Wag̵as he Mulin-ulin. Su is Wag̵as he Mulin-ulin, egketuenan din is minsan hengkey, minsan is utew mezalem he in-eles he menge isip te Megbevayà.

¹¹ Hentei is nesayud te isip te sengeetew ke kenà iyan dà haazà is etew nesayud ke hengkey is diyà te keugelingen he isip din. Ne iring din ded daan iyan dà is Wag̵as he Mulin-ulin nesayud ke hengkey is isip te Megbevayà.

¹² Sikitew is menge tumutuu, imbeg̵ey kenitew te Megbevayà is Wag̵as he Mulin-ulin ne is ed-ulin kenitew, diyà ebpuun te Megbevayà ne kenà ebpuun diyà te etew zà duen. Umba imbeg̵ey is Wag̵as he Mulin-ulin kenitew su wey tew mesavut is langun he ibeg̵ey kenitew te Megbevayà.

¹³ Ne tenged kayi iyan ibpenurù dey is impesavut kenami te Wag̵as he Mulin-ulin, ne kenà iyan is impesavut kenami te memetau he etew zà duen. Is ebpuun diyà te Wag̵as he Mulin-ulin, ne iyan ibpesavut dey ziyà te menge etew he mid-ulinan daan te Wag̵as he Mulin-ulin.

¹⁴ Ne is etew he wazà diyà te kandin is Wag̵as he Mulin-ulin, kenè din edewaten is ibpenurù te Wag̵as he Mulin-ulin su wazà pulus kayi ziyà te kandin, ne kenè din daan egkesavut su iyan dà ebpekeseysey kayi ziyà te kandin is Wag̵as he Mulin-ulin.

¹⁵ Ne sikan is etew he ziyà te kandin is Wag̵as he Mulin-ulin, egkesavut din mulà is pulus te minsan hengkey he ibpenurù te Wag̵as he Mulin-ulin. Iyan, haazà is etew he wazà diyà te kandin is Wag̵as he Mulin-ulin, kenà sikandin ebpekesavut ke hengkey is diyà te isip te menge etew he mibeg̵ayan te Wag̵as he Mulin-ulin.

¹⁶ Su zuen insurat he Lalag te Megbevayà he edhenduen te, “Wazà etew he nesayud ke hengkey is diyà te isip te Megbevayà, ne wazà daan ebpekepenurù te Megbevayà.” Iyan heini insurat dengan, iyan, sikitew mulà, impetuenan kenitew ke hengkey is diyà te isip ni Kristu.