1 Kurintu 13 - Manobo Western Bukidnon

Is Kebmahala te Zuma

¹ Minsan ke ebeg̵ayan a te ketau te kegkag̵i te menge kineg̵iyan dini te kelibutan wey minsan is kineg̵iyan te menge velinsug̵uen diyà te langit, ne kenè ku ebmahalen is menge zuma ku, wazà pulus din su iring dà haazà is kegkag̵i ku te zag̵ing te ag̵ung etawa kulingtangan.

² Ne penenglitan ke ebeg̵ayan a te ketau te kedseysey te impesavut kedì te Megbevayà, ne egkesavut ku is minsan hengkey he kenà egkesavut te zuma wey is minsan hengkey he mezalem, ne minsan ke utew mezesen is kedtuu ku ne egkehimu he egkepengelinteuwan ku he mekehalin is buntud ne segugunà edhalin, iyan, ke kenà mahal zini te g̵ehinawa ku is menge zuma ku, ne wazè ku g̵ihapun pulus.

³ Minsan pa ke id-amin ku ibpemeg̵ey is menge azen ku ziyà te egkengeayuayu ne idtug̵ut ku he edtutungen is lawa ku, iyan, ke kenà mahal zini te g̵ehinawa ku is menge zuma ku, wazà daan pulus kayi te menge ulaula ku.

⁴ Iyan, emun mahal ziyà te g̵ehinawa ta is menge zuma he etew iyan heini egkeulaula ta: ebpekeantus ki te minsan hengkey he pesipala, dekelà is g̵agew ta, wazà kesina he netag̵ù te g̵ehinawa ta, kenà ki ebpegalbu wey ebpelavew,

⁵ kenà mahawag is menge ulaula ta, kenè ta idteg̵el is kenita he egkesuatan, ne kenè ki melemu egkepauk, kekenà, utew ki melemu he ebpekepesaylu te nekesalà kenita.

⁶ Emun mahal ziyà te g̵ehinawa ta is menge zuma he etew kenà ibmeupiya te g̵ehinawa ta is mezaat he ulaula su iyan igkelipey ta is menge metazeng he ulaula.

⁷ Ebpekeantus ki te minsan hengkey he mereg̵en, ne kenè ta ed-isipen he mezaat is ulaula te zuma ta, kekenà, layun ki edsarig te keupiya te ulaula te zuma ta. Ne kenè ta ebelesan is ebpesipala kenita, kekenà, ebpesegdanan ta.

⁸ Haazà is ketau te kedseysey te impesavut te Megbevayà, ne zuen timpu he egkeawà. Ne haazà is ketau te kegkag̵i te selakew he kineg̵iyan, ne egkeawà daan, ne iring din ded daan haazà is kegkesavut te menge mezalem he penurù su egkeawà daan. Iyan, is kebmahala te zuma he etew he ibeg̵ey te Megbevayà, ne kenà egkeawà su wazè din pidtemanan.

⁹ Su is menge ketau wey is kedsavut te mezalem he penurù, ne kenè pa hustu heini.

¹⁰ Iyan, ke ibpesavut kenitew te Megbevayà is hustu ne zutun egkeawà haazà is kenè pa hustu.

¹¹ Dengan te vatè e pa utew, ne wazè pa mehustu is pengisip ku, is kegkag̵i ku, wey is kegeg̵ehinawa ku su ulaula pa haazà te kengunguhezi. Ne g̵untaan te meg̵urang e en mid-engkezan ku en is menge zaan he ulaula te kengunguhezi.

¹² Ne iring din ded daan, sikita, su g̵untaan iyan dà egketuenan ta is iring te alung he egepunen he egkeehè ta ziyà te peg̵elungan. Kenè te pa egkesavut is hustu. Iyan, keuzemà, kenà alung dà is egkeehè ta, kekenà, iyan en si Jesu Kristu is egkeehè ta. Ne zutun hustu mulà is kegkesevuta ta te langun iring te is Megbevayà, hustu is kegkesevuta zin kenita.

¹³ Na, duen tetelu he ebpeveelan kenita he kenà egkeawà. Kinahanglan he edtuuwan ta is Megbevayà, kinahanglan daan he layun ta ebperetenga is kegketuman te impenaad kenita te Megbevayà, ne kinahanglan daan he ebmahalen ta is menge zuma ta. Ne is lavew he meupiya kayi te tetelu, ne iyan is kebmahala ta te menge zuma ta.