1 Kurintu 16 - Manobo Western Bukidnon

Is Tavang Diyà te Edlised

¹ Ne zuen pa id-sug̵ù ku keniyu mehitenged te ked-emutè niw te selapì he idtavang niw te egkengeayuayu he menge zuma tew he tumutuu. Insug̵ù ku en daan heini te menge zuma tew ziyà te prubinsya he Gelasya.

² Ne kada Duminggu ne kinahanglan he teg̵enaha te kada sevaha keniyu is ibeg̵ey zin diyà te Megbevayà. Sumalà is netig̵eyunan niw ne kinahanglan he iteg̵eley niw is bahin te Megbevayà. Ne tipig̵i niw heini su wey emun ebpekeuma ad diyan ne wazè en kinahanglan he ed-emutè kew pa su zaan en he naandam.

³ Ne emun ebpekeuma a ziyan edsug̵uen ku ziyà te inged he Hiruselim sikan is ebpilien niw he menge etew wey zan meuwit is ibeg̵ey niw. Ne ibpeuwit ku zaan is menge surat su wey metueni te ebeg̵ayan ke hengkey is tuyù dan te ed-uwit.

⁴ Ne emun kinahanglan dutun he edhendiyà a zaan te Hiruselim, ebpekezuma zan kediey.

Is Menge Telaan ni Pablo

⁵ Edhendiyan a te Kurintu emun egketapus ku is tuyù ku ziyà te prubinsya he Mesidunya su egkeisip ku he ziyà a ebayà te Mesidunya.

⁶ Ne malù a egkeug̵et ke ziyan e en te keniyu. Kenà a vuwa ed-awà diyan taman te kenè pa egketapus is tipenguzan. Ne zutun te kedlaus ku, meupiya ke edtevangan a keniyu zutun te kedhipanew ku ke hendei a ebpevayà.

⁷ Kenè ku egkesuatan he meg̵aan dà is kebpenumbaley ku ziyan, kekenà, iyan netag̵ù te g̵ehinawa ku is egketegteg̵aad a ziyan ke edtug̵ut is Megbevayà.

⁸ Egkeisip ku he kayi e pa ed-ubpà te inged he Ipisu taman te Pista te Pintikusti ne human a egenat.

⁹ Su mezakel pa zini is egkesuat he ebpemineg te Lalag te Megbevayà ne zekelà is pulus te ked-ubpè ku kayi, asal, mezakel zaan dini is menge kuntada te Megbevayà.

¹⁰ Ne emun ebpekeuma ziyan si Timoteo ne purungi niw sikandin su sulug̵uen daan sikandin te Nengazen he iring kediey.

¹¹ Kinahanglan he edtehuzen niw sikandin, ne emun edlaus te hipenawan din ne tevangi niw sikandin, ne ipeehè niw is gag̵ew niw kandin su wey mekelikù sikandin dini te kedì, su ebpeebuten ku sikandin wey is menge zuma zin he menge suled tew te kedtuu.

¹² Ne si Epulus he suled tew zaan tenged te kedtuu, kepipira ku en sikandin keg̵iyi he meupiya ke ebisitahan kew zin duma zuen te menge suled tew he mibisita ziyan. Iyan, egkag̵i sikandin te wazè pa meseled te g̵ehinawa zin is kedhendiyan din. Iyan, edhendiyan sikandin ke wazà ebpekesamuk kandin.

¹³ Layun kew, menge suled, med-andam; hemeni niw te edtuu si Jesu Kristu; kenè niw ikeeled is kedtuu niw, kekenà, ipeehè niw is kelig-en te kedtuu niw.

¹⁴ Ne minsan hengkey is ebeelan niw, layun niw ipaahà is kebmahala niw te menge zuma niw.

¹⁵ Netuenan niw, menge suled, he iyan nehuna he nemeketuu ziyan te prubinsya he Gerisya ensi Istipenas. Ne wazè dan meduwazuwa te kedtevangi zan te menge zuma zan he tumutuu.

¹⁶ Ne tenged dutun, edhengyuen ku keniyu he pemineg̵a niw is sambag te menge etew he iring engki Istipenas wey is minsan hentei he menge zuma tew he ebpurung edtuman te ebpeveelan kandan te Nengazen tew.

¹⁷ Utew ad neg̵alew hein nekeuma si Istipenas, si Fortunato wey si Ekeyiku su henduen be te netembaran is utew ku kebulunga keniyu.

¹⁸ Inmeupiya sikandan te g̵ehinawa ku iring te inmeupiya zaan sikandan te g̵ehinawa niw. Tehuza niw is menge iring kayi he etew.

Menge Pengemusta

¹⁹ Ebpengemusta keniyu is langun he menge tumutuu te langun he menge inged dini te prubinsya he Asya. Utew zaan meheg̵et is kebpengemustaha keniyu ni Ekilu wey si Priscila wey elin daan is menge tumutuu he edtig̵um diyà te valey zan dini te Ipisu.

²⁰ Is langun he menge tumutuu he menge zuma ku kayi, ne ebpengemusta zan daan keniyu. Ne sikiyu zaan diyan, ne mebpelimlimuey kew.

²¹ Te kedtepusa ku kayi te surat, egkeg̵ien ku he iyan e en si Pablo is midsurat kayi. Ebpengemusta a keniyu te langun.

²² Ke zuen minsan hentei he wazà diyà te g̵ehinawa zin si Jesus, ne verakat he siluti sikandin te Megbevayà. “Maran ata,” he ke và dà egkeg̵iya, meg̵aan ka, Jesus, medlikù.

²³ Tuvazi kew is langun te Nengazen tew he si Jesus.

²⁴ Utew kew mahal zini te g̵ehinawa ku tenged te kedtuu tew ki Jesu Kristu. Iyan a si Pablo.