1 Kurintu 14 - Manobo Western Bukidnon

Is Kegkag̵i te Menge Kineg̵iyan he Kenà Egkesavut

¹ Umba, menge suled, kinahanglan he iyan niw ipehuna ziyà te g̵ehinawa niw is kebmahala niw te menge zuma niw. Ne meupiya zaan ke ebuyuen niw is menge ketau he ibeg̵ey te Wag̵as he Mulin-ulin, lavew en is kedseysaya te impesavut te Megbevayà.

² Ne emun duen ebpintezan te kineg̵iyan he kenè din egketuenan, iyan din egkelelag̵an is Megbevayà ne kenè din iyan egkelelag̵an is menge zuma zin he etew su kenè dan egkesavut is egkeg̵iyen din. Haazà is egkeg̵iyen din, ne in-ulin kandin te Wag̵as he Mulin-ulin, iyan, in-eles haazà su wazà ebpekesavut.

³ Iyan, ke zuen etew he edseysayen din is impesavut kandin te Megbevayà, menge zuma zin mulà is egkelelag̵an din ne ebpeketavang heini su egkeheg̵et is kedtuu zan, ne egkesembag̵an sikandan, wey egkelig-enan is kebpekeantus dan te mereg̵en.

⁴ Ne haazà is etew he egkag̵i te kineg̵iyan he kenè din egketuenan, kandin dà he g̵ehinawa is egketevangan din. Iyan, haazà is etew he edseysayen din is impesavut kandin te Megbevayà, egketevangan din mulà is menge zuma zin he tumutuu.

⁵ Egkesuatan ku pezem he ikeveg̵ey keniyu te langun is ketau te kegkag̵i te kineg̵iyan he kenè niw egketuenan, iyan, utew pezem deyzey ke igkeveg̵ey keniyu is ketau te kedseysey te ibpesavut te Megbevayà. Su zekelà is pulus te kedseysey te ibpesavut te Megbevayà, kenà te kegkag̵i te kineg̵iyan he kenà egketuenan, asal, duen ded daan pulus kayi ke zuen ebpekeluwas su zutun ebpeketavang te langun he menge tumutuu haazà is egkeg̵iyen.

⁶ Ne penenglitan, menge suled, ke ebpekeuma a ziyan ne iyan dà egkeg̵iyen ku keniyu is pinaag̵i zà te kineg̵iyan he kenè niw egketuenan, hengkey is pulus din? Deyzey ke idseysey ku keniyu is impesavut kedì te Megbevayà ne emun kenà haazà, ne kinahanglan he zuen ibpenurù ku keniyu he tuluuwen wey ke penurù be he impesavut kedì, ne human duen pulus te egkeg̵iyen ku.

⁷ Su penenglitan, is menge belvelayen he edag̵ing, ke zuen ebpemulala wey ke ebpengutiyapì be, iyan, kenè din egketuenan is ked-epad, ne kenà egkesavut te menge zuma ke hengkey is in-epad din.

⁸ Ne iring din ded daan ke zuen sundaru he edhiyup te vudyung su ibpesavut din is menge zuma zin he ebpekidtebek dan en, iyan, ke kenà keladu is dag̵ing dutun, kenè dan egketuenan ke hengkey is ibpesavut din dutun te kedhiyup din ne kenè dan edseg̵ipaan.

⁹ Ne sikiyu zaan, menge suled, iring kew kayi te ebpengutiyapì wey edhiyup te vudyung su emun egkag̵i kew te kineg̵iyan he wazà duen ebpekesavut, ne wazà pulus te egkeg̵iyen niw.

¹⁰ Utew medmezakel is menge kineg̵iyan dini te kelibutan, ne te kada sevaha kayi zuen ebpemekesavut.

¹¹ Iyan, ke zuen ebpekidlalag kedì ne kenè ku egkesavut ke hengkey is egkeg̵iyen din, ne kenà egkehimu he ebpezumehè key su kenè key edsinevutà.

¹² Ne sikiyu, menge suled, geina te egkesuatan niw he meveg̵ayi kew te menge ketau he ibeg̵ey te Wag̵as he Mulin-ulin, kinahanglan he iyan niw vuyua is menge ketau he ebpekeheg̵et te kedtuu te langun niw te menge tumutuu.

¹³ Ne tenged kayi, is etew he ebpekekag̵i te kineg̵iyan he kenè din egketuenan, kinahanglan he iampù din he meveg̵ayi sikandin te ketau te kedluwas te egkeg̵iyen din.

¹⁴ Su emun edlelag̵an ku is Megbevayà te kineg̵iyan he kenè ku egketuenan, ne egkehimu he ed-ampù a pinaag̵i te Wag̵as he Mulin-ulin, iyan, wazà mekeseled diyà te isip ku haazà is egkeg̵iyen te vèbè ku.

¹⁵ Tenged kayi egkesuatan ku he mekeampù a he ed-ulinan te Wag̵as he Mulin-ulin, iyan, egkesuatan ku zaan he mesavut te menge zuma ku ke hengkey is egkeg̵iyen ku. Ne emun egkanta a, egkesuatan ku he ed-ulinan a is egkanta te Wag̵as he Mulin-ulin, iyan, kinahanglan daan he egkesavut haazà is egkentahan ku.

¹⁶ Ne penenglitan ke edalig kew te Megbevayà he ed-ulinan kew te Wag̵as he Mulin-ulin, iyan, kenà egkesavut haazà is egkeg̵iyen niw, is etew he sikan pa edsimba, kenà sikandin ebpekepeg̵umbenar zutun te egkeg̵iyen niw su kenè din egkesavut.

¹⁷ Minsan ke utew meupiya haazà is migkag̵i niw he kebpeselamati te Megbevayà, kenà ebpeketavang te kedtuu zutun te etew.

¹⁸ Ebpeselematan ku te Megbevayà is kebpekekag̵i ku te kineg̵iyan he wazà duen egketau. Mezakel is kediey he kegemita kayi te ketau kenà is keniyu.

¹⁹ Iyan, minsan pa zutun, emun diyà a te ketig̵uman te menge tumutuu, kenè ku egemiten su meupiya pa zutun is kegkeg̵iya ku te minsan lelima zà he lalag he egkesavut he ebpeketavang te menge zuma ku, kenà is kegkeg̵iya te liblibuwen he menge lalag he kenà egkesavut.

²⁰ Kinahanglan, menge suled, he kenà iring te ked-isip te menge vatà is ked-isipa niw kayi. Iyan dà ulaula te vatà he meupiya he ed-iringan, haazà is kenè dan kegketueni te ked-isip te mezaat. Iyan, kinahanglan he iring te ked-isip te meg̵urang is ked-isipa niw kayi.

²¹ Su zuen insurat he Lalag te Megbevayà he edhenduen te, “Edsug̵uen ku ziyan te keniyu te menge Hudiyu is menge etew he selakew is kineg̵iyan dan su kenè dan menge zuma niw he Hudiyu. Ibpekag̵i ku sikandan diyan te keniyu, iyan, minsan pa zutun te utew igkeinuinu heini, kenè kew ebpemineg te ibpepenudtul ku kandan diyan te keniyu.” Iyan heini Lalag te Megbevayà.

²² Ne tenged kayi egkesavut ta he heini is ketau te kegkag̵i te kineg̵iyan he kenà egketuenan, ne ibeg̵ey heini te Megbevayà su wey metueni te kenà menge tumutuu he ebpuun heini ziyà te Megbevayà. Iyan, haazà is ketau te kedseysey te impesavut te Megbevayà, imbeg̵ey zin heini su wey meheg̵et is kedtuu te menge etew he nemeketuu en.

²³ Umba, ke nengetig̵um is menge tumutuu wey egemiten te langun dutun is ketau te kegkag̵i te kineg̵iyan he kenè dan egketuenan wey ke penenglitan duen edseled dutun he menge bisita he sikan pa meketuu wey ke kenè be tumutuu ne kunaan dan ke ebuneg̵en kew.

^24-25 Iyan, ke iyan ed-ul-ulahan te langun is: edseysayen dan is ibpesavut kandan dutun te Lalag te Megbevayà, ne haazà is bisita, pinaag̵i zutun te nezineg din, egkesavut din ke hengkey is ked-isipa te Megbevayà dutun te mezaat he menge isip din, ne egketuenan din he mekesesalè bes sikandin ne ebpekedsendit. Ne zutun ed-ezapen din is Megbevayà ne ke sikandin diyà te keniyu te, “Tutuu ves iyan he ed-ulinan kew te g̵ehem te Megbevayà!”

Is Dait he Ed-ul-ulahan Dutun te Kegkaamur-amur te Menge Tumutuu

²⁶ Umba, menge suled, ke edtig̵um kew, iyan heini meupiya he ed-ul-ulahan. Meupiya ke zuen sevaha he andam te kegkanta te kedalig te Megbevayà, ne is sevaha, ebpenurù, ne is sevaha, idseysey zin is impesavut kandin te Megbevayà, ne zuen sevaha he egkag̵i te kineg̵iyan he kenè din egketuenan, ne zuen daan sevaha he edluwas kayi. Ne minsan hengkey he ed-ul-ulahan niw zutun ne kinahanglan he ebpekeheg̵et te kedtuu te menge tumutuu.

²⁷ Ke zuen ebpemekekag̵i te kineg̵iyan he kenè dan egketuenan, ne zezuwa zà is megkag̵i, ne emun kenà ne tetelu, ne kenè dan mebperedredseey ne kinahanglan he zuen dutun metau he edluwas.

²⁸ Su emun wazà ebpekeluwas dutun ne kinahanglan he wazà megkag̵i te kineg̵iyan he kenà egketuenan. Egkehimu ke egkag̵i haazà is etew ziyà te Megbevayà asal kenà edhabet, kekenà, diyà dà te isip din.

²⁹ Ne iring din ded daan haazà is menge etew he edseysey te impesavut kandan te Megbevayà su egkehimu he zezuwa zà ne emun kenà ne tetelu is egkag̵i. Ne kinahanglan he ebpemineg is langun ne ed-isipen dan ke hustu ve wey ke kenà haazà is egkeg̵iyen.

³⁰ Ne ke zuen ebpimpinuu zutun he ebpemineg ne ibpesavut kandin te Megbevayà is ibpekag̵i zin kandin, ne kinahanglan he ed-engked egkag̵i haazà is nehuna su wey mekekag̵i haazà is duma zin.

³¹ Egkehimu he egkag̵i kew is langun, asal, kenè kew mebperedredseey ne zutun egkepenurù wey egkesembag̵an is langun.

³² Su is etew he ebpeneuven te Megbevayà, egkehimu zin te ed-eg̵en is gehinawa zin su wey kenà sikandin mekeredsà dutun te egkag̵i he iring din he ebpeneuven daan te Megbevayà.

³³ Kenà egkesuatan te Megbevayà he mebperedredseey kew emun edtig̵um kew is edsimba kandin. Su kenà iyan in-ulin kenitew is kegkeliveg̵i, kekenà, iyan is melinawen he ulaula.

³⁴ Ne zuen pa idtelaan ku keniyu he iyan daan ed-ul-ulahan te menge tumutuu ziyà te minsan hendei he inged. Iyan is: kenè niw itug̵ut he zuen bahi he ebpenurù ke edtig̵um kew te kedsimba. Mebpeninimè dan dà. Su impenurù daan te kesug̵uan te menge Hudiyu he kenà mebayàbayà is menge vahi.

³⁵ Ke zuen id-insà te vahi ne kinahanglan he kenè din iinsà dutun te valey he edtig̵uman, kekenà, iinsè din te esawa zin emun nekeulì dan en. Su mekeeled-eled he ulaula is kegkag̵i te vahi zutun te kedtig̵um te menge tumutuu.

³⁶ Kunaan niw vuwa ke ziyan dà ebpuun is Lalag te Megbevayà te keniyu! Ne emun kenà, ne kela ke kunaan niw ke iyan kew zà nepenurù te Lalag te Megbevayà.

³⁷ Ke zuen etew he ed-isipen din he zuen ketau zin he imbeg̵ey te Wag̵as he Mulin-ulin, ne emun kenà, ne zuen ibpekag̵i kandin te Megbevayà, ne kinahanglan he ventayi zin is ibpesavut ku keniyu kayi te surat su kenà dini zà te kediey ebpuun heini he menge sug̵ù, kekenà, diyà te Nengazen.

³⁸ Ne tenged kayi emun kenà haazà is etew ebpemineg kayi ne kenè niw zaan pemineg̵a is egkeg̵iyen din.

³⁹ Na, menge suled, iyan niw ihuna ziyà te g̵ehinawa niw is kedseysey te impesavut keniyu te Megbevayà. Kenè niw zewaya is etew he egkag̵i te kineg̵iyan he kenè din egketuenan, iyan,

⁴⁰ kinahanglan he purungi niw tengkai is ed-ul-ulahan niw ke edtig̵um kew te kedsimba.